ខេត្តតាកែវ ៖ បុរសម្នាក់ត្រូវបាននគរបាលស្រុកគីរីវង់ឃាត់ខ្លួន រួចកសាងសំណុំរឿងបញ្ជូនបន្តមកកាន់ការិយារិល័យព្រហ្ម្មកំរិតធ្ងន់ខេត្តដើម្បីចាត់ការបន្ត ខណៈពេលដែលជនសង្ស័យដោយចោទប្រកាន់ពីបទប៉ុនប៉ងមនុស្សឃាតដោយចេតនាផ្តើមចេញពីរឿងទំនាស់ព្រំប្រទល់ដីធ្លី ។
ហេតុការណ៍ខាងលើនេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី៣០ ខែ ឧសភា ឆ្នាំ ២០២០ នៅភូមិខ្វាវ ឃុំព្រៃអំពក ស្រុកគិរីវង់ ។
លោកយ៉ុគ សារ៉ាត់ អធិការនគរបាលស្រុកគីរីវង់បានអោយដឹងថា ជនសង្ស័យឈ្មោះ កែប ធី ភេទប្រុស អាយុ៣៥ឆ្នាំ មានទីលំនៅភូមិខ្វាវ ឃុំព្រៃអំពក ស្រុកគិរីវង់ ខេត្តតាកែវ ។ ចំណែកជនរងគ្រោះឈ្មោះគង់ ថា ភេទប្រុស អាយុ២២ឆ្នាំ មានទីលំនៅភូមិឃុំជាមួយគ្នា ។
លោកអធិការនគរបាលស្រុកគិរីវង់បានបន្តថា មុនពេលកើតហេតុ ជនសង្ស័យបានប៉ុនប៉ងធ្វើឃាតទៅលើជនរងគ្រោះ ដោយជនសង្ស័យបានធ្វើសកម្មភាពយកកង្វាខ្វាក្ដាមដងឈើប្រវែង១,៦៧ម៉ែត្រ បានវាយ នឹងរឹតកជនរងគ្រោះ បណ្ដាលអោយរងរបួសមានស្នាមឆូតលើស្មាពីខាងក្រោយទាំងសងខាង ប៉ុន្តែពេលនោះត្រូវបានអ្នកជិតខាងជួយចាប់ទាញចេញទាន់ ទើបជនរងគ្រោះរួតផុតពីគ្រោះថ្នាក់ ។
លោកអធិការស្រុកគីរីវង់បានបន្តទៀតថា ករណីប៉ុនប៉ងមនុស្សឃាតខាងលើនេះ បណ្តាលមកពីទំនាស់រឿងព្រំប្រទល់ដីនៅជិតគ្នា ដោយតែងតែមានទំនាស់នឹងគ្នាជាញឹកញាប់មកហើយ ។ ក្រោយពេលឃាត់ខ្លួន ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពប៉ងផ្តាច់ជីវិតទៅលើជនរងរគ្រោះប្រាកដមែន ។
នាយការិយាល័យព្រហ្មទណ្ឌកំរិតធ្ងន់ខេត្តបានអោយដឹងផងដែរថា នៅពេលនេះ សមត្ថកិច្ចកំពុងកសាងសំណុំរឿងដើម្បីបញ្ជូនជនសង្ស័យទៅសាលាដំបូងខេត្តចាត់ការទៅតាមច្បាប់ ។
គួររំលឹកផងដែរថា ករណីខាងលើនេះក៏ធ្លាប់មានកើតឡើងនៅខេត្តកំពង់ធំដែរ ដោយក្មួយប្រុសទាញកាំបិតប៉័ងតោកាប់ឪពុកមា បណ្តាលឱ្យបាត់បង់ជីវិត បន្ទាប់ពីមានទំនាស់ពាក្យសម្តីគ្នារឿងព្រំដីស្រែ ។ រឿងព្រំដីស្រែ ក្មួយប្រុសហ៊ានលើកដៃប្រហារជីវិតឪពុកមា ៕ (កែសម្រួលដោយ ៖ ធីតា)
ចែករំលែកព័តមាននេះ