ថ្លែងតាមទូរទស្សន៍រដ្ឋ លោកមូអាម៉ា កាដាហ្វី ថ្លែងថា ធម្មនុញ្ញរបស់អង្គការសហប្រជាជាតិផ្តល់សិទ្ធិដល់លីប៊ី ដើម្បីការពារខ្លួននៅពេលមានសង្គ្រាមដោយលោកសច្ចាថា នឹងសងសឹកការវាយប្រហាររបស់សម្ព័ន្ធភាពចម្រុះរបស់អាមេរិក បារាំង និងអង់គ្លេសនោះ ។ លោកកាដាហ្វី ថ្លែងទៀតថា ឃ្លាំងស្តុកសព្វាវុធរបស់លីប៊ីនឹងបើកចំហ ដើម្បីយកអាវុធបំពាក់ឱ្យពលរដ្ឋលីប៊ី ចូលរួមទប់ទល់ការវាយប្រហាររបស់ប្រទេសលោកខាងលិច ។
នៅក្នុងលិខិតដែលផ្ញើជូនប្រធានាធិបតីបារាំង លោកនីកូឡាស សាកូហ្ស៊ី និងនាយករដ្ឋមន្ត្រីអង់គ្លេស លោកដេវីដ កាមេរ៉ុន និងអគ្គលេខាធិការអង្គការសហប្រជាជាតិ លោកបាន គីមូន លោកកាដាហ្វី បានចាត់ទុកវិធានការរបស់អង្គការសហប្រជាជាតិថាជា «វិធានការគ្មានសុពលភាព» ពីព្រោះដំណោះស្រាយរបស់ក្រុមប្រឹក្សាសន្តិសុខមិនអនុញ្ញាតឱ្យមានអន្តរាគមន៍ក្នុងកិច្ចការផ្ទៃក្នុងរបស់លីប៊ី ដោយប្រទេសផ្សេងៗ ។ ទោះបីជាបែបណា ពុំមានប្រភពណាមួយឱ្យដឹងថា លោកកាដាហ្វី កំពុងលាក់ខ្លួននៅកន្លែងណានោះទេ ៕
ចែករំលែកព័តមាននេះ