ខេត្តកណ្តាល ៖ មន្ត្រីយោធាម្នាក់ត្រូវកម្លាំងកងរាជអាវុធហត្ថខេត្តកណ្តាលចាប់ខ្លួនតាមអំណាចសាលាដំបូងខេត្តកណ្តាលពីបទបំផ្លិចបំផ្លាញទ្រព្យសម្បត្តិអ្នកដទៃ កាលពីរសៀលថ្ងៃទី៩ មីនា វេលាម៉ោង៤និង៣០នាទីនៅចំណុចផ្ទះលេខ១៧៧ ផ្លូវលេខ៥៨៩ សង្កាត់បឹងកក់ទី២ ខណ្ឌទួលគោក ។
មន្ត្រីយោធារូបនេះឈ្មោះសុខ ឫទ្ធី ភេទប្រុស អាយុ៤៦ឆ្នាំ មុខរបរជាយោធា នៅទីចាត់ការបច្ចេកទេស និងសម្ភារនៃអគ្គបញ្ជាការកងទ័ព ស្នាក់នៅផ្ទះលេខ១៧៧ ផ្លូវលេខ៥៨៩សង្កាត់បឹងកក់២ ខណ្ឌទួលគោក រាជធានី
ភ្នំពេញ ។ ការចាប់ខ្លួនមន្ត្រីយោធាម្នាក់នេះធ្វើឡើងតាមដីកាបង្គាប់ឱ្យចាប់ខ្លួនលេខ១២៣ ចុះហត្ថលេខាដោយលោកអ៊ិន វ៉ានវិបុល ចៅក្រមស៊ើបសួរនៃសាលាដំបូងខេត្តកណ្តាល ក្រោមបទចោទប្រកាន់បំផ្លិចបំផ្លាញទ្រព្យសម្បត្តិអ្នកដទៃ ប្រព្រឹត្តនៅភូមិព្រែកតាតិន ឃុំស្វាយប្រទាល ស្រុកស្អាង ខេត្តកណ្តាល កាលពីថ្ងៃទី២៦ មីនា ២០០៩ ។
ប្រភពពីមន្ត្រីកងរាជអាវុធហត្ថខេត្ត បានឱ្យដឹងថា មន្ត្រីយោធាម្នាក់នេះបានបំផ្លិចបំផ្លាញរបងអ្នកដទៃដែលមានព្រំប្រទល់ជាប់គ្នា ក្រោយមកភាគីម្ខាងទៀតបានប្តឹងមកសាលាដំបូងខេត្តកណ្តាល២ដងរួចមកហើយ តែមន្ត្រីយោធាម្នាក់នេះគេចខ្លួនរហូត មិនព្រមទទួលខុសត្រូវ និងចូលខ្លួនមកតុលាការដើម្បីដោះស្រាយឡើយ ទើបឈានដល់ចេញដីកាចាប់ខ្លួននៅថ្ងៃទី៩ មីនា ២០១១ នេះ ៕
ចែករំលែកព័តមាននេះ