ខេត្តព្រះវិហារ ៖ នៅពេលប្រទះឃើញបដិមាព្រះគោដំបូង ភ្លាមៗគិតថាយកទៅផ្ទះដើម្បីនាំលាភ សេចក្តីសុខ ត្រជាក់ត្រជំដល់គ្រួសារតែបែរជានាំរឿងគួរឲ្យភ្ញាក់ផ្អើល និងធ្វើឲ្យគ្រួសារកសិករម្នាក់ ទៅជាមានភាពរវើរវាយ ទាំងប្រពន្ធនិងកូន ដែលអ្នកភូមិនិយាយថា អ្នកចូលរូប ឬអ្នកតាប្រកាន់ ។
ឧត្តមសេនីយ៍ ឆយ បូរិន នាយសេនាធិការដ្ឋាននៃស្នងការដ្ឋាននគរបាលខេត្តបានឱ្យដឹងថា ដំបូងឡើយបដិមាព្រះគោនេះ ត្រូវបានកសិករ ឈ្មោះ សូយ ធឿន អាយុ៦០ឆ្នាំ នៅឃុំយាងស្រុកជាំក្សាន្ត ប្រទះឃើញមានសភាពឆែបកន្ទុយដែលសង្ស័យត្រូវភ្ជួរដីប៉ះកាលពីខែមីនា ឆ្នាំ២០២០កន្លងទៅ ។ ការប្រទះឃើញនេះ គឺខណៈគាត់ដើររកផ្សិតប៉ក់ នៅចំណុចជញ្ជាំង ស្ថិតក្នុងភូមិយាង ឃុំយាង ស្រុកជាំក្សាន្ត ។
ក្រោយពីប្រទះឃើញ កសិកររូបនេះក៏បានយកបដិមាព្រះគោមកតម្កល់ទុកនៅក្នុងផ្ទះ ក្នុងបំណងទុកគោរពបូជាបារមីខ្លាំងពូកែរបស់ព្រះគោ ផ្ទុយទៅវិញ បែរជាធ្វើឱ្យប្រពន្ធកូនមានសភាពក្តៅក្រហល់ក្រហាយនៅមិនសុខ ។ តាមជំនឿអ្នកភូមិថា បារមីព្រះគោចូលរូប ជាន់កូនប្រពន្ធកសិករខាងលើឲ្យនៅមិនសុខ ដែលអ្នកភូមិនៅទីនោះតែងនិយាយថា អ្នកតាឬបារមីព្រះគោប្រកាន់ ។
ដោយមានអាការបែបនេះ កសិកររូបនោះ ក៏បានធ្វើពិធីសុំខមាទោសបារមីព្រះគោ ហើយយកបារមីព្រះគោទៅតម្កល់ទុកនៅកន្លែងដើម ទើបប្រពន្ធនិងកូនមានសភាពប្រក្រតីវិញ ។បន្ទាប់មក កសិករ សូរ ធឿន ក៏បានរាយការណ៍ទៅសមត្ថកិច្ចមូលដ្ឋាន ដើម្បីឲ្យទៅពិនិត្យ និងយកទៅរក្សាទុក តែនៅពេលលកសិករនោះយកបដិមាព្រះគោទៅតម្កល់នៅកន្លែងដើម បែរជាមានពលរដ្ឋផ្សេងទៀត ទៅយកបន្តមកទុកក្នុង
គោលបំណងផ្សេង ។
នៅពេលទទួលបានព័ត៌មាននេះ នគរបាលស្នងការដ្ឋានខេត្ត បានដាក់ផែនការដល់នគរបាលស្រុកជាំក្សាន្ត ឲ្យទៅធ្វើការស្រាវជ្រាវជាបន្ទាន់ និងណែនាំដល់អ្នកដែលយកបដិមានេះបន្តពីកសិករឈ្មោះ សូរ ធឿន ឲ្យចេញមុខ និងយកបដិមានោះមកប្រគល់ឲ្យសមត្ថកិច្ចដើម្បីរក្សាទុក ដោយមិនយកទោសពៃរ៍អ្វីឡើយ ។
លុះមកដល់ថ្ងៃទី៣១ ខែឧសភា ឆ្នាំ២០២០ កសិករឈ្មោះ លាក់ ជាតិ អាយុ៣២ឆ្នាំ រស់នៅភូមិ-ឃុំដែលប្រទះឃើញបដិមាខាងលើ និងជាអ្នកដែលបានយកបដិមាព្រះគោបន្តទៅនោះ ក៏បានយកបដិមានេះមកប្រគល់ឱ្យនគរបាលស្រុកជាំក្សាន្ត ទាំងយប់ដើម្បីរក្សាទុក ។
សូមបញ្ជាក់ថា បដិមាព្រះគោដែលប្រទះឃើញនេះ មានទំហំ៥០សង្ទីម៉ែត្រ ទទឹង២០សង្ទីមែត្រ និងមានកម្ពស់៣០សង្ទីម៉ែត្រ តែមិនទាន់ដឹងថា កសាងឡើងនៅក្នុងសតវត្សរ៍ទីប៉ុន្មាននៅឡើយទេ ៕
ចែករំលែកព័តមាននេះ