រាជធានីភ្នំពេញ ៖ មន្ត្រីជំនាញបានអះអាងថា ខារ៉ាអូខេ រង្គសាល និងឌីស្កូតែក ប៊ៀហ្គាឌិន ម៉ាស្សា មានជិត៤០០ទីតាំង និងបាបារាំង…
រាជធានីភ្នំពេញ ៖ មន្ត្រីជំនាញបានអះអាងថា ខារ៉ាអូខេ រង្គសាល និងឌីស្កូតែក ប៊ៀហ្គាឌិន ម៉ាស្សា មានជិត៤០០ទីតាំង និងបាបារាំង ឬផាប់ ប្រមាណជាង១០០ទីតាំង នៅរាជធានីភ្នំពេញ ត្រូវបានមន្ទីរជំនាញក៏ដូចជា រដ្ឋបាលរាជធានីភ្នំពេញបានជូនដំណឹង និងចុះអប់រំណែនាំផ្ទាល់អោយបិទទៅតាមការណែនាំរបស់ក្រសួងសុខាភិបាល ដើម្បីចូលរួមទប់ស្កាត់វីរុសកូវីដ១៩ទាំងអស់គ្នា ប៉ុន្តែបើនៅតែលួចបើកផ្គើនទៅនឹងបម្រាមទៀតនោះ ទីតាំងនោះនឹងត្រូវប្រឈមទៅនឹងការបិទអាជីវកម្មទាំងស្រុងតែម្តង ។
លោក ម៉ម វាសនា ប្រធានមន្ទីរទេសចរណ៍ រាជធានីភ្នំពេញបានអោយកោះសន្តិភាពដឹងនៅថ្ងៃទី០១ ខែមិថុនា ឆ្នាំ២០២០នេះថា សម្រាប់ស្ថិតិអាជីវកម្មសេវាកម្សាន្តទេសចរណ៍មនុស្សពេញវ័យ ដែលបានចុះបញ្ជីត្រឹមត្រូវ (ខារ៉ាអូខេ រង្គសាល-ឌីស្កូតែក បៀហ្គាឌិន) ត្រូវបានបិទអាជីវកម្មទាំងស្រុង តាមការណែនាំរបស់រាជរដ្ឋាភិបាល ក្រសួងសុខាភិបាល និងរដ្ឋបាលរាជធានីភ្នំពេញ ។
លោកបន្តថា ខារ៉ាអូខេ រង្គសាល-ឌីស្កូតែក បៀហ្គាឌិន នៅក្នុងរាជធានីភ្នំពេញមានចំនួន 138 ទីតាំងប៉ះពាល់បុគ្គលិកសរុប 4588 នាក់ ។ ក្នុងនោះប្រភេទសេវាកម្មខារ៉ាអូខេត្រូវបានបិទមានចំនួន 96ទីតាំង (ស្មើនឹង១០០%) និងប៉ះពាល់បុគ្គលិកសរុប 3138 នាក់ ។ ប្រភេទសេវាកម្មរង្គសាល-ឌីស្កូតែក ត្រូវបានបិទមានចំនួន 28ទីតាំង (ស្មើនឹង១០០%) និងប៉ះពាល់បុគ្គលិកសរុប 1158 នាក់ ។
ប្រភេទសេវាកម្មបៀហ្គាឌិន ត្រូវបានបិទមានចំនួន 11 ទីតាំង (ស្មើនឹង១០០%) និងប៉ះពាល់បុគ្គលិកសរុប 292 នាក់ ។
លោក ម៉ម វាសនា បានអោយដឹងទៀតថា ចំពោះអាជីវកម្ម សេវាកម្មស្ប៉ា និងម៉ាស្សា ត្រូវបានបិទនៅរាជធានីភ្នំពេញមានចំនួន 123 ទីតាំង (931គ្រែ) ស្មើនឹង100% ប៉ះពាល់បុគ្គលិក 2307 នាក់ ។ លោកបន្តថា ចំពោះអាជីវកម្មដែលតែងហៅ បាបារាំងៗឬផាប់ មាននៅក្នុងខណ្ឌដូនពេញ និងខណ្ឌចំការមន ប្រមាណជាង១០០ទីតាំង គឺត្រួតពិនិត្យទៅលើអាជ្ញាបណ្ណរបស់គាត់ បើសុំជាភោជនីយដ្ឋាន គឺជាភោជនីយដ្ឋានហើយ អាជ្ញាប័ណ្ណទាំងនោះ គឺផ្តល់ដោយរដ្ឋបាលខណ្ឌ លើកលែងតែម្ចាស់ជាជនបរទេសទើបតម្រូវឱ្យមកសុំនៅរដ្ឋបាលរាជធានីភ្នំពេញ ។
លោក ម៉ម វាសនា បានបញ្ជាក់ថា ចំពោះខារ៉ាអូខេ រង្គសាល និងឌីស្កូតែក ទាំងនោះត្រូវបានបិទទាំងស្រុងហើយ តាមរយៈការចុះត្រួតពិនិត្យ ប៉ុន្តែក្រុមការងាររបស់លោកនឹងបន្តចុះសង្កេតត្រួតពិនិត្យជាប្រចាំបន្ថែមទៀត ប្រសិនបើទីតាំងនោះនៅតែបើកទៀត គឺជាការបំពានសេចក្តីណែនាំក៏ដូចជា សេចក្តីប្រកាសរបស់ក្រសួង និងរាជរដ្ឋាភិបាលហើយ គឺត្រូវប្រឈមនឹងការបិទអាជីវកម្មតែម្តង ៕
ចែករំលែកព័តមាននេះ