រាជធានីភ្នំពេញ ៖ កម្មការិនីរោងចក្រកាត់ដេរ ហ្គ្រេត យូញៀន ដែលមានទីតាំងស្ថិតនៅភូមិទួលរកា សង្កាត់ចាក់អង្រែក្រោម ខណ្ឌមានជ័យ ចំនួន៧នាក់បានដួលសន្លប់ជាបន្តបន្ទាប់ កាលពីវេលាម៉ោង៩ និង៣០នាទីព្រឹក ថ្ងៃទី២១ វិច្ឆិកា ២០១៤ ដោយសារពុលផ្សែងម៉ាស៊ីនបូមខ្សាច់ ដែលមានការដ្ឋាននៅក្បែររោងចក្រនោះ ហើយបញ្ឆេះម៉ាស៊ីនបង្កឲ្យមានផ្សែងខ្មួលខ្មាញ់ចូលរោងចក្រ ។
ចំពោះកម្មការិនីទាំង៧រូប ដែលទទួលរងការពុលខាងលើនេះត្រូវបានសមត្ថកិច្ចសហការជាមួយតំណាងរោងចក្រចេញអន្តរាគមន៍ដឹកយកទៅសង្គ្រោះនៅមន្ទីរពេទ្យជ័យជំនះ ក្រុងតាខ្មៅ ដោយមិនមាននរណាម្នាក់រងគ្រោះថ្នាក់ធ្ងន់ធ្ងរដល់ជីវិតនោះទេ ។
តាមប្រភពព័ត៌មាននៅកន្លែងកើតហេតុបានឲ្យដឹងថា មូលហេតុនៃការពុលរបស់កម្មករខាងលើនេះ គឺបណ្តាលមកពីការដ្ឋានបូមខ្សាច់ដ៏ធំមួយកន្លែងនៅជិតទីតាំងរោងចក្របានធ្វើសកម្មភាពបញ្ឆេះម៉ាស៊ីន បណ្តាលឲ្យផ្សែងម៉ាស៊ីនភ្លើងហុយចូលទៅក្នុងបរិវេណរោងចក្រប៉ះពាល់ដល់បរិស្ថានរបស់កម្មករ កម្មការិនី ជាហេតុធ្វើឲ្យមានអ្នកដួលសន្លប់ ហើយករណីនេះក៏មិនមែនទើបតែជាលើកទីមួយដែរ ដូច្នេះមន្ត្រីនៃក្រសួងមន្ទីរពាក់ព័ន្ធ គួរមានវិធានការទប់ស្កាត់ជាមួយម្ចាស់អាជីវកម្មបូមខ្សាច់ដែលបង្កផលប៉ះពាល់ដល់សុខភាពកម្មករ កម្មការិនី ជាក់ស្តែងដូចជាករណីខាងលើនេះជាដើម ៕
ចែករំលែកព័តមាននេះ