ខេត្តស្វាយរៀង ៖ កម្មករ កម្មការនីរោងចក្រ ANG ពីរនាក់បានដួលសន្លប់បន្តបន្ទាប់គ្នា បន្ទាប់ពីចូលធ្វើការបានប្រហែល១ម៉ោង ។ ហេតុការណ៍នេះបានកើតឡើងកាលវេលាម៉ោងប្រមាណជា៨ និង៣០នាទីព្រឹក ថ្ងៃទី២១ វិច្ឆិកា ២០១៤ នៅតំបន់សេដ្ឋកិច្ចពិសេសតាយសេងស្ថិតក្នុងភូមិ តាប៊ិប សង្កាត់បាវិត ក្រុងបាវិត ខេត្តស្វាយរៀង ។
បើតាមសម្តីរបស់បុរសជាប្តីរបស់កម្មការនីម្នាក់ដែលបានដួលសន្លប់បានឱ្យដឹងថា ប្រពន្ធរបស់គាត់ឈ្មោះ ពេជ្រ ថេន អាយុ២២ឆ្នាំ មុខរបរកម្មកររោងចក្រ ANG រស់នៅក្នុងភូមិមនោរម្យ ឃុំមនោរម្យ ស្រុកស្វាយទាប ខេត្តស្វាយរៀង ។ ប្រភពដដែលបានបន្តទៀតថា ប្រពន្ធរបស់គាត់បានប្រាប់គាត់ថា ឈឺក្បាលពីបីថ្ងៃមកហើយ មិនដឹងមូលហេតុអ្វីនោះទេ តែដោយសារគាត់គិតថា ប្រហែលជាមិនមានអ្វីធ្ងន់ធ្ងរទេនោះប្រពន្ធរបស់គាត់នៅតែបន្តមកធ្វើការដូចធម្មតាដោយមិនបានដាក់ពាក្យសុំច្បាប់នោះឡើយ ។
មុនពេលកើតហេតុ ប្រពន្ធរបស់គាត់កំពុងធ្វើការសុខៗស្រាប់តែនាងដួលសន្លប់តែម្តងទៅ ហើយខាងរោងចក្រក៏បានទំនាក់ទំនងទៅខាងរថយន្តសង្គ្រោះរបស់មន្ទីពេទ្យជីភូមកដឹកភ្លាមៗផងដែរ ។ ដោយឡែកកម្មករម្នាក់ផ្សេងទៀតមានឈ្មោះ សោម សាខន ភេទប្រុស អាយុ២៨ឆ្នាំ មុខរបរកម្មកររោងចក្រ ANG មានទីលំនៅក្នុងភូមិខ្ជាយ ឃុំរមែងថ្កោល ស្រុកស្វាយទាប ខេត្តស្វាយរៀង ត្រូវបានរថយន្តសង្គ្រោះខាងមន្ទីរពេទ្យជីភូដឹកមកសង្គ្រោះដែរ ដោយសារតែនៅសុខៗគាត់ក៏ចុកពោះដោយមិនដឹងមូលហេតុ ។
គួររំលឹកថា កម្មករ កម្មការនីតែងតែដួលសន្លប់ជាញឹកញាប់នៅតាមបណ្តារោងចក្រនៅក្នុងខេត្តស្វាយរៀង ភាគច្រើនបណ្តាលមកពីកត្តាជាច្រើនដូចជាការសម្រាកមិនគ្រប់គ្រាន់ បរិភោគអាហារមិនមានជីវជាតិ និងកង្វះអនាម័យ ព្រមទាំងកត្តាបរិស្ថានមួយចំនួនផងដែរ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ