រាជធានីភ្នំពេញ៖ ឯកអគ្គរដ្ឋទូតនៃស្ថានទូតអូស្ត្រាលី បានបញ្ជាក់ថា កម្ពុជា ជាគោលដៅទេសចរណ៍មុនគេដែលទេសចរខ្លួនត្រូវមកកម្សាន្តនៅពេលចប់ជំងឺកូវីដ១៩ ។ ការបញ្ជាក់នេះ បានធ្វើឡើងនៅក្នុងជំនួបរវាងឯកអគ្គរដ្ឋទូតអូស្ត្រាលីជាមួយលោកថោង ខុន រដ្ឋមន្ត្រីក្រសួងទេសចរណ៍កាលពីថ្ងៃទី២៦ម្សិលមិញនេះ។
លោក ប៉ាប្លូ ជីហូកាង ឯកអគ្គរដ្ឋទូតអូស្ត្រាលីប្រចាំកម្ពុជាបានអោយដឹងថា លោកបានទៅទស្សនានៅតំបន់មួយចំនួនក្នុងប្រទេសកម្ពុជា ដូចជាសៀមរាប តំបន់អង្គរ ឆ្នេរសមុទ្រ ព្រះសីហនុ កំពត កែប កោះកុង និងខេត្តមួយចំនួនទៀត មានបាត់ដំបង និងភូមិភាគឦសានឃើញថាមានទេសភាពស្រស់ស្អាតិ និងប្លែកភ្នែកដែលជាទីកន្លែងទាក់ទាញសម្រាប់ភ្ញៀវទេសចរនានា ជាពិសេសនោះអូស្ត្រាលីផងដែរ ។លោកបន្តថា ក្នុងនាមរដ្ឋាភិបាលអូស្ត្រាលី លោកនឹងផ្សព្វផ្សាយអំពីព័ត៌មានទេសចរណ៍ ទិដ្ឋភាព និងទេសភាពនានាក្នុងប្រទេសកម្ពុជា ទៅកាន់ភ្ញៀវទេសចរអូស្ត្រាលី និងជំរុញអោយភ្ញៀវទេសចរអូស្ត្រាលីមកកម្សាន្តនៅក្នុងប្រទេសកម្ពុជា នៅពេលចប់ជំងឺកូវីដ ១៩ ។
លោកបន្តទៀតថា នៅក្នុងពេលពិភពលោកព្រួយបារម្ភពីកូវីដ១៩ កម្ពុជាបានធ្វើរឿងមួយដែលធ្វើអោយពិភពលោកកោតស្ងប់ស្ងែងគឺការសង្គ្រោះអ្នកដំណើរលើកប៉ាល់ Westerdam ក្នុងនោះក៏មានភ្ញៀវទេសចរជនជាតិអូស្ត្រាលីផងដែរ ដែលធ្វើអោយភ្ញៀវអូស្ត្រាលីមិនអាចភ្លេចកិត្តិនាមមនុស្សធម៌របស់កម្ពុជា ជាពិសេសប្រមុខរាជរដ្ឋាភិបាលសម្ដេចតេជោបាននោះឡើយ ហើយក៏សង្ឃឹមថាពួកគេនឹងមកកម្ពុជាផងដែរ នៅពេលចប់កូវីដ១៩នេះ ។
លោក ថោង ខុន រដ្ឋមន្ត្រីក្រសួងទេសចរណ៍ ក៏បានស្នើឱ្យមានការផ្សព្វផ្សាយបន្ថែមកាន់តែខ្លាំង ពីគោលដៅទេសចរណ៍នៅកម្ពុជាទៅកាន់ប្រជាពលរដ្ឋ និងភ្ញៀវទេសចរនៅប្រទេសអូស្ត្រាលី ខណៈកម្ពុជាកំពុងខិតខំអភិវឌ្ឍន៍គោលដៅទេសចរណ៍របស់ខ្លួនយ៉ាងយកចិត្តទុកដាក់ និងបង្កើនស្ដង់ដាការពារសុវត្ថិភាពសុខភាពកាន់តែមានប្រសិទ្ធភាពជាងមុន ត្រៀមទទួលវត្តមានភ្ញៀវទេសចរដែលនឹងត្រលប់មកទស្សនានៅពេលក្រោយវិបត្តិជំងឺកូវីដនេះ។
លោក ក៏បានស្នើសុំឱ្យរដ្ឋាភិបាលអូស្ត្រាលីជួយផ្ដល់អាហារូបករណ៍ដល់និស្សិតកម្ពុជាបន្តទៀត។ បច្ចុប្បន្នមាននិស្សិតកម្ពុជាប្រមាណ ៣,៥០០នាក់ កំពុងសិក្សានៅប្រទេសអូស្ត្រាលីដោយទទួលបានអាហារូបករណ៍ពីរដ្ឋាភិបាលក្រុងកង់បេរ៉ា ក្នុងនោះក៏មានមុខវិជ្ជាទេសចរណ៍ផងដែរ។
លោក ក៏បានស្នើទៅកាន់រដ្ឋាភិបាលអូស្ត្រាលីតាមរយៈលោកឯកអគ្គរដ្ឋទូត Pablo Chiho Kang( ប៉ាប្លូ ជីហូកាង ) ជួយពន្លឿនការរៀបចំឱ្យមានជើងហោះហើរត្រង់ កម្ពុជា-អូស្ត្រាលី ដើម្បីជំរុញឱ្យមានកំណើនទេសចរកាន់តែច្រើន ខណៈចំនួនភ្ញៀវទេសចរពីអូស្ត្រាលីមកកម្ពុជាមានការកើនឡើងគួរឱ្យកត់សម្គាល់ ជាក់ស្ដែងនៅឆ្នាំ២០១៩ មានចំនួនប្រមាណ១២ម៉ឺននាក់ ។
កន្លងមក ដើម្បីធ្វើដំណើរទៅមកកម្ពុជា-អូស្ត្រាលី ភ្ញៀវទេសចរ និងអ្នកដំណើរត្រូវឆ្លងកាត់ប្រទេសថៃ ឬប្រទេសសិង្ហបុរីមួយដំណាក់សិន មុនចូលមកដល់ប្រទេសកម្ពុជា ឬទៅដល់ប្រទេសអូស្ត្រាលី ៕
ចែករំលែកព័តមាននេះ