ខេត្តសៀមរាប ៖ ទីបំផុត សមត្ថកិច្ចនគរបាលបានធ្វើការបញ្ជូនមនុស្សស្រី-ប្រុស៦នាក់ក្នុងចំណោមមេការទាំង៩នាក់របស់ក្លឹបខារ៉ាអូខេយីហោ «វ៉នឌើរ» (WONDER) ដែលមានលាក់បំពួនសេវារួមភេទទៅតុលាការ ដើម្បីចាត់ការតាមផ្លូវច្បាប់ នៅថ្ងៃទី២៣ មីនា បន្ទាប់ពីបានបើកប្រតិបត្ដិការបង្រ្កាបកាលពីយប់ថ្ងៃទី២២ មីនា កន្លងមក។
គួរបញ្ជាក់ថា កាលពីវេលាម៉ោង៨និង៣០ នាទីយប់ថ្ងៃទី២២ ខែមីនា ឆ្នាំ២០១១ ទីតាំង ខារ៉ាអូខេវ៉នឌើរដែលលួចបំពួនសេវាផ្លូវភេទ ស្ថិតនៅតាមបណ្ដោយផ្លូវលោកតាណឺយ ក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប បានត្រូវសមត្ថកិច្ចនគរបាលដឹកនាំដោយព្រះរាជអាជ្ញាអមសាលាដំបូងខេត្ដ លោកទី សុវិនថាល់ និងលោកអ៊ុំ អមរា ស្នងការរងនគរបាលខេត្ដចុះទៅបង្ក្រាប។ នៅក្នុងប្រតិបត្ដិការនោះ ក្រុមនគរបាលប្រមូលបាននារីបំរើសេវានៅក្នុងក្លឹបនេះ ចំនួន៧២នាក់ និងមេការប្រុស-ស្រីចំនួន៩នាក់ ប៉ុន្ដែថៅកែក្លឹបនេះពុំត្រូវបានឃាត់ខ្លួនទេ ដោយសារតែក្នុងពេលប្រតិបត្ដិការគេពុំឃើញមានវត្ដមានថៅកែនៅទីនោះ ។
ស្នងការរងនគរបាលខេត្ដ ទទួលបន្ទុកការិយាល័យកណ្ដាលប្រឆាំងបទល្មើសលោកវរសេនីយ៍ឯក អ៊ុំ អមរា បានថ្លែងឱ្យដឹងថា នារីបំរើសេវាទាំង៧២នាក់ដែលប្រមូលបាននោះ ក្រោយពីបង្ក្រាបយើងបានបញ្ជូនទៅធ្វើការសាកសួរ រួចហើយប្រគល់ទៅឱ្យមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ដ ដើម្បីធ្វើការអប់រំ និងស្វែងរកការបណ្ដុះបណ្ដាលវិជ្ជាជីវៈដល់ពួកគេ ។ ដោយឡែកចំពោះមេការស្រី-ប្រុសចំនួន៦នាក់ក្នុងចំណោម៩នាក់ ត្រូវបានកសាងសំណុំរឿងបញ្ជូនទៅសាលាដំបូងខេត្ដ ដើម្បីចាត់ការតាមច្បាប់ពាក់ព័ន្ធនឹងបទល្មើសសញ្ចារកម្ម។
លោកស្នងការរងបន្ដថា ការសម្រេចបញ្ជូនមេការទាំង៦នាក់ដែលក្នុងនោះមានស្រី៥នាក់ ទៅតុលាការនេះ ធ្វើឡើងបន្ទាប់ពីនគរបាលបានរកឃើញថា ពួកគេជាប់ព័ន្ធនឹងការទទួលផលពីអំពើពេស្យាចារ។ ចំណែកថៅកែក្លឹបខារ៉ាអូខេនេះ ក៏ត្រូវបានកសាងសំណុំរឿងបញ្ជូនទៅសាលាដំបូងដែរ ប៉ុន្ដែចំពោះអត្ដសញ្ញាណថៅកែក្លឹបនេះ លោកពុំបានបញ្ជាក់ឱ្យដឹងទេ។
មន្ដ្រីមន្ទីរសង្គមកិច្ចអតីតយុទ្ធជន និងយុវនីតិសម្បទាមួយរូបសុំមិនបញ្ចេញឈ្មោះបានថ្លែងថា នារីបម្រើការនៅក្លឹបវ៉នឌើរទាំង៧២នាក់នេះត្រូវបានអង្គការ សមាគមមួយចំនួនទទួលយកទៅបណ្ដុះបណ្ដាលហើយ ក្នុងនោះអង្គការជួយស្ដ្រីមានវិបត្ដ (CWCC) ទទួលយកចំនួន៥១នាក់ អង្គការបេសកកម្មដើម្បីយុត្ដិធម៌អន្ដរជាតិ (ITM) ទទួលយកនារីដែលមានអាយុក្រោម១៨ឆ្នាំចំនួន១៩នាក់ និងអង្គការពិភពលោកនៃក្ដីសង្ឃឹមទទួលយក២នាក់។ ពាក់ព័ន្ធនឹងស្ដ្រី១៩នាក់ដែលមិនទាន់គ្រប់អាយុ១៨ឆ្នាំនេះ កញ្ញា សុភាព បុគ្គលិកអង្គការបេសកកម្មដើម្បីយុត្ដិធម៌អន្ដរជាតិបានឱ្យដឹងថា អង្គការបានទទួលយកស្ដ្រីដែលមានអាយុក្រោម១៨ឆ្នាំ ដែលបម្រើការនៅក្នុងក្លឹបខារ៉ាអូខេវ៉នឌើរចំនួន១៩នាក់ប៉ុន្ដែបច្ចុប្បន្នមាន២នាក់ត្រូវបានឪពុកម្ដាយធានាយកទៅវិញ។
លោកវរសេនីយ៍ទោ ស៊ុន ប៊ុនថង នាយការិយាល័យប្រឆាំងការជួញដូរមនុស្ស និងការពារអនីតិជន បានថ្លែងកាលពីរសៀលថ្ងៃទី២៣មីនា ថា យើងនៅមិនទាន់ដឹងថាអ្នកណាមួយពិតប្រាកដជាថៅកែក្លឹបនេះនៅឡើយគ្រាន់តែដឹងថា ក្លឹបខារ៉ាអូខេ«វ៉នឌើរ» នេះមានម្ចាស់ភាគហ៊ុនចំនួនបីរួមគ្នា គឺជនជាតិខ្មែរ-បារាំង- ជប៉ុន ដែលទើបតែបន្ដដំណើរការពីក្លឹបមុនឈ្មោះ«អិុចអូ» បានតែប៉ុន្មានខែប៉ុណ្ណោះ។ នៅពេលប្រតិបត្ដិការបង្ក្រាប សមត្ថកិច្ចបានធ្វើការឆែកឆេរនៅតាមបន្ទប់រកឃើញដៃគូររួមសិចចំនួនពីរគូ និងស្រោមអនាម័យប្រើរួច និងមិនទាន់ប្រើមួយចំនួនទៀត ។
លោកទី សុវិនថាល់ ព្រះរាជអាជា្ញអមសាលាដំបូងខេត្តដែលដឹកនាំកម្លាំងធ្វើប្រតិបត្ដិការឆ្មក់ចូលបង្ក្រាបក្លឹបខារ៉ាអូខេយីហោ«វ៉នឌើរ» មានប្រសាសន៍ថា តាមរយៈការឆែកឆេរអស់ជាច្រើនម៉ោង សមត្ថកិច្ចបានរកឃើញភស្ដុតាងគ្រប់គ្រាន់សំរាប់បើកការចោទប្រកាន់ទៅតាមផ្លូវច្បាប់ គឺមានដៃគូរួមភេទចំនួនពីរគូត្រូវបានចាប់ឃាត់ខ្លួននៅក្នុងបន្ទប់នៃអគារខារ៉ាអូខេនេះ ហើយពួកគេបានសារភាពថា ពិតជាបានរួមភេទមែន។ លោកបានបន្ដថា ករណីនេះមិនអាចដោះស្រាយក្រៅប្រពន្ធ័ច្បាប់បានទេ មន្ដ្រីនគរបាលយុត្ដិធម៌ត្រូវតែរៀបចំសំណុំរឿងបញ្ជូនទៅតុលាការ ដើម្បីចាត់ការទៅតាមច្បាប់ស្ដីពីការបង្ក្រាបអំពើជួញដូរមនុស្ស និងអំពើអាជីវកម្មផ្លូវភេទ គឺច្បាប់ត្រូវតែអនុវត្ដឱ្យស្មើភាពគ្នាមិនថាអ្នកមាន អ្នកក្រ អ្នកមានអំណាចទេ អ្នកណាក៏ដោយឱ្យតែប្រព្រឹត្តខុសត្រូវតែយកច្បាប់ជាអ្នកវិនិច្ឆ័យ៕
ចែករំលែកព័តមាននេះ