ក្រុងប៉ោយប៉ែត ៖ ពិតជាគួរឱ្យសង្វែកពីជីវិតយុវជនម្នាក់ ដែលជាអ្នកមានចំណេះដឹងគ្រាន់បើដែរ បែរជាធ្លាក់ខ្លួនពិការ ដោយសារគ្រោះថ្នាក់ចរាចរណ៍ក្នុងទឹកដីសៀម បានមកសុំជ្រកអាស្រ័យដោយបាយបាត្រ ព្រោះតែគ្មានប្រាក់ត្រឡប់ទៅស្រុកភូមិវិញ ក្រោយពេលចេញពីទឹកដីសៀមនោះ ។ ទោះបីជាបែបណា ក្រោយពីព័ត៌មានបានលិចឮដល់លោកអនុសេនីយ៍ឯក អ៊ុំ សុផល អធិការនគរបាលក្រុង លោកក៏បានជួយថវិកាផ្ទាល់ខ្លួនចំនួន១៥ម៉ឺនរៀល ដល់យុវជនកំសត់រូបនេះ ដើម្បីបានធ្វើដំណើរទៅស្រុកភូមិរបស់គេវិញ ក្នុងនាមអាណិតអាសូរឈាមជ័រខ្មែរដូចគ្នា ។
យុវជនរូបនេះមានឈ្មោះប៉ែន សុភ័ក្រ អាយុ២៧ឆ្នាំ មានទីលំនៅភូមិភ្នំសំពៅ ឃុំភ្នំសំពៅ ស្រុកបាណន់ ខេត្តបាត់ដំបង ។ យុវជនពិការនេះគឺស្វិតដៃស្តាំម្ខាង និងបាក់ឆ្អឹងដងស្លាបប្រចៀវខាងស្តាំ និងបាក់ភ្លៅខាងស្តាំ ប៉ុន្តែបានជាសះស្បើយវិញហើយ ។ យុវជនរូបនេះបានរងគ្រោះដោយចរាចរណ៍នៅចំណុចព្រំប្រទល់ខេត្តចាន់បូរី និងខេត្តត្រាត ប្រទេសសៀម ។ គេបានរៀបរាប់ថា មុនមានគ្រោះថ្នាក់ចរាចរណ៍ក្នុងដីសៀមនោះ គឺខ្លួនត្រូវបានតម្រួតសៀមម្នាក់យកចេញពីទឹកដីខ្មែរ តាមចក្រឡែម ខេត្តបាត់ដំបង ទៅធ្វើការជាអ្នកបកប្រែនៅកោះមួយ ឈ្មោះកោះម៉ាក ដែលជាកន្លែងកំសាន្តឱ្យធ្វើការនៅទីនោះបានចំនួន៨ខែ ក៏ត្រូវរថយន្តបុកពីក្រោយ ខណៈកំពុងជិះម៉ូតូទៅធ្វើការ ។
យុវជននេះបន្តថា ក្រោយគ្រោះថ្នាក់ចរាចរណ៍ ខ្លួនត្រូវគេយកទៅសង្គ្រោះនៅមន្ទីរពេទ្យខេត្តត្រាត ចំនួនជិត២ខែទើបជា ។ ក្រោយពីបានជាសះស្បើយហើយ ក៏លួចរត់ចេញពីពេទ្យនោះមកស្រុកខ្មែរ ដោយខ្លួនឯង តាមច្រកទ្វារប៉ោយប៉ែត លុះមកដល់ប៉ោយប៉ែត ដោយគ្មានសាច់ញាតិនឹងគ្មានថវិកាទៅស្រុកវិញ ក៏ដាច់ចិត្តសុំលោកស្នាក់នៅនឹងសុំបាយវត្តហូបបណ្តោះអាសន្នទំរាំមានឱកាស ។ សុភ័ក្រ ប្រាប់ទៀតថា ខ្លួនធ្វើការនៅកោះម៉ាកស្រុកសៀមនោះដូរឈ្មោះខេវិន ហៅ ហេង ហើយពេលព្យាបាលជំងឺនៅក្នុងមន្ទីរពេទ្យនោះគ្មានអ្នកមើលថែទាំឡើយក្រៅពីក្រុមគ្រូពេទ្យ ឯក្រុមហ៊ុនដែលខ្លួនធ្វើការជាមួយក៏ពុំដែលយកចិត្តទុកដាក់ឡើយ ។
សុភ័ក្រហៅខេវិន ឬហេង បានប្រាប់បន្តថា ការយកខ្លួនទៅធ្វើការនៅស្រុកសៀមនោះ គឹតម្រួតនោះធ្វើប័ណ្ណសំគាល់ខ្លួនដែលធ្វើការនៅកន្លែងកំសាន្តឱ្យ ហើយពេលដើរទៅណាមកណាគ្មាននរណាចាប់ឡើយ ។ ការទទួលគ្រោះថ្នាក់ចរាចរណ៍នេះ គឺគ្មានបានទទួលសំណងអ្វី សូម្បីតែមួយបាតលុយសៀម ព្រោះក្រោយហេតុការកើតឡើង ខ្លួនបានសន្លប់នៅក្នុងមន្ទីរពេទ្យ ។ ទោះបីជាបែបណា យុវជននេះពុំបានលំអិតប្រាប់ពីកាលបរិច្ឆេទនៃថ្ងៃដែលខ្លួនគ្រោះថ្នាក់ចរាចរណ៍នោះទេ ដោយគ្រាន់តែប្រាប់ថា ការមកដេកហូបបាយវត្តបែបនេះ អស់ចំនួន៣ថ្ងៃហើយ ៕
ចែករំលែកព័តមាននេះ