ប្រធានាធិបតីយេម៉ែន លោកអាលីអាប់ឌុលឡាហ៍ សាឡេហ៍ កាលពីថ្ងៃទី៥ មីនា កន្លងមក បានអះអាងបញ្ជាក់សាជាថ្មីម្តងទៀតថា រូបលោកនឹងនៅបន្តតំណែងរហូតដល់អាណត្តិរបស់លោកផុតនៅឆ្នាំ២០១៣ ហើយលោកបានច្រានចោលការទាមទារឱ្យមានការធ្វើអន្តរកាលរបស់ក្រុមប្រឆាំង ដើម្បីឱ្យលោកចុះចេញពី តំណែងនៅឆ្នាំ២០១១ ។ នេះបើតាមការរាយការណ៍ឱ្យដឹងដោយទីភ្នាក់ងារព័ត៌មានផ្លូវការ Saba របស់យេម៉ែន ។
ទីភ្នាក់ងារព័ត៌មាន Saba បានដកស្រង់សម្តីប្រភពផ្លូវការនៅខុទ្ទកាល័យប្រធានាធិបតីដែលនិយាយថា ចំណុចទី៤នៃសំណើរបស់ក្រុមប្រឆាំងដែលទាមទារឱ្យលោកសាឡេហ៍ ចុះចេញពីតំណែងនៅឆ្នាំ២០១១ ផ្ទុយទៅនឹងចំណុចទី៣ នៅក្នុងសំណើនេះ ដែលចែងថា ការសម្រេចបានសុខសន្តិភាព ការធ្វើអន្តរកាលអំណាចដែលផ្អែកលើការប្តេជ្ញាចិត្តរបស់លោកប្រធានាធិបតីសាឡេហ៍ ដែលថា រូបលោកនឹងមិនកាន់អំណាចបន្ត ក្រោយពីអាណត្តិរបស់លោកត្រូវផុតនៅឆ្នាំ២០១៣ ឬមិនប្រគល់អំណាចទៅឱ្យកូនប្រុសរបស់លោកឡើយ ។
ប្រភពដដែលឱ្យដឹងទៀតថា សំណើផែនទីនាំផ្លូវដែលមាន៥ចំណុចរបស់ក្រុមប្រឆាំងមិនច្បាស់លាស់ឡើយ ហើយការបកស្រាយតាមទំនើងចិត្តរបស់ខ្លួន ជាការប៉ុនប៉ងធ្វើរដ្ឋប្រហារមួយប្រឆាំងលទ្ធិប្រជាធិបតេយ្យ និងរដ្ឋធម្មនុញ្ញរបស់យេម៉ែន ដោយបន្ថែមទៀតថា ការប៉ុនប៉ងរំលោភបំពានរដ្ឋធម្មនុញ្ញមិនអាចទទួលយកបានទេ ។
ការឆ្លើយតបជាផ្លូវការនេះពីខាងភាគីលោកសាឡេហ៍ ធ្វើឡើងរយៈពេល៣ថ្ងៃ ក្រោយពីក្រុមប្រឆាំងលើកឡើងពីការបញ្ចប់ការកាន់អំណាចរយៈពេល៣៣ឆ្នាំ របស់លោកសាឡេហ៍ នៅឆ្នាំ២០១១ តាមរយៈការរៀបចំការបោះឆ្នោតប្រធានាធិបតីដែលលោកសាឡេហ៍ នឹងមិនចូលរួម ប៉ុន្តែធ្វើជាអ្នកត្រួតពិនិត្យ ៕
ចែករំលែកព័តមាននេះ