ខេត្តកោះកុង ៖ កាលពីព្រឹកថ្ងៃទី១៣ មីនា លោកនាយឧត្តមសេនីយ៍សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសបានចុះសំណេះសំណាល និងសួរសុខទុក្ខដល់កងកម្លាំង ប្រដាប់អាវុធទាំង៣ ដែលកំពុងឈរជើង ការពារខ្សែក្រវាត់ព្រំដែននៅខេត្តកោះកុង ដែលពិធីនេះបានធ្វើឡើងនៅក្នុងវរលេខ១ចំណុះតំបន់ប្រតិបត្តិការសឹកខេត្តកោះកុង ដោយមានការចូលរួមពីលោកប៊ុន លើត អភិបាលខេត្តកោះកុង លោកឧត្តមសេនីយ៍ឯកអ៊ុង សំខាន់ មេបញ្ជាការរងកងយោធពលខេមរភូមិន្ទ និងជាប្រធានគណៈបញ្ជាការឯកភាពទិសភូមិភាគ៣ លោកឧត្តមសេនីយ៍ទោ កែវ សាមួន មេបញ្ជាការភូមិភាគ៣ ព្រមទាំងមានការចូលរួមពីប្រតិភូអមដំណើរ និងនាយទាហាន ពលទាហាន ចំណុះឱ្យតំបន់ប្រតិបត្តិការសឹកកោះកុងយ៉ាងច្រើនកុះករ។
បន្ទាប់ពីការសំណេះសំណាល និងសួរសុខទុក្ខ លោកនាយឧត្តមសេនីយ៍សៅ សុខា ក៏បាននាំយកនូវអំណោយនិងថវិកាមួយចំនួនទៅចែកជូនដល់អង្គភាព ឈរជើងដែលក្នុងនោះ ១-តំបន់ប្រតិបត្តិការសឹកកោះកុង មានមីយើងចំនួន៤០០កេស ងៀតត្រីកញ្ចុះចំនួន៨០០គីឡូក្រាម ត្រីឆ្អើរចំនួន១០០០ចង្កាក់ ត្រីខកំប៉ុងចំនួន៣០កេស ទឹកស៊ីអ៊ីវចំនួន៤០០យួរ ថវិកាចំនួន២០លានរៀល ២-អង្គភាពជើងទឹកកងពលតូចលេខ៣១ មានមីយើងចំនួន១០០កេស ត្រីងៀតកញ្ចុះ១០០គីឡូក្រាម ត្រីឆ្អើរ២៥០ចង្កាក់ ត្រីខកំប៉ុង១០កេស ទឹកស៊ីអ៊ីវ១០០យួរ និងថវិកា៥លានរៀល ៣-អង្គភាពនគរបាលការពារព្រំដែន មានមីយើង១០០កេស ងៀតត្រីកញ្ចុះ១០០គីឡូក្រាម ត្រីឆ្អើរ២៥០ចង្កាក់ ត្រីខកំប៉ុង១០០កេស ទឹកស៊ីអ៊ីវ១០០យួរ ថវិកា៥លានរៀល ៤-អគ្គបញ្ជាការប្រចាំទិសយោធភូមិភាគ៣មាន ត្រីងៀតចំនួន១០០គីឡូក្រាម សាច់ក្រក១០០គីឡូក្រាម ថវិកា១០លានរៀល ៥-បញ្ជាការដ្ឋានអាវុធហត្ថកោះកុង ថវិកា៤០លានរៀល ៦-កងពលលេខ១១ ថវិកា៥លានរៀល ដែលអំណោយ និងថវិកាទាំងនេះមានចំនួនសរុបមានមីយើងចំនួន៦០០កេស ត្រីងៀត កញ្ចុះចំនួន១តោន ត្រីងៀតរ៉ស់ចំនួន១០០គីឡូក្រាម ត្រីឆ្អើរចំនួន១.៥០០ចង្កាក់ សាច់ក្រកចំនួន១០០គីឡូក្រាម ត្រីខកំប៉ុងចំនួន៥០កេស ទឹកស៊ីអ៊ីវចំនួន៦០០យួរ និងថវិកាចំនួន៨០លានរៀល។
លោកនាយឧត្តមសេនីយ៍សៅ សុខា ក៏បានមានមតិផ្តាំផ្ញើផងដែរថា សុំឱ្យកងកម្លាំងទាំងអស់លើកកំពស់ស្មារតីក្នុងកិច្ចប្រតិបត្តិការការពារខ្សែបន្ទាត់ព្រំដែនឱ្យកាន់តែប្រសើរឡើងទៀត ពីព្រោះសព្វថ្ងៃកម្លាំងនៅសមរភូមិមុខ សមរភូមិក្រោយ ក៏បានស្ថិតនៅជាមួយគ្នារហូតជាក់ស្តែងដូចជាអំណោយដែលបានយកមកចែកជូននាពេលនេះ គឺជាទឹកចិត្តរបស់សប្បុរសជនដែលនៅខាងក្រោយបានផ្តល់ជូនតាមរយៈរូបលោក ដើម្បីយកមកចែកជូនដល់កងកម្លាំងយើង ។ លោកនាយឧត្តមសេនីយ៍បានលើកសរសើរចំពោះកងកម្លាំងទាំងអស់នៃតំបន់ប្រតិបត្តិការសឹកកោះកុង ក៏ដូចជាកម្លាំងចំណុះឱ្យទិសភូមិភាគ៣ទាំងមូលដែលបានប្រមូលផ្តុំឈរជើងការពារបូរណភាពទឹកដីមិនឱ្យបាត់បង់ សូម្បីតែមួយមីល្លីម៉ែត្រ ជាពិសេសបានផ្តល់ការទំនាក់ទំនងយ៉ាងកក់ក្តៅចំពោះភាគីថៃ និងរក្សាភាពស្ងប់ស្ងាត់ សុវត្ថិភាព ជូនប្រជាពលរដ្ឋក៏ដូចជាប្រទេសជាតិទាំងមូលពោរពេញដោយសន្តិភាព នៅតាមខ្សែបន្ទាត់ព្រំដែនរវាងខេត្តទាំងពីរកោះកុង-ត្រាត ៕
ចែករំលែកព័តមាននេះ