ខេត្តព្រះវិហារ ៖ អតីតដីព្រៃនៅតាមដងផ្លូវជាតិលេខ៦២ ពីចំណុចផ្លូវបំបែកស្រុកជាំក្សាន្ត ចូលទៅកាន់ភូមិស្រឯម ឃុំកន្ទួត មានចម្ងាយប្រមាណ៨គីឡូម៉ែត្រ កាលពីឆ្នាំ២០០៦ កន្លងទៅនេះ ខណ្ឌរដ្ឋបាលព្រៃឈើខេត្ត និងផ្នែករដ្ឋបាលព្រៃឈើជាំក្សាន្ត ជាមួយអាជ្ញាធរខេត្ត បានចេញដីកាលេខ៣២ ដើម្បីរុះរើលំនៅឋានអនាធិបតេយ្យដែលបានសាងសង់នៅលើដីព្រៃឈើដែលរដ្ឋាភិបាលបានហាមឃាត់នៅតាមដងផ្លូវក្នុងតំបន់នោះ ដោយបានបណ្តេញប្រជាពលរដ្ឋឱ្យចាកចេញ ដោយគ្មានលក្ខខណ្ឌ។
ផ្ទុយទៅវិញពេលនេះ មានការភ្ញាក់ផ្អើលយ៉ាងខ្លាំង ខណៈរាជរដ្ឋាភិបាលបានតម្រូវឱ្យអាជ្ញាធរខេត្តរៀបចំដីទំនេរនៅតាមដងផ្លូវជាតិលេខ៦២ ដែលមានទំហំក្បាលដីជាង២០០ម៉ែត្រ និងបណ្តោយជាង១០០ម៉ែត្រ ឱ្យទៅអគ្គភស្តុភារ ដើម្បីសាងសង់មន្ទីរពេទ្យដ៏ធំមួយនៅក្នុងតំបន់ភូមិស្រឯម តាមបណ្តោយផ្លូវជាតិលេខ៦២ ស្រាប់តែត្រូវបានគេឱ្យដឹងថា មានជនដែលអះអាងថា ជាម្ចាស់ដីមកបញ្ជាក់ថាពួកគេជាម្ចាស់ដីនៅក្នុងតំបន់នោះទៅវិញ ។ ពួកគេបានអះអាងទៀតថា ដីពួកគេបានទិញពីមន្ត្រីរដ្ឋបាលព្រៃឈើស្រុកជាំក្សាន្ត និងថែមទាំងមានការចេញប័ណ្ណសំគាល់កាន់កាប់ដីធ្លីដែលភូមិបាលស្រុកជាអ្នកវាស់វែងនិងរត់ការចេញប័ណ្ណឱ្យទៀតផង ។
ជុំវិញការទាមទារ និងតវ៉ាពីបណ្តាឈ្មួញម្ចាស់ដីទាំងអស់ខាងលើ ត្រូវបានអាជ្ញាធរខេត្តព្រះវិហារ បដិសេធចោលមិនទទួលដោះស្រាយដោយសម្រេចយកដីទាំងអស់ខាងលើប្រគល់ឱ្យអគ្គនាយកដ្ឋានភស្តុភារ និងហិរញ្ញវត្ថុប្រចាំសមរភូមិ ធ្វើការឈូសឆាយជាបន្ទាន់ តាមចំណារដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា ដើម្បីសាងសង់មន្ទីរពេទ្យធំមួយដើម្បីបម្រើដល់សុខភាពប្រជាពលរដ្ឋដែលរស់នៅក្នុងតំបន់ដាច់ស្រយាលនេះ និងបម្រើដល់កងកម្លាំងទាំងអស់ដែលឈរជើងការពារបូរណភាពទឹកដីតាមបណ្តោយខ្សែបន្ទាត់ព្រំដែនក្នុងតំបន់នោះផង ដោយមិនបារម្ភក្នុងការដឹកជញ្ជូនទៅព្យាបាលនៅក្រុងសៀមរាប ឬក្រុងព្រះវិហារក្នុងពេលជួបបញ្ហាម្តងៗ ។
សូមបញ្ជាក់ថា មន្ទីរពេទ្យដែលគ្រោង សាងសង់តាមបណ្តោយផ្លូវជាតិលេខ៦២ ស្ថិតក្នុងភូមិស្រឯម នេះ តាមការបញ្ជាក់ពីលោក ស ថាវី អភិបាលរងខេត្ត និងលោកឧត្តមសេនីយ៍ ស៊ិន ស៊ីណាត តំណាងអគ្គនាយកដ្ឋានភស្តុភារហិរញ្ញវត្ថុឱ្យដឹងថា មន្ទីរពេទ្យភូមិស្រឯមខាងលើនេះគឺទំហំធំ មានកម្ពស់បីជាន់ បើគិតជាទឹកប្រាក់មានតម្លៃដល់ទៅរាប់លានដុល្លារអាមេរិក ។ ឯចំណែកមន្ត្រីជាអ្នកអនុវត្តច្បាប់របស់រាជរដ្ឋាភិបាលដែលមានមន្ត្រីព្រៃឈើស្រុកជាំក្សាន្ត និងមន្ត្រីសុរិយាដីស្រុកជាំក្សាន្តវិញ ដែលតួនាទីខ្លួនជាអ្នកការពារសម្បត្តិរដ្ឋពេលនេះបានបែកពាងប្រហុកហើយ ធ្វើឱ្យមជ្ឈដ្ឋានក្នុងតំបន់នោះចោទថា បែរជានាំគ្នាឃុបឃិតយកដីទៅលក់ និងធ្វើប័ណ្ណឱ្យឈ្មួញកាន់កាប់ដីរដ្ឋខុសច្បាប់ទៅវិញ ។
លោកវង្ស ពិសិដ្ឋ មន្ត្រីរដ្ឋបាលព្រៃឈើជាំក្សាន្ត បានមានប្រតិកម្មយ៉ាងខ្លាំង ដោយប្រើពាក្យម្តងថា ជាដីរក្សាទុកធ្វើស្នាក់ការផ្នែកព្រៃឈើ ម្តងឆ្លើយថា ជាដីរបស់បងប្អូនដែលបានកាន់កាប់ជាយូរណាស់មកហើយ ។ លោកវង្ស ពិសិដ្ឋ បានប្រាប់អ្នកសារព័ត៌មានថា លោកគ្មានដីទេ ចង់រដ្ឋយកអីក៏យកចុះ។ ចំណែកលោកប៉ុល ខាំណារ៉េ នាយខណ្ឌរដ្ឋបាលព្រៃឈើខេត្ត បន្ទាប់ពីបានដឹងថា ដីដែលបានដកហូតតាមដីកាលេខ៣២ ទុកជាសម្បត្តិរដ្ឋនេះត្រូវកូនចៅរបស់លោកយកទៅចាត់ចែងនិងលក់ដូរឱ្យឈ្មួញនោះ លោកបានបញ្ជាក់ថា ក្បាលអាណា គឺសក់អាហ្នឹង ដោយរូបលោកមិនទទួលដឹងទេ ។
លោកគង់ សោភ័ណ្ឌ ប្រធានមន្ទីររៀបចំដែនដីខេត្ត ក៏បានបញ្ជាក់ឱ្យដឹងដែរថា ការចុះបញ្ជីដីធ្លីកន្លងទៅ លោកពិតជាបានចុះហត្ថលេខាលើប័ណ្ណសំគាល់កាន់កាប់កម្មសិទ្ធិដីធ្លីជាច្រើនប្រាកដមែននៅក្នុងស្រុកជាំក្សាន្ត ប៉ុន្តែការចុះហត្ថលេខាលើប័ណ្ណសំគាល់កម្មសិទ្ធិដីធ្លីនៅក្នុងស្រុកជាំក្សាន្តទាំងអស់កន្លងទៅ គឺដោយសារផ្អែកទៅលើការស្នើសុំពីលោកវុធ តារា ប្រធានការិយាល័យភូមិបាលស្រុកជាំក្សាន្ត ដែលមានលិខិតស្នាមក្នុងការត្រួតពិនិត្យវាស់វែងគ្រប់គ្រាន់ និងមានដាក់ពាក្យស្នើសុំទើបចេញប័ណ្ណឱ្យ។ ប៉ុន្តែបើរកទៅឃើញថា មានផ្ទុយពីភាពសុចរិតទៅវិញដោយបែរជាយកដីព្រៃឈើ ដីហាមឃាត់ ឬដីរបស់រដ្ឋទៅឱ្យលោកចុះហត្ថលេខាវិញនោះ លោកជាប្រធាននឹងប្តឹងឱ្យចាប់ខ្លួនប្រធានការិយាល័យភូមិបាលស្រុកទៅតុលាការធ្វើការផ្តន្ទាទោសតាមច្បាប់ ។
លោកអ៊ុំ ម៉ារ៉ា អភិបាលខេត្តមានប្រសាសន៍ថា ចំពោះដីធ្លីដែលស្ថិតនៅតាមដងផ្លូវជាតិលេខ៦២ និងស្ថិតនៅក្នុងដីកាលេខ៣២ ដែលបានដកទុកជាសម្បត្តិរដ្ឋ នៅថ្ងៃខាងមុខនេះ បើអាជ្ញាធរខេត្តរកឃើញថា ជនណា ឬមន្ត្រីណាម្នាក់បានយកដីតំបន់នោះទៅប្រើប្រាស់ដោយខុសច្បាប់ ឬលក់ដូរ នឹងត្រូវដកហូតដាក់ជាសម្បត្តិរដ្ឋវិញ ហើយនិងនាំខ្លួនជនទាំងនោះទៅផ្តន្ទាទោសតាមច្បាប់ ។ មហាជនកំពុងរង់ចាំមើលថា តើវាសនាមន្ត្រីដែលយកដីដណ្តើមពីប្រជាជនទៅលក់បែបនេះ មានបាបកម្មដែរឬអត់? ចាំមើលមើល៍! តើគេនាំគ្នាលេងបិទពួនបែបណា?
ចែករំលែកព័តមាននេះ