ខេត្តប៉ៃលិន ៖ កម្លាំងជំនាញការិយាល័យប្រឆាំងគ្រឿងញៀនចំនួន៣នាក់ សហការជាមួយកម្លាំងប៉ុស្តិ៍នគរបាលរដ្ឋបាលស្ទឹងកាច់ចំនួន៣នាក់, កម្លាំងអន្តរាគមន៍ប្រចាំផ្សារព្រំចំនួន៤នាក់, កម្លាំងវរសេនាតូចនគរបាលការពារព្រំដែនគោកលេខ៨២១ ចំនួន៤នាក់ ដឹកនាំដោយលោកវរសេនីយ៍ត្រី ហាក់ សុទ្ធ មេបញ្ជាការរង និងកម្លាំងទាហាន៤នាក់ កម្លាំងប្រជាការពារភូមិចំនួន០២នាក់ បានចុះបង្ក្រាបករណីជួញដូរ និងរក្សាទុកគ្រឿងញៀនមួយកន្លែង ត្រង់ចំណុចរោងប្រក់តង់មួយ បង្កឱ្យមានការភ្ញាក់ផ្អើលខ្លាំងបំផុត ។ហេតុការណ៍នេះ បានកើតឡើងកាលពីវេលាម៉ោង៨ និង៣០នាទី យប់ថ្ងៃទី២១ ឧសភា ក្នុងចំការដំឡូងមីរបស់ឈ្មោះ អុី ហឿន ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា ជនសង្ស័យបានរត់គេចខ្លួនបាត់ស្រមោលដោយបន្សល់ទុកនូវវត្ថុតាងនៅកន្លែងកើតហេតុរួមមាន ៖ ទី១-ម្សៅក្រាមសថ្លា សង្ស័យជាសាធាតុញៀនចំនួន១០កញ្ចប់ ក្នុងនោះកញ្ចប់ធំចំនួន០៦កញ្ចប់និងសម្ភារសម្រាប់ជក់មួយចំនួន ។
ពាក់ព័ន្ធនឹងបញ្ហានេះ បច្ចុប្បន្ន វត្ថុតាងខាងលើត្រូវបានកម្លាំងជំនាញការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តប៉ៃលិនបានធ្វើការដកហូតយកទៅដើម្បីកសាងសំណុំរឿងបញ្ចូនទៅតុលាការ ៕
ចែករំលែកព័តមាននេះ