ខេត្តពោធិ៍សាត់ ៖ តំបន់ព្រៃលិចទឹកជុំវិញបឹងទន្លេសាបជាច្រើនកន្លែង បានត្រូវជនខិលខូចមួយចំនួនលួចឈូសឆាយរុករានពង្រីកបន្ថែមដើម្បីធ្វើស្រែ ទោះបីដឹងថាច្បាប់បានហាមឃាត់ក៏ដោយ ។
ជាក់ស្ដែងនៅខេត្តពោធិ៍សាត់ បន្ទាប់ពីទទួលបានព័ត៌មានពីប្រជាពលរដ្ឋថា មានជនខិលខូចកំ
ពុងរុករានដីនៅចំណុចភូមិសាស្ត្រឃុំអន្សាចំបក់ និងភូមិត្រពាំងរំដេញ ឃុំក្បាលត្រាច ស្រុកក្រ
គរភ្លាម នាថ្ងៃទី២០ ខែឧសភា ឆ្នាំ២០២០ លោក ចេង ឡៃ អភិបាលរង តំណាងឯកឧត្តមអភិ
បាលខេត្ត ដោយមានការចូលរួមពីលោកអភិបាលរងស្រុក មន្ត្រីរដ្ឋបាលជលផល បរិស្ថាន និងលោកមេភូមិ បានទៅពិនិត្យមើលជាបន្ទាន់ដើម្បីមានវិធានការនិងកំណត់មុខសញ្ញាជនខិល
ខូចទាំងនោះផ្ដន្ទាទោសតាមផ្លូវច្បាប់ ។ ប៉ុន្តែនៅពេលទៅដល់ ក្រុមជនខិលខូចទាំងនោះគេចខ្លួនបាត់អស់ បន្សល់ទុកតែដីដែលទើបឈូសឆាយរួចថ្មីៗជាច្រើនហិកតា ។
លោក ចេង ឡៃ ថ្លែងថា ដីនៅជុំវិញបឹងទន្លេសាបនេះ រាជរដ្ឋាភិបាលបានបែងចែកជា៣តំបន់ គឺតំបន់១ តំបន់២ និងតំបន់៣ ។
តំបន់១ គឺតំបន់អភិវឌ្ឍន៍គិតពីផ្លូវជាតិលេខ៥និងផ្លូវជាតិលេខ៦ ។ ដីនេះប្រជាពលរដ្ឋទទួលបានប័ណ្ណកម្មសិទ្ធិស្របច្បាប់ អាចសាងសង់លំនៅឋាន កាប់ឆ្ការដើម្បីបង្កបង្កើនផល ដាំដំណាំ ចិញ្ចឹមសត្វ ក្នុងការរស់នៅបាន ។
តំបន់២ គឺជាតំបន់ទ្រនាប់អភិរក្សបឹងទន្លេសាប មិនចេញប័ណ្ណកម្មសិទ្ធិជូនទេ បើបងប្អូនប្រជាពលរដ្ឋធ្លាប់ធ្វើស្រែអាស្រ័យផលជាយូរមកហើយសូមបន្តធ្វើទៀតចុះ រាជរដ្ឋាភិបាលមិនហាមឃាត់ទេ ប៉ុន្តែហាមឈូសឆាយពង្រីកបន្ថែម ។
ម្យ៉ាងវិញទៀត បើខានធ្វើស្រែអាស្រ័យផល៣ទៅ៤ឆ្នាំទៅហើយ ស្រាប់តែព្រៃដុះជុំជិតឡើង
វិញ ក៏មិនអនុញ្ញាតឲ្យឈូសឆាយអាស្រ័យផលឡើងវិញនោះដែរ បើមិនដូច្នេះទេនឹងត្រូវប្រឈមចំពោះមុខច្បាប់ជាមិនខាន ។
តំបន់៣ គឺជាតំបន់អភិរក្សបឹងទន្លេសាបទាំងមូលតែម្ដង មិនអនុញ្ញាតឲ្យប្រជាពលរដ្ឋណាម្នាក់ប៉ះពាល់ដាច់ខាត ហើយព្រៃលិចទឹកគឺជាជម្រកត្រី និងជីវចម្រុះពងកូនដ៏មានសារៈសំខាន់បំផុត។
លោកអភិបាលរងខេត្ត ចេង ឡៃ បានអំពាវនាវសូមឲ្យបងប្អូនប្រជាពលរដ្ឋ គោរពច្បាប់ទាំងអស់គ្នា កុំរុករានទន្ទ្រានដីធ្លី កុំកាប់ឬដុតព្រៃលិចទឹក កុំប្រើឧបករណ៍នេសាទខុសច្បាប់ ត្រូវរួមគ្នាថែរក្សា ទប់ស្កាត់ និងការពារធនធានធម្មជាតិទាំងអស់គ្នាឲ្យនៅគង់វង្ស ដើម្បីជាគំរូល្អដល់កូនចៅជំនាន់ក្រោយ ។
លោកអភិបាលរងខេត្ត សូមឲ្យលោកមេភូមិ មេឃុំ សមត្ថកិច្ច និងមន្តីជំនាញ ស្រាវជ្រាវ កំណត់មុខសញ្ញាជនខិលខូចដែលលួចឈូសឆាយដីតំបន់២ នៅឃុំក្បាលត្រាច និងឃុំអន្សាចំបក់ស្រុកក្រគរនេះឲ្យឃើញ ដើម្បីមានវិធានការតាមផ្លូវច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ