មនុស្សរាប់លាននាក់ជុំវិញពិភពលោកត្រូវរៀនសម្របខ្លួនឡើងវិញព្រោះតែការផ្ទុះជំងឺកូវីដ-១៩ តាំងពីដើមឆ្នាំ ២០២០ នេះ ។ ក្នុងពេលនេះដែរ មនុស្សក៏តែងតែមានអារម្មណ៍នឹករឭកកិច្ចការប្រចាំថ្ងៃដែលពួកគេធ្លាប់ធ្វើពីមុនមកដូចជាទៅសាលារៀន ឬជួបជុំគ្នាជាមួយមនុស្សជាទីស្រលាញ់ជាដើម ។
ក្នុងនោះរួមមាននាយកប្រតិបត្តិរបស់ក្រុមហ៊ុន Google ផងដែរដែលបាននិយាយថាលោកនឹកការធ្វើដំណើរប្រចាំថ្ងៃ ។ លោក សាន់ដា ពីឆៃ (Sundar Pichai) ដែលជានាយកប្រតិបត្តិខាងលើបាននិយាយថា ពេលដែលលោកធ្វើដំណើរទៅវិញទៅមកផ្តល់ឱកាសឲ្យលោកបើកបរ និងគិតពីកិច្ចការផ្សេងៗ ។លោកបានបន្តទៀតថា លោកនឹកការសម្រាកដែលនៅចន្លោះកិច្ចប្រជុំ និងគម្រោងការធំៗនៅកន្លែងធ្វើការដែលលោកត្រូវដើរពីកន្លែងមួយទៅកន្លែងមួយទៀត ឬបើកបរទៅកន្លែងផ្សេងជាដើម ។
ទោះជាការបាត់បង់ពេលវេលាសម្រាប់កិច្ចការទាំងនោះអាចជួយដល់ប្រសិទ្ធិភាពការងារពិតមែន លោក ពីឆៃ បាននិយាយថាលោកនឹកពេលដែលលោកអាចគិតម្នាក់ឯងដោយស្ងប់ស្ងាត់បាន ។ ដូច្នេះក្នុងពេលដែលលោកត្រូវបានបង្ខំឲ្យធ្វើការពីផ្ទះព្រោះតែកូវីដ-១៩ នេះ លោកបានចាប់ផ្តើមកំណត់ពេលវេលាសម្រាប់ការគិត និងការអាន ។
លោកបានបន្ថែមថា ការធ្វើការនៅផ្ទះដោយជោគជ័យ គឺទាក់ទិនទៅនឹងការបង្កើនព្រំដែនរវាងកិច្ចការ និងជីវិតផ្ទាល់ខ្លួន ។ លើសពីនេះទៅទៀត លោកចាប់ផ្តើមរៀនធ្វើភីហ្សាដោយខ្លួនឯងថែមទៀតដោយគ្រាន់តែមើលវីឌីអូលើ YouTube ដែលស្ថិតក្រោមក្រុមហ៊ុន Google ។
យោងទៅតាមអ៊ីមែលមួយដែលបានផ្ញើជូនបុគ្គលិករបស់ក្រុមហ៊ុន Alphabet ដែលជាក្រុមហ៊ុនគ្រប់គ្រង Google បានឲ្យដឹងថា បុគ្គលិកភាគច្រើនក្នុងក្រុមហ៊ុនអាចនឹងបន្តធ្វើការពីផ្ទះដល់ផុតឆ្នាំ ២០២០ នេះ ។
លោក ពីឆៃ ក៏មិនមែនជាមនុស្សតែម្នាក់ដែលនឹកការធ្វើដំណើរទៅវិញទៅមកដែរ ។ ការសិក្សាមួយកាលពីខែមេសា ដែលបានស្ទង់មតិរបស់ពលករចំនួន ១ពាន់នាក់នៅអ៊ឺរ៉ុប និងសហរដ្ឋអាមេរិកបានប្រទះឃើញថា ៦៩% នឹកផ្នែកមួយចំនួននៃការធ្វើដំណើរ ប៉ុន្តែ ៥៥% នៃអ្នកធ្វើដំណើរតាមរថយន្តបាននិយាយថាពួកគេមិននឹកវាទេ ។
ការសិក្សាមួយទៀតដែលបានធ្វើឡើងដោយមានការសហការវាង CNBC និង Change Research បានប្រទះឃើញថា ៤៧% នៃអ្នកចូលរួមបានប្រើពេលវេលាដែលនៅសល់ពីការមិនធ្វើដំណើរទៅចំណាយជាមួយគ្រួសារ ចូលដំណេក ឬលើកិច្ចការដែលខ្លួនចំនួនចិត្តជាដើម ៕
ចែករំលែកព័តមាននេះ