លោកស៊ុន ចាន់ថុល ព្រមានលុបចោលនៅសន្យាក្រុមហ៊ុនសាងសង់ផ្លូវជាតិលេខ២
- ភ្នំពេញ
រាជធានីភ្នំពេញ ៖ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងជញ្ជូនបានឲ្យ ដឹងថា ក្រសួងទុករយៈពេល១ខែ…
រាជធានីភ្នំពេញ ៖ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងជញ្ជូនបានឲ្យ ដឹងថា ក្រសួងទុករយៈពេល១ខែ ដើម្បីឲ្យក្រុមហ៊ុនកូរ៉េឈ្មោះ ហាន ស៊ីន សាងសង់ផ្លូវជាតិលេខ២ តាមកិច្ចសន្យា និងមានលក្ខណៈបច្ចេកទេសត្រឹមត្រូវ បើមិនដូច្នេះក្រសួងនឹងលុបចោលនៅសន្យា ហើយជ្រើសរើសក្រុមហ៊ុនថ្មីមកសាងសង់បន្ដ ។
ក្នុងឱកាស ចុះត្រួតពិនិត្យវឌ្ឍនភាពការសាងសង់ផ្លូវជាតិ លេខ៣ ចាប់ពីរង្វង់មូលចោមចៅដល់ខេត្តកំពត នាថ្ងៃទី២១ ខែឧសភា ឆ្នាំ២០២០ ក្នុងកិច្ចសម្ភាសន៍ជាមួយអ្នកសារព័ត៌មាន លោក ស៊ុន ចាន់ថុល បានរំលឹកថា នាពេលកន្លងមកក្រុមការងារក្រសួងធនាគារកូរ៉េស្ថានទូតចុះត្រួតពិនិត្យផ្លូវជាតិលេខ២ ហើយគ្មានគ្រឿងចក្រមកសាងសង់ផ្លូវឡើយ ។
លោកបន្ដថា ក្រោយមកទៀត ក្រសួងសាធារណការក៏បានធ្វើលិខិតព្រមានក្រុមហ៊ុន សាង សង់ផ្លូវរបស់កូរ៉េ ធ្វើទៅតាមលក្ខណៈបច្ចេកទេស និងតាមកិច្ចព្រមព្រៀងដែលបានចុះហត្ថលេខាជាមួយគ្នា រួមមាន ៖ យកគ្រឿងចក្រឲ្យបានគ្រប់គ្រាន់ និងធ្វើទៅតាមលក្ខណៈបច្ចេកទេស ។ លោកបានបញ្ជាក់ថា «ចឹងខ្ញុំបានធ្វើលិខិតព្រមានហើយចម្លងទៅក្រសួងសេដ្ឋកិច្ច ហិរញ្ញវត្ថុ ខ្ញុំបានចម្លងជូនស្ថានទូតកូរ៉េ ខ្ញុំបានចម្លងជូនធនាគារកូរ៉េ ដែលឲ្យយើងខ្ជីលុយមកសាងសង់ផ្លូវជាតិលេខ២នេះ»។
លោកបន្ដថា មានប្រជាពលរដ្ឋជាច្រើនមានការងើយឆ្ងល់ថា «ហេតុអ្វីផ្លូវជាតិលេខ២ បើកការដ្ឋានហើយ គ្មានគ្រឿងចក្រធ្វើការ ។ ដូច្នេះក្រុមហ៊ុនសាងសង់ផ្លូវលេខ២ ត្រូវពន្លឿនការងារបន្ថែមទៀត ហើយយកគ្រឿងចក្រមកគ្រប់គ្រាន់ ដើម្បីសាងសង់ផ្លូវតាមលក្ខណៈបច្ចេកទេស ជាពិសេសធ្វើយ៉ាងណាឲ្យប្រជាពលរដ្ឋធ្វើដំណើរមានសុវត្ថិភាព និងងាយស្រួលដឹកកសិផល ។ លោកបន្ថែមថា ក្រសួងមិនអាចបើកការដ្ឋានទុកចោលទេ ដោយគ្មានគ្រឿងចក្រ និងសម្ភារជាដើម ។
លោកថា កុំឲ្យប្រជាពលរដ្ឋមួយចំនួនលើកឡើងថា «ធ្វើមុខខូចក្រោយ ធ្វើក្រោយខូចមុខ»។ ដូច្នេះយើងនឹងចុះតាមដានការធ្វើផ្លូវរហូតទាំងក្រុមហ៊ុនកូរ៉េ ចិន និងក្រុមហ៊ុនផ្សេងក៏ដោយ ។ ជាមួយគ្នានោះដែរលោក ស៊ុន ចាន់ថុល បានថ្លែងថា «ចឹងយើងហៅក្រុមហ៊ុន ត្រួតពិនិត្យលក្ខណៈបច្ចេកទេស មកពិភាក្សាគ្នាឲ្យច្បាស់ គឺឲ្យពេលមួយខែដោះស្រាយបញ្ហាឲ្យបាន បើដោះស្រាយមិនបានយើងអាចឈានទៅដល់ការលុបចោល កុងត្រាហ្នឹង ហើយជ្រើសរើសក្រុមហ៊ុនថ្មី» ។
លោកបញ្ជាក់ថា ក្រោយពេលក្រសួងដាក់លិខិតរួច ក្រុមហ៊ុនសាងសង់បានធ្វើលិខិតមកក្រសួងវិញថា ក្រុមហ៊ុននឹងខិតិខំប្រឹងប្រែងបន្ថែមទៀត និងធ្វើតាមកិច្ចសន្យាជាមួយក្រសួង ។ ក្រុមហ៊ុនបកស្រាយថា ដោយសារបញ្ហាកូវីដ-១៩ ទើបគ្មានគ្រឿងចក្រមកសាងសង់ផ្លូវ ជាតិលេខ២ ហើយគ្រឿងចក្រទាំងនោះ ជាប់នៅវៀតណាម ។
សូមរំលឹកថា ផ្លូវជាតិលេខ២ – លេខ២២ ត្រូវបានបើកការដ្ឋានសាងសង់ កាលពីថ្ងៃទី១១ ខែកុម្ភៈ ឆ្នាំ២០២០ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងលោក ផាក ហ៊ឹងឃ្យុង ឯកអគ្គរដ្ឋទូតកូរ៉េ ប្រចាំកម្ពុជា ដែលគ្រោងចំណាយ ជាង៥៦ លានដុល្លារអាមេរិក៕
ចែករំលែកព័តមាននេះ