រាជធានីភ្នំពេញ ៖ មន្ត្រីជាន់ខ្ពស់រាជរដ្ឋាភិបាលបានប្រកាសគាំទ្រចំណាត់ការដោះស្រាយការកកស្ទះសំណុំរឿងរបស់ក្រសួងយុត្តិធម៌ ។ បណ្ឌិត សុខ សុក្រីត្យា ទីប្រឹក្សាផ្ទាល់សម្តេចតេជោ ហ៊ុន សែន…
រាជធានីភ្នំពេញ ៖ មន្ត្រីជាន់ខ្ពស់រាជរដ្ឋាភិបាលបានប្រកាសគាំទ្រចំណាត់ការដោះស្រាយការកកស្ទះសំណុំរឿងរបស់ក្រសួងយុត្តិធម៌ ។
បណ្ឌិត សុខ សុក្រីត្យា ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជារដ្ឋលេខាធិការក្រសួងទេសចរណ៍បានគាំទ្រដល់យុទ្ធនាការរបស់ក្រសួងយុត្តិធម៌ក្នុងការដោះស្រាយការកកស្ទះសំណុំរឿងនៅតុលាការ ។
លោកបណ្ឌិត បានឲ្យដឹងនៅថ្ងៃទី២០ ឧសភា បានលើកឡើងថា ៖ ការដាក់ចេញជាយុទ្ធនាការដោះស្រាយការកកស្ទះសំណុំរឿងនៅតុលាការនេះជារឿងមួយដ៏ចាំបាច់បំផុត ដើម្បីកាត់បន្ថយការកកស្ទះសំណុំរឿងនៅតាមសាលាដំបូងរាជធានី-ខេត្ត ក្នុងគោលដៅដើម្បីពន្លឿនការរកយុត្តិធម៌ជូនដល់ប្រជាពលរដ្ឋឱ្យបានឆាប់រហ័ស ។
សូមជម្រាបថា ៖ លោក កើត រិទ្ធ រដ្ឋមន្ត្រីក្រសួងយុត្តិធម៌បានសម្រេចបង្កើតឱ្យមានយន្តការមួយ គឺគណៈកម្មការដោះស្រាយការកកស្ទះសំណុំរឿងនៅតាមសាលាដំបូងរាជធានីខេត្ត ។ លោក កើត រិទ្ធ បានបន្ថែមទៀតថា ដើម្បីអនុវត្តយុទ្ធនាការនេះឱ្យមានភាពម៉ឹងម៉ាត់ក្រសួងយុត្តិធម៌បានដាក់ចេញនូវអភិក្រមចំនួន២ គឺអភិក្រមទី១៖ ការដោះស្រាយរឿងក្តីទាំងអស់ នៅក្នុងការកកស្ទះសំណុំរឿង គឺត្រូវធ្វើឡើងដោយផ្អែកតាមច្បាប់ ត្រូវធ្វើឱ្យបានត្រឹមត្រូវ និងម៉ឹងម៉ាត់ តាមផ្លូវច្បាប់ទាំងអស់ និងទី២៖ គឺយុទ្ធនាការនេះដាក់ចេញក្រុមការងារទាំង៤ ជាមួយសាលាដំបូងរាជធានី-ខេត្តត្រូវប្រកាន់ខ្ជាប់ជាមួយនឹងគោលការណ៍ដ៏ធំមួយ ដើម្បីជៀសវាងឱ្យបាននូវសកម្មភាព «ត្រីងៀតឆ្លៀតពង» ដូច្នេះត្រូវប្រកាន់នូវគោលការណ៍សុច្ចរិត ស្មោះត្រង់ និងមិនពុករលួយ ។
លោករដ្ឋមន្ត្រី បានបញ្ជាក់បន្ថែមទៀតថា ការដាក់ចេញជាយុទ្ធនាការមួយបានក្លាយទៅជារឿងមួយដ៏ចាំបាច់បំផុត ដើម្បីបម្រើឱ្យគោលបំណងចំនួន ៣យ៉ាង រួមមាន៖ ការកាត់បន្ថយការកកស្ទះសំណុំរឿង នៅតាមសាលាដំបូងរាជធានី-ខេត្ត ក្នុងគោលដៅដើម្បីពន្លឿនការរកយុត្តិធម៌ ជូនដល់ប្រជាពលរដ្ឋ ឱ្យបានឆាប់រហ័ស, ទី២៖ កាត់បន្ថយបានការកកស្ទះសំណុំរឿង មានន័យស្មើរនឹងការលើកកម្ពស់សមត្ថភាពស្ថាប័នមួយនេះ ដើម្បីអាចឆ្លើយតបទៅនឹងសំណុំរឿង ដែលនឹងចូលមកថ្មីបន្តទៀត ជាពិសេស គឺការផ្តល់សេវាយុត្តិធម៌ កាន់តែប្រសើរជាងមុន និងមានភាពឆាប់រហ័សជាងមុន និងគោលបំណងទី៣៖ ការកាត់បន្ថយការកកស្ទះនេះនឹងមានបច្ច័យមួយរួមចំណែកដល់ការកាត់បន្ថយភាពចង្អៀតណែន នៅតាមពន្ធនាគារផងដែរ ៕
ចែករំលែកព័តមាននេះ