រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ក្រុមគ្រួសារស្ត្រីម្នាក់បានធ្វើការចោទប្រកាន់ក្រុមគ្រូពេទ្យនៃមន្ទីរសម្រាកព្យាបាល និងសម្ភព «សុវណ្ណឌី» ចោមចៅ ដែលមានទីតាំងស្ថិតនៅតាមបណ្ដោយមហាវិថីឈ្នះ ឈ្នះ ស្ថិតក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញថា គ្មានជំនាញច្បាស់លាស់ ស្ទើរតែធ្វើឲ្យកូនស្រីគាត់ត្រូវបាត់បង់ជីវិត។
សេចក្តីរាយការណ៍បន្តថា ខណៈដែលកូនស្រីគាត់ឈឺពោះសម្រាលកូនដំបូង ពួកគាត់បាននាំទៅកាន់មន្ទីរសម្រាកខាងលើ ហើយក្រុមគ្រូពេទ្យបានប្រាប់ថា លើសថ្ងៃកើតទៅហើយកូននៅមិនព្រមកើត ហើយសុខភាពខ្សោយណាស់ ទាល់តែសម្រាលដោយធ្វើការវះកាត់។លុះពេលវះកាត់រួចកូនស្រីគាត់មានអាការៈធ្ងន់ធ្ងរ ហើយគាត់ស្នើសុំឲ្យបញ្ជូនកូនគាត់ទៅកាន់មន្ទីរពេទ្យធំៗមិនព្រមទេ បែរជាថា កូនគាត់កើតព្រាយក្រឡាភ្លើង និងប្រាប់ថា ទុកតាមដានសិន។
សេចក្តីរាយការណ៍បន្តថា រហូតច្រើនម៉ោងក្រោយមក អាការៈកូនស្រីគាត់កាន់តែធ្ងន់ទៅៗ ទើបបញ្ជូនទៅកាន់មន្ទីរពេទ្យព្រះកុសុមៈ ហើយថ្វីដ្បិតតែពេលនេះកូនគាត់រួចពីស្លាប់ ប៉ុន្តែក្លាយទៅជាមនុស្សស្លាប់១ចំហៀងខ្លួន និងប្រែពីមនុស្សចរឹកចាស់ទុំទៅជាមានសតិ ដូចជាក្មេងអាយុ២ឆ្នាំដូច្នោះដែរ និងកំពុងសម្រាកព្យាបាលនៅមន្ទីរពេទ្យព្រះកុសុមៈ។
លុះព្រឹកថ្ងៃទី២០ ខែឧសភា ឆ្នាំ២០២០ ក្រុមគ្រួសារស្ត្រីខាងលើ បានធ្វើដំណើរទៅជួបជាមួយក្រុមគ្រូពេទ្យ និងម្ចាស់មន្ទីរសម្រាកព្យាបាល និងសម្ភព «សុវណ្ណឌី» ចោមចៅ ដើម្បីទទួលខុសត្រូវលើករណីនេះ ប៉ុន្តែត្រូវបានក្រុមគ្រូពេទ្យ និងម្ចាស់មន្ទីរសម្រាកមួយនេះបដិសេធមិនព្រមទទួលខុសត្រូវអ្វីទាំងអស់ ទើបពួកគាត់សម្រេចចិត្តថា នឹងដាក់ពាក្យប្ដឹងទៅកាន់អធិការកិច្ចក្រសួងសុខាភិបាល ដើម្បីរកយុត្តិធម៌។
បើតាមលោក សាត ណាត អាយុ៤៧ឆ្នាំ ត្រូវជាឪពុកបង្កើតរបស់ស្ត្រីរងគ្រោះខាងលើបាននិយាយថា កូនស្រីរបស់លោកដែលស្ទើរតែអស់ជីវិត និងធ្លាក់ខ្លួនពិកាស្លាប់១ចំហៀងខ្លួនក្រោមស្នាដៃគ្រូពេទ្យខាងលើនោះ ឈ្មោះ សាត ស្រី អាយុ២៥ឆ្នាំ មានប្តីឈ្មោះ ម៉េង បញ្ញា អាយុ២៧ឆ្នាំ បច្ចុប្បន្នរស់នៅភូមិត្រពាំងអញ្ចាញ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
ប្រភពដដែលបន្តថា នាងទើបតែសម្រាលកូនលើកដំបូងប៉ុណ្ណោះ ដោយកាលពីម៉ោងប្រហែល៨ទៅម៉ោង៩ព្រឹក ថ្ងៃទី១១ ខែឧសភា ឆ្នាំ២០២០ នាងឈឺពោះសម្រាលកូន ហើយក្រុមគ្រួសារបាននាំយកទៅកាន់មន្ទីរសម្រាកព្យាបាល និងសម្ភព «សុវណ្ណឌី» ចោមចៅដើម្បីឲ្យគ្រូពេទ្យជួយសម្រាលមិនហ៊ានរកពេទ្យឆ្មបរាយរងនោះទេ ព្រោះខ្លាចមានគ្រោះថ្នាក់ ហើយការនាំទៅកាន់មន្ទីរសម្រាកព្យាបាល និងសម្ភពខាងលើនោះ ក៏ដោយសារតែមើលឃើញថា អាចសង្ឃឹមបានដែរ។
ប្រភពដដែលបន្តទៀតថា លុះពេលទៅដល់ ក្រុមគ្រូពេទ្យបានពិនិត្យហើយប្រាប់ថា កូននេះគ្រប់ខែលើសថ្ងៃកើតហើយ នៅតែអត់ព្រមកើតទៀត ហើយសុខភាពខ្សោយណាស់ ទាល់តែសម្រាលដោយការវះកាត់ ទើបបាន បើមិនមិនដូច្នេះទេ អាចនឹងបាត់បង់ជីវិតមិនខានឡើយ។
ក្រោយពីគ្រូពេទ្យពន្យល់បែបនេះ គាត់ និងក្រុមគ្រួសារបានយល់ព្រមឲ្យធ្វើការវះកាត់ ហើយគ្រូពេទ្យទារថ្លៃមុខកាំបិត៦៥០ដុល្លារ លុះព្រមព្រៀងគ្នាហើយ គ្រូពេទ្យក៏បានធ្វើកិច្ចសន្យាឲ្យពួកគាត់ផ្ដិតមេដៃ និងប្រគល់លុយថ្លៃវះកាត់រួចរាល់ រហូតដល់ម៉ោង១២ថ្ងៃត្រង់ថ្ងៃដដែល ទើបចូលបន្ទប់វះកាត់។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ