ប្រទេសអាល្លឺម៉ង់ ៖ តាមប្រភពព័ត៌មាន CNN បានឱ្យដឹងថា យោងតាមមជ្ឈមណ្ឌលគ្រប់គ្រងជំងឺបានលើកឡើងថា មនុស្សជាង ៨,០០០នាក់ឥឡូវនេះបានបាត់បង់ជីវិតដោយសារជំងឺកូវីដ១៩ នៅប្រទេសអាល្លឺម៉ង់។
ទិន្នន័យដែលត្រូវបានចេញផ្សាយកាលពីថ្ងៃអង្គារ៍ បានបង្ហាញពីការបាត់បង់ជីវិតថ្មីទាក់ទងនឹងជំងឺឆ្លងកូវីដ១៩ ដែលបង្កឱ្យមានចំនួនអ្នកបាត់បង់ជីវិតដល់ទៅ ៨,០០៧នាក់។ នេះបើតាមការលើកឡើងរបស់វិទ្យាស្ថាន Robert Koch។
វិទ្យាស្ថាននេះ ក៏បានកត់ត្រាការកើនឡើងនៃការឆ្លងថ្មីចំនួន ៥១៣ករណី ដោយធ្វើឱ្យចំនួនករណីឆ្លងសរុបក្នុងប្រទេសអាល្លឺម៉ង់ កើនដល់ជាង ១៧៥,០០០ករណី។ រដ្ឋ Bavaria ដែលជារដ្ឋសហព័ន្ធធំបំផុតរបស់អាល្លឺម៉ង់ នៅតែជាតំបន់រងគ្រោះខ្លាំងជាងគេ ដោយមាន ២៦% នៃការឆ្លងមេរោគកូវីដ១៩ នៅក្នុងប្រទេស និង មាន២៩%នៃចំនួនអ្នកបាត់បង់ជីវិតសរុប។
កាលពីថ្ងៃច័ន្ទ អធិការបតីអាល្លឺម៉ង់ លោក Angela Merkel និង ប្រធានាធិបតីបារាំងលោក Emmanuel Macron បានប្រកាសអំពីមូលនិធិថ្មីរបស់បារាំង-អាល្លឺម៉ង់ ដែលមានតម្លៃ ៥០០ពាន់លានអឺរ៉ូ ដែលជាផ្នែកមួយនៃផែនការស្តារឡើងវិញ ក្រោយពេលផុតកូវីដរបស់សហភាពអឺរ៉ុប៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ