ប្រទេសឥណ្ឌា-បង់ក្លាដែស ៖ ប្រទេសឥណ្ឌា និងបង់ក្លាដែស បានជម្លៀសមនុស្សចេញប្រមាណជាកន្លះលាននាក់ មុនការបោកបក់មកដល់នាថ្ងៃទី២០ ខែឧសភា ឆ្នាំ២០២០ នៃព្យុះកំណាចមួយ។ ព្យុះនេះ…
ប្រទេសឥណ្ឌា-បង់ក្លាដែស ៖ ប្រទេសឥណ្ឌា និងបង់ក្លាដែស បានជម្លៀសមនុស្សចេញប្រមាណជាកន្លះលាននាក់ មុនការបោកបក់មកដល់នាថ្ងៃទី២០ ខែឧសភា ឆ្នាំ២០២០ នៃព្យុះកំណាចមួយ។ ព្យុះនេះ គឺជាព្យុះដ៏ខ្លាំងបំផុតមួយពុំធ្លាប់មានចាប់តាំងពី១០ឆ្នាំមកហើយក្នុងតំបន់នោះ នាំឲ្យគេមានការភ័យខ្លាចដល់ការខូចខាត និងការបំផ្លាញផ្ទះសម្បែង ផលដំណាំនិងបណ្ដាញដឹកជញ្ជូនអស់ច្រើននឹកស្មានមិនដល់។
ការជម្លៀសមនុស្សចេញដ៏ច្រើននោះនាំឲ្យមានភាពស្មុគ្រស្មាញ ខណៈអាជ្ញាធរកំពុងតែធ្វើការខិតខំប្រឹងប្រែង តស៊ូប្រឆាំងការឆ្លងរាលដាលនៃវីរុសCOVID-19 ហើយបង្កើតការរិតត្បិតនានា ពិសេសតម្រូវឲ្យមានការស្ថិតនៅឃ្លាតពីគ្នា។ ម្យ៉ាងទៀតវាកើតមានខណៈពលករច្រើនពាន់នាក់ដែលចាកចេញពីបណ្ដាតំបន់ជនបទ លើកគ្នាមករកការងារធ្វើក្នុងទីក្រុងធំៗរបស់ឥណ្ឌា ស្វែងរកវិលត្រឡប់មកផ្ទះវិញ ក្រោយបាត់បង់រាល់ប្រាក់ចំណូល បណ្ដាលមកពីការបង្ខាំងប្រជាជនទប់ការឆ្លង។
ព្យុះកំណាចនេះឈ្មោះAMPHANស្ថិតនៅក្នុងតំបន់ឈូងសមុទ្របឹងហ្គាល់ ហើយត្រូវបោកបក់ដល់ដែនដីភាគខាងកើតឥណ្ឌា និងភាគខាងត្បូងបង់ក្លាដែសនាថ្ងៃទី២០ឧសភា ជាមួយកម្លាំងខ្យល់ដល់ទៅ១៨៥គីឡូម៉ែត្រក្នុងមួយម៉ោង ដែលព្យុះនេះមានកម្លាំងស្មើនឹងព្យុះសង្ឃរាប្រភេទទី៥។
ផ្នែកឧតុនិយមឥណ្ឌាព្យាករណ៍ថា រលកសមុទ្រអាចមានកម្ពស់ពី៣ទៅ៥ម៉ែត្រ ដែលអាចបំផ្លាញផ្ទះសម្បែង នៅតាមបណ្ដោយមាត់សមុទ្រនិងបំផ្លាញបណ្ដាអង់តែន គមនាគមន៍ និងទឹកជន់លិចបណ្ដាផ្លូវថ្នល់និងផ្លូវដែក។
ចំការនិងដំណាំដាំដុះក្នុងរដ្ឋបឹងហ្គាល់ខាងលិច និងរដ្ឋអូឌីសាអាចជួបប្រទះការខូចខាតច្រើន ចំណែកបណ្ដានាវាទោះបីជាធំក្ដី អាចត្រូវកម្លាំងខ្យល់បោកបើក។
នៅប្រទេសបង់ក្លាដែសជិតខាង ការគំរាមកំហែងរឹតតែខ្លាំងក្លាព្រោះ មួយផ្នែកធំនៃប្រទេសនេះអាចរងការវាយប្រហារដោយព្យុះនេះ។ អាជ្ញាធរភ័យខ្លាចមានទឹកជំនន់ដ៏ធំមកពីរលកធំៗនិងភ្លៀងធ្លាក់ខ្លាំង៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ