សម្តេចតេជោ ៖ ២០ ឧសភា ជាថ្ងៃដែលពលរដ្ឋមិនអាចបំភ្លេចបាន
- ភ្នំពេញ
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា ថ្ងៃនេះជាទិវាជាតិនៃការចងចាំ ២០ ឧសភា ដែលពលរដ្ឋមិនអាចបំភ្លេចបាន…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា ថ្ងៃនេះជាទិវាជាតិនៃការចងចាំ ២០ ឧសភា ដែលពលរដ្ឋមិនអាចបំភ្លេចបាន ។ សម្តេចបានសរសេរលើបណ្តាញសង្គមយ៉ាងដូច្នេះថា« ថ្ងៃនេះ ជាថ្ងៃទិវាជាតិនៃការចងចាំ ២០ ឧសភា ដែលជាថ្ងៃប្រជាជនកម្ពុជាគ្រប់ៗរូបចងចាំមិនអាចបំភ្លេចបានក្នុងរបបកម្ពុជាប្រជាធិបតេយ្យ ឬហៅថា របបប្រល័យពូជសាសន៍ ប៉ុល ពត (១៧ មេសា ១៩៧៥ – ៦ មករា ១៩៧៩) ដែលជារបបដ៏ឃោរឃៅ និងខ្មៅងងឹត»។
សម្តេច បានគូសបញ្ជាក់បន្ថែមថា ទិវានេះជាការរំលឹកដល់វិញ្ញាណក្ខន្ធដល់ជនរងគ្រោះជាង៣លាននាក់ ដែលបានស្លាប់បាត់បង់ជីវិតនៅក្នុងរបបប្រល័យពូជសាសន៍ ប៉ុល ពត ។ សម្តេចលើកឡើងទៀតថាប្រជាពលរដ្ឋកម្ពុជាភាគច្រើនលើសលប់បានដឹង និងបានយល់ច្បាស់អំពីរឿងរ៉ាវសោកនាដកម្មដ៏ជូរចត់ ដែលប្រជាពលរដ្ឋខ្មែរបានឆ្លងកាត់ជិត៣ទសវត្សរ៍ ក្នុងភ្នក់ភ្លើងសង្គ្រាម និងទឹកភ្នែកការកាប់សម្លាប់ការបំផ្លិចបំផ្លាញ ការជម្លៀសចេញពីទីលំនៅរបស់ខ្លួនដោយបង្ខំ និងការបង្ខំឱ្យធ្វើការដូចសត្វធាតុជាដើម ។ មិនតែប៉ុណ្ណោះ ប្រជាពលរដ្ឋកម្ពុជា ត្រូវស្លាប់ដោយគ្មានថ្នាំសង្កូវព្យាបាល គ្មានអាហារបរិភោគគ្រប់គ្រាន់ គ្មានសិទ្ធិសេរីភាព គ្មានលទ្ធិប្រជាធិបតេយ្យ ហើយសូម្បីតែសិទ្ធិរស់រានមានជីវិតដែលជាសិទ្ធិមូលដ្ឋានមានពីកំណើតរបស់មនុស្សក៏គ្មានដែរ ។
សម្តេចតេជោក៏បានលើកឡើងថា ដើម្បីកុំអោយរបបនេះវិលត្រឡប់មកវិញ ចូលរួមថែរក្សាការពារសន្តិភាពឱ្យបានគង់វង្ស ពីព្រោះសន្តិភាពបានផ្តល់ឱកាសគ្រប់យ៉ាងក្នុងការកសាងសង្គមគ្រួសារ សហគមន៍ និងប្រទេសជាតិ ឱ្យកាន់តែរីកចម្រើនទៅមុខទៀត ។
សូមជម្រាបថាទិវាការចងចាំ២០ ឧសភា កាលពីឆ្នាំកន្លងមករាជរដ្ឋាភិបាលបានសម្រេចអនុញ្ញាតឲ្យបុគ្គលមន្ត្រីរាជការសាធារណៈនិងឯកជនឈប់សម្រាកមួយថ្ងៃ ប៉ុន្តែសម្រាប់ឆ្នាំ២០២០នេះ មិនអនុញ្ញាតឲ្យឈប់សម្រាកទេ ៕
ចែករំលែកព័តមាននេះ