រាជធានីភ្នំពេញ ៖ អ្នកនាំពាក្យក្រសួងសុខាភិបាលបានបន្តបញ្ជាក់ជាថ្មីថា កម្ពុជានៅតែស្ថិតក្នុងហានិភ័យក្នុងការឆ្លងជំងឺកូវីដ១៩ បន្តទៀត ដូច្នេះត្រូវតែមានការប្រុងប្រយ័ត្នទាំងអស់គ្នា ។
លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានឲ្យដឹងនៅថ្ងៃទី១៩ ខែឧសភា យ៉ាងដូច្នេះថា៖ «ខ្ញុំតែងតែប្រើពាក្យពេជថា ស្ថានភាពរបស់យើងនៅតែស្ថិតក្នុងស្ថានភាពដែលត្រូវប្រុងប្រយ័ត្នជាប់ជានិច្ច ។ ដោយសារនៅលើកសលកលោក ជាពិសេសប្រទេសនៅក្នុងតំបន់ និងប្រទេសជិតខាងនៅមានករណីវីរុសកូវីដ១៩ នៅឡើយទេ ហើយប្រទេសមួយចំនួនទៀតចេះតែរកអ្នកឆ្លងជំងឺជាបន្តបន្ទាប់អីញ្ចឹង» ។
លោកស្រីវេជ្ជបណ្ឌិតបានបន្តថា ចំណុចនេះ គឺបង្ហាញថា កម្ពុជានៅមានហានិភ័យក្នុងការបន្តឆ្លងជំងឺកូវីដ១៩នេះនៅឡើយនៅគ្រប់ពេលវេលា គ្រប់កាលៈទេសៈ និងគ្រប់ទីកន្លែងទាំងអស់ ។ ដូច្នេះហើយបានជាយើងត្រូវប្រកាន់យកនូវការរស់នៅធម្មតាក្នុងគន្លងថ្មីឲ្យបានខ្ជាប់ខ្ជួន ។
លោកស្រីបានលើកឡើងពីការរស់នៅតាមបែបគន្លងថ្មីឲ្យបានខ្ជាប់ខ្ជួននេះ គឺមានភាពសាមញ្ញៗទេ ដោយត្រូវធ្វើការអនាម័យខ្លួន ដៃ ឲ្យបានស្អាតជាប់ជានិច្ច ឧស្សាហ៍លាងដៃ ការប្រើប្រាស់ម៉ាស់ ក្រមា ឬកន្សែងសម្រាប់ជូតមាត់ នៅពេលក្អកកណ្តាស់ទប់មាត់ និងយកទៅបោះចោលឲ្យបានត្រឹមត្រូវ ។ វិធានមួយទៀត គឺត្រូវរក្សាគម្លាតសង្គម និងបុគ្គលដែលចំណុចនេះជាការចាំបាច់ផងដែរ ក្នុងការកាត់បន្ថយការឆ្លងពីបុគ្គលម្នាក់ទៅម្នាក់ទៀត ។
តាមការស្រាវជ្រាវ រកឃើញថា ការរក្សាគម្លាតរវាងគ្នា និងគ្នានេះ គឺបានកាត់បន្ថយ ការឆ្លងជំងឺកូវីដ១៩ មានប្រសិទ្ធិខ្ពស់ជាអតិបរមា ។ អ្នកនាំពាក្យដដែលក៏បានលើកឡើងទៀតថា ទោះបីជាយ៉ាងណាក្តីនៅតែបន្តអំពាវនាវដល់ប្រជាពលរដ្ឋ អាជ្ញាធរតាមមូលដ្ឋានគ្រប់លំដាប់ថ្នាក់ទាំងអស់ ចូលរួមក្នុងការត្រួតពិនិត្យ និងជួយសម្របសម្រួលបន្តទៀត លើការអនុវត្តវិធានការនានាក្រោមដែនសមត្ថកិច្ចខ្លួន ។
ជាក់ស្តែងភោជនីយដ្ឋាន ឬរមណីយដ្ឋាននៅពេលបើកអាជ្ញាធរត្រូវធ្វើយ៉ាងណាកុំឲ្យក្លាយជាកន្លែងឆ្លងជំងឺកូវីដ១៩ ។ ជាពិសេសទៅទៀត គឺត្រូវតែរក្សានូវអនុវត្តដោយរក្សាការពិនិត្យកំដៅ ការប្រើអាល់កុលលាងដៃ ហើយអ្នកបំរើនៅភោជនីយដ្ឋានត្រូវបាក់ម៉ាស់ឲ្យបានត្រឹមត្រូវជៀសវាងការឆ្លងទៅភ្ញៀវដែលចូលទៅ ៕
ចែករំលែកព័តមាននេះ