រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់បានរត់ចេញពីមន្ទីរពេទ្យមកអង្គុយចុកពោះស្រែកឱ្យគេជួយ បន្ទាប់ពីខ្លួនឯងអត់មានលុយវះកាត់ពោះវៀនដុះខ្នែង ហើយត្រូវគ្រូពេទ្យទុកចោល រូបគាត់ក៏បានលួចរត់ចេញពីមន្ទីរពេទ្យ បង្កឲ្យមានការភ្ញាក់ផ្អើលកាលពីម៉ោង8យប់ថ្ងៃទី18 ខែឧសភា ឆ្នាំ2020…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់បានរត់ចេញពីមន្ទីរពេទ្យមកអង្គុយចុកពោះស្រែកឱ្យគេជួយ បន្ទាប់ពីខ្លួនឯងអត់មានលុយវះកាត់ពោះវៀនដុះខ្នែង ហើយត្រូវគ្រូពេទ្យទុកចោល រូបគាត់ក៏បានលួចរត់ចេញពីមន្ទីរពេទ្យ បង្កឲ្យមានការភ្ញាក់ផ្អើលកាលពីម៉ោង8យប់ថ្ងៃទី18 ខែឧសភា ឆ្នាំ2020 តាមបណ្តោយផ្លូវសុរាម្រិត ក្បែរនឹងវិមានឯករាជ្យ ស្ថិតនៅក្នុងសង្កាត់ចតុមុខ ខណ្ឌដូនពេញ ។
សេចក្តីរាយការណ៍បន្តថា បុរសខាងលើឈ្មោះអួក វិចិត្រ ភេទប្រុស អាយុ41ឆ្នាំ មុខរបរជាកម្មករសំណង់ បច្ចុប្បន្ននៅក្បែរនឹងឧណ្ណាលោម មានស្រុកកំណើតនៅស្រុកកោះសុទិន ខេត្តកំពង់ចាម។
តាមប្រភពពីបុរសខាងលើ បានឱ្យដឹងថា មុនលកើតហេតុ រូបគាត់ឈឺពោះវៀនដុះខ្នែងនេះជាយូរមកហើយ ប៉ុន្តែគ្មានលុយព្យាបាលនោះទេ រហូតដល់ថ្ងៃកើតហេតុខាងលើនេះ ក៏ស្រាប់តែពោះវៀនដុះខ្នែងនេះបរើឡើងខ្លាំង រូបគាត់ក៏រត់ទៅមន្ទីរពេទ្យ ដោយសារតែជីវភាពខ្វះខាតខ្លាំងអត់លុយ ហើយអត់មានអ្នកមើលថែទៀត គ្រូពេទ្យទុករូបគាត់ចោលធ្វើឲ្យរូបគាត់ទ្រាំលែងបាន ក៏រត់ចេញមកក្រៅ រហូតមកដល់ក្បែរនឹងវិមានឯករាជ្យ ក៏អង្គុយស្រែកទ្រហោយំ និងយកដៃស្ទាបពោះ រួចហើយក៏ស្រែកឱ្យគេជួយតែម្តង។
បុរសខាងលើបន្តថា សំណាងល្អហើយ ដែលមានបងប្អូនប្រជាពលរដ្ឋដែលមកហាត់ប្រាណឃើញ ហើយមានការអាណិតអាសូរ ក៏នាំគ្នាចូលជាថវិកាចំនួនសរុបទាំងអស់ជិត20ម៉ឺនរៀល គ្រាន់ទៅសំរាកព្យាបាល ។
ក្រោយពីមានការភ្ញាក់ផ្អើលដល់សមត្ថកិច្ចមូលដ្ឋានប៉ុស្តិ៍ចតុមុខ បានមកដល់កន្លែងកើតហេតុ រួចហើយក៏ទំនាក់ទំនងហៅរថយន្តសង្គ្រោះរបស់មន្ទីរពេទ្យកាល់ម៉ែត ដឹកយកជនរងគ្រោះទៅព្យាបាលបាត់ ។ ជាមួយគ្នានោះដែរ ជនរងគ្រោះក៏បានសំណូមពរដល់សប្បុរសជនដែលចង់ជួយដល់រូបគាត់នោះ គឺពេលនេះរូបគាត់កំពុងតែសម្រាកព្យាបាលរបួសនៅមន្ទីរពេទ្យកាល់ម៉ែត ៕ (កែសម្រួលដោយ ៖ បុប្ផា)
ចែករំលែកព័តមាននេះ