ខេត្តកណ្តាល ៖ លោកយាយឈ្មោះលាន លឹម អាយុ៦៦ឆ្នាំ ត្រូវជនមិនស្គាល់មុខវាយសម្លាប់ប្លន់យកមាសអស់៥ជី ប្រាក់អាមេរិកចំនួន១៥០ដុល្លារ និងប្រាក់រៀលមួយចំនួនពី ក្នុងហោប៉ៅអាវ ខណៈគាត់ទៅបេះផ្លែល្មុតនៅដីចំការតែម្នាក់ឯងឆ្ងាយពីផ្ទះ។ ដំបូងលោកយាយត្រូវគេប្រទះឃើញដេកសន្លប់នៅក្បែរចំការល្មុតរបស់គាត់កាលពីវេលាម៉ោង៤រសៀល ថ្ងៃទី១៩ ខែមីនា នៅភូមិស្វាយកណ្តាល ឃុំព្រែកថ្មី ស្រុកកោះធំ ខេត្តកណ្តាល។ នៅលើខ្លួនលោកយាយមានស្នាមជាំខ្មៅជាច្រើនកន្លែងដែលជនមិនស្គាល់មុខបានវាយនឹងវត្ថុរឹង។ ក្រោយពីប្រទះឃើញត្រូវក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកស្រុកកោះធំ ប៉ុន្តែប៉ុន្មានម៉ោងក្រោយមកលោកយាយបានស្លាប់ដោយសាររបួសធ្ងន់ធ្ងរពេក។
លោកតាឌុក ឆែម អាយុ៧៣ឆ្នាំ ជាប្តីលោកយាយរងគ្រោះបានប្រាប់ឱ្យដឹងថា ក្រោយពីប្រទះឃើញប្រពន្ធគាត់ដេកសន្លប់នៅក្នុងចំការល្មុត និងមានស្នាមជាំលើខ្លួនផងនោះ ក្រុមគ្រួសារកូនចៅឆែកលើខ្លួន បាត់អស់មាសចំនួន៥ជី គឺខ្សែ.កមួយខ្សែទម្ងន់៣ជី និងចិញ្ចៀនមួយវង់ទម្ងន់២ជី ប្រាក់ដុល្លារចំនួន១៥០ដុល្លារ និងប្រាក់រៀលមួយចំនួនទៀតដែលតែងតែរក្សាទុកនៅក្នុងហោប៉ៅអាវក្នុងរបស់គាត់ជាប្រចាំ។
លោកតាឌុក ឆែម ជាប្តីបានឱ្យដឹងទៀតថា បន្ទាប់ពីហូបបាយថ្ងៃត្រង់ហើយ វេលាម៉ោងជាង១២ប្រពន្ធគាត់បានរៀបចំខ្លួនជិះកង់ទៅបេះល្មុតនៅចំការខាងក្រោយភូមិចម្ងាយប្រហែលជាងមួយគីឡូម៉ែត្រពីផ្ទះ។ រហូតដល់ម៉ោង៤រសៀលថ្ងៃដដែលក្មេងត្រឡប់មកពីឃ្វាលគោប្រទះឃើញប្រពន្ធគាត់ដេកសន្លប់នៅក្បែរដីចំការល្មុត ក៏រត់មកប្រាប់ក្រុមគ្រួសារឱ្យដឹង។ ពេលនាំគ្នាទៅមើលឃើញប្រពន្ធគាត់ដេកសន្លប់នៅក្បែរកង់ដែលមានផ្លែល្មុតច្រកបាវរឹតជាប់រានកង់ផ្អែកជាប់ដើមឈើនៅជាប់ចំការល្មុត។
សមត្ថកិច្ចសន្និដ្ឋានថា ជនល្មើសជនធ្វើសកម្មភាពវាយប្លន់ ខណៈជនរងគ្រោះបេះល្មុតបានហើយរៀបចំមកផ្ទះវិញ។ ក្រោយពីបញ្ជូនមកដល់មន្ទីរពេទ្យជនរងគ្រោះសន្លប់បាត់ស្មារតីរហូត ហើយបានស្លាប់នៅយប់ថ្ងៃដដែល។ ក្រុមគ្រួសារបានព្យាយាមរកមើលលើខ្លួនជនរងគ្រោះ តែរកមិនឃើញខ្សែ.កមាសទម្ងន់៣ជី និងចិញ្ចៀនទម្ងន់២ជី ប្រាក់ដុល្លារ១៥០ដុល្លារ និងប្រាក់រៀលមិនតិចជាង៧ម៉ឺនរៀលដែលគាត់តែងតែដាក់ជាប់តាមខ្លួនជាប្រចាំក្នុងហោប៉ៅអាវក្នុង។
នៅព្រឹកថ្ងៃទី២០ ខែមីនា ប៉ូលិសបច្ចេកទេសខេត្ត និងស្រុកទៅពិនិត្យធ្វើកោសល្យវិច័យលើសាកសពឃើញមានស្នាមជាំជាច្រើនកន្លែងលើខ្លួនជនរងគ្រោះដែលសន្និដ្ឋានថា ត្រូវគេវាយនឹងវត្ថុរឹង ហើយអាវជនរងគ្រោះមានស្នាមដាច់រហែកផងដែរ ទំនងជាមុនពេលកើតហេតុនោះមានការប្រតាយប្រតប់គ្នាផងដែរទើបវាយនឹងវត្ថុរឹងជាក្រោយ។ ក្រោយពីពិនិត្យចប់សាកសពត្រូវបានប្រគល់ទៅឱ្យក្រុមគ្រួសារធ្វើបុណ្យតាមប្រពៃណី ហើយសមត្ថកិច្ចកំពុងស្រាវជ្រាវរកមុខឃាតក ៕
ចែករំលែកព័តមាននេះ