ខេត្តសៀមរាប ៖ គ្រោះធម្មជាតិបានកើតឡើងជាបន្តបន្ទាប់ចំនួន២ករណីក្នុងរយៈពេល២ថ្ងៃជាប់គ្នាគឺថ្ងៃទី១៦-១៧ ឧសភា ឆ្នាំ២០២០ បណ្តាលឱ្យរលំផ្ទះ២ខ្នង និងមនុស្ស២នាក់បានរងរបួស ។
ករណីទី១-កាលពីវេលាម៉ោង៥និង៥៤នាទីល្ងាចថ្ងៃទី១៦ ខែ ឧសភា ឆ្នាំ ២០២០ នៅភូមិជីក្រែង ឃុំជីក្រែង ស្រុកជីក្រែង ខេត្តសៀមរាប មានភ្លៀងធ្លាក់មួយមេធំលាយឡំនឹងខ្យល់កន្ត្រាក់ បណ្តាលឱ្យរលំផ្ទះប្រជាពលរដ្ឋអស់ចំនួន២ខ្នង និងយុវជនម្នាក់រងរបួសស្រាល។
បើតាមការបញ្ជាក់ពីលោកវរសេនីយ៍ឯក សុខ សុទ្ធាវុធ អធិការនគរបាលស្រុកជីក្រែងបានឱ្យដឹងថា នៅក្នុងភូមិជីក្រែង ឃុំជីក្រែង មានភ្លៀងធ្លាក់លាយឡំខ្យល់កន្ត្រាក់ បណ្តាលឱ្យរលំផ្ទះឈើមួយខ្នងប្រក់ក្បឿង បាំងជញ្ជាំងក្តារ មានទំហំទទឹង៧ម៉ែត្រ និងបណ្តោយ១១ម៉ែត្រ ទើបសង់រួច បានរលំដល់ដីទាំងស្រុង រីឯកូនប្រុសម្នាក់របស់ម្ចាស់ផ្ទះបានរងរបួសស្រាល ។
លោកអធិការនគរបាលស្រុកបានបញ្ជាក់ថា ម្ចាស់ផ្ទះឈ្មោះ គ្រួស យាំ ភេទប្រុស អាយុ៤២ឆ្នាំ និងប្រពន្ធឈ្មោះ សាំង សឺ អាយុ៤១ឆ្នាំ និងកូនប្រុសឈ្មោះ ឡាំ យ៉ុង អាយុ២២ឆ្នាំ រងរបួសស្រាល ។ គ្រួសារនេះរស់នៅក្នុងភូមិជីក្រែង ឃុំជីក្រែង ។
លោកអធិការដ្ឋាននគរបាលស្រុកជីក្រែង ក៏ដូចជាលោកអភិបាលស្រុកបានសំណូមពរដល់បងប្អូនប្រជា ពលរដ្ឋទាំងអស់ បង្កើនការប្រុងប្រយ័ត្នខ្ពស់បំផុតនៅពេលមានភ្លៀង សូមកុំទៅជ្រកក្រោមដើមឈើ ទោះជានៅក្នុងផ្ទះក៏ត្រូវប្រុងប្រយ័ត្នផងដែរ ។
ករណីទី២-កាលពីវេលាម៉ោង៤និង២០នាទីរសៀលថ្ងៃទី១៧ ខែឧសភា ឆ្នាំ២០២០ នៅភូមិតាសៀម ស្រុកស្វាយលើ មានភ្លៀងធ្លាក់មួយមេធំលាយឡំខ្យល់កន្ត្រាក់ និងមានរន្ទះបាញ់ដើមអំពិល បណ្តាលឱ្យប្លាតមកត្រូវបុរសម្នាក់រងរបួសធ្ងន់ ។
ជនរងគ្រោះឈ្មោះ ទេស ណាវ ភេទប្រុស អាយុ៥៦ឆ្នាំ ។
បើតាមលោក អៀង ពិសិដ្ឋ អភិបាលស្រុកស្វាយលើ បានឱ្យដឹងថា មុនពេលកើតហេតុ មានភ្លៀងធ្លាក់មួយមេធំលាយឡំខ្យល់កន្ត្រាក់ និងមានរន្ទះបាញ់ដើមអំពិលដែលនៅជាប់ផ្ទះរបស់ជនរងគ្រោះ ធ្វើឱ្យប្លាតត្រូវចំជនរងគ្រោះពេលកំពុងជួយលើកសសរផ្ទះបងប្អូនដែលនៅជាប់គ្នា បណ្តាលឱ្យរងរបួសធ្ងន់ ។
លោកអភិបាលស្រុកបានបន្តថា បន្ទាប់ពីកើតហេតុ ដោយមានការជួយអន្តរាគមន៍ពីអាជ្ញាធរឃុំ និងស្រុក បានដឹកជនរងគ្រោះតាមរថយន្តសង្គ្រោះបន្ទាន់របស់មណ្ឌលសុខភាពស្វាយលើយកទៅសង្គ្រោះនៅមន្ទីរពេទ្យបង្អែកសូទ្រនិគម។ បច្ចុប្បន្នជនរងគ្រោះបានដឹងខ្លួនកំរើកដៃ និងនិយាយបានខ្លះៗហើយ ដោយគ្រូពេទ្យកំពុងពិនិត្យតាមដានយ៉ាងយកចិត្តទុកដាក់ជាបន្តទៀត ៕ (កែសម្រួលដោយ ៖ ធីតា)
ចែករំលែកព័តមាននេះ