ខេត្តសៀមរាប ៖ បើតាមការឱ្យដឹងពីសមត្ថកិច្ចជំនាញបានលួចបង្ហើបនៅព្រឹកថ្ងៃទី១៧ខែឧសភាឆ្នាំ២០២០នេះថា ជាច្រើនខែមកហើយ ក្រុមហ៊ុនយុវពាណិជ្ជបានធ្វើសកម្មភាពបូមខ្សាច់យ៉ាងគគ្រឹកគគ្រេងបំផុត នៅក្នុងដែនដីគ្រប់គ្រងដោយអាជ្ញាធរជាតិអប្សរា ប៉ុន្តែមិនមានជំនាញណាម្នាក់ហ៊ានអើតទីតាំងនោះឡើយ ប្រហែលមានខ្នងធំនៅពីក្រោយហើយ ទើបហ៊ានល្មើសនឹងច្បាប់យ៉ាងដូច្នេះ។
តំណាងក្រុមហ៊ុនយុវពាណិជ្ជសំអាងថា ខ្លួនមានអាជ្ញាប័ណ្ណពីក្រសួងក្នុងការស្ដារស្ទឹងនេះហើយ សូមបញ្ជាក់ថា ទីតាំងបូមខ្សាច់នេះស្ថិតនៅភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប។
ជុំវិញករណីខាងលើនេះដែរ បើទោះបីមានការផ្សព្វផ្សាយតាមបណ្ដាញសារព័ត៌មានយ៉ាងណា ក៏ដោយ រហូតមកដល់ពេលនេះ អាជ្ញាធរជំនាញពាក់ព័ន្ធ ហាក់បីដូចជា នៅរក្សាភាពស្ងប់ស្ងាត់ធ្វើមិនដឹងមិនឮអ្វីទាំងអស់។
ប្រការដែលអាជ្ញាធរសមត្ថកិច្ចជំនាញពាក់ព័ន្ធ រក្សាភាពស្ងប់ស្ងាត់បែបនេះ គេនៅតែមានចម្ងល់ថា មានមូលហេតុអ្វីបានជាមិនចុះពិនិត្យនូវទីតាំងបូមខ្សាច់មួយនេះ។ ប្រជាពលរដ្ឋរស់នៅតំបន់ខាងលើចង់ឃើញអាជ្ញាធរជំនាញពាក់ព័ន្ធចុះពិនិត្យទីតាំងបូមខ្សាច់របស់យុវពាណិជ្ជ ឡើង វិញដោយហេតុថាអាជីវកម្មមួយនេះអាចធ្វើឱ្យមានការប៉ះពាល់យ៉ាងខ្លាំងដល់ធនធានធម្មជាតិ ។
ការបូមខ្សាច់និងឈូសឆាយព្រៃឈើនៅតំបន់ខាងលើដោយក្រុមហ៊ុនយុវពាណិជ្ជ គឺក្រុមហ៊ុនមានសំអាងរបស់ដោយយោងតាមលិខិតបានបញ្ជាក់ថា ទីតាំងបូមខ្សាច់នេះ មានអាជ្ញាបណ្ណចេញដោយក្រសួងរ៉ែនិងថាមពល បានអនុញាតឱ្យក្រុមហ៊ុនយុវពាណិជ្ជ ដែលមានអាសយដ្ឋាននៅភ្នំពេញ ធ្វើអាជីវកម្មខ្សាច់សំណង់នៅតំបន់ស្ទឹងរលួស ភូមិត្រាច ឃុំបល្ល័ង្កនិងឃុំអំពិល ស្រុកប្រាសាទបាគង ខេត្តសៀមរាប នៅថ្ងៃទី២ ខែមេសា ឆ្នាំ២០២០ ដោយមានសុពលភាពមួយឆ្នាំ។
ជាមួយគ្នានេះ អាជ្ញាធរជាតិអប្សរា ក៏បានទទួលស្គាល់ក្រុមហ៊ុនយុវពាណិជ្ជ ធ្វើអាជីវកម្មតំបន់ខាងលើផងដែរ។ ដោយបានចុះហត្ថលេខាដោយលោក ស៊ុំ ម៉ាប់ អតីតអគ្គនាយកនៃអាជ្ញាធរជាតិអប្សរាផងដែរ។
សេចក្ដីរាយការណ៍បានឱ្យដឹងថាទីតាំងអាជីវកម្មបូមខ្សាច់ខាងលើ បានឈូសឆាយព្រៃឈើផងដែរ ដើម្បីវាទយកកន្លែងកាយបូមខ្សាច់។ ពាក់ព័ន្ធករណីនេះលោក ឡុង កុសល អ្នកនាំពាក្យអាជ្ញាធរជាតិអប្សរា បានបញ្ជាក់តាមប្រព័ន្ធតេលេក្រាមថា ចាំមើលលោកសួរនាំសិន ប៉ុន្តែនេះមិនមែនជាគម្រោងរបស់អាជ្ញាធរជាតិអប្សរានោះទេ ការបូមស្ដារប្រហែលជាគម្រោងសំណូមពរ។
ទោះបីយ៉ាងណា លោកឡុង កុសល នៅមិនទាន់បញ្ជាក់លំអិតនៅឡើយ ជុំវិញការធ្វើអាជីវកម្មបូមខ្សាច់របស់ក្រុមហ៊ុនយុវពាណិជ្ជនេះ។ ដោយឡែកលោក ង៉ាន ភិរុណ អភិបាល រង ខេត្តសៀមរាប បានបញ្ជាក់ថាករណី នេះ ក្រុមហ៊ុន មានច្បាប់តាំងពីជំនាន់លោកឃឹម ប៊ុន សុង អតីតអភិបាលខេត្តសៀមរាប ។ ព័ត៌មានពិស្តារនឹងមានផ្សាយនៅលើកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ