ខេត្តក្រចេះ ៖ រថយន្តមួយគ្រឿងដឹកសាច់សត្វព្រៃ ត្រូវបានកម្លាំងស្នាក់ការសន្តិសុខ៧១០ ដេញស្ទាក់ចាប់បានយកទៅដុតកម្ទេចចោល ។ ការដេញស្ទាក់រថយន្តដឹកសាច់សត្វព្រៃនេះ កម្លាំងសមត្ថកិច្ចបានធ្វើឡើងនៅវេលាម៉ោង១៣រសៀល ថ្ងៃទី១៦ ខែឧសភា ឆ្នាំ២០២០ ដឹកនាំដោយលោកអនុសេនិយ៍ឯក ជា សាងហុង ប្រធានស្នាក់ការ បានចុះបង្ក្រាបបទល្មើសធនធានធម្មជាតិ ដឹកជញ្ជូនសាច់សត្វព្រៃនៅចំណុច UTM ក្នុងភូមិអូរគ្រៀង ឃុំអូរគ្រៀង ស្រុកសំបូរ ខេត្តក្រចេះ។
ប្រភពព័ត៌មានថា ការចុះបង្ក្រាបនោះដែរ ឃាត់បានរថយន្តមួយគ្រឿង ម៉ាក Futon ពណ៌ស ពាក់ស្លាកលេខភ្នំពេញ២AH០០៩៦ ខណៈអ្នកបើកបរដឹងខ្លួន បានរត់គេចខ្លួនបាត់ស្រមោលភ្លាមៗផងដែរ តែបើតាមអត្តសញ្ញាណ រថយន្តនេះ គឺអាចរកមុខម្ចាស់រថយន្តនេះឃើញឱ្យមកទទួលទោស ។
ការបង្ក្រាបនោះ រឹបអូសបានរថយន្តចំនួនមួយគ្រឿង និងសាច់ជ្រូកព្រៃចំនួន២៨គីឡូក្រាមនៅស្រស់ ។
វត្ថុតាងដែលរឹបអួសបានខាងលើ កម្លាំងអាវុធហត្ថស្នាក់ការសន្តិសុខ៧១០ បានប្រគល់ទៅឱ្យមន្ត្រីរដ្ឋបាលព្រៃឈើអូរគ្រៀង ដែលគ្រប់គ្រងដោយលោក កែវ ចំណាន ដើម្បីចាត់ការយកសាច់សត្វព្រៃទាំងនោះ ទៅដុតកម្ទេចចោលនៅនឹងកន្លែងស្នាក់ការ ។ រថយន្តត្រូវបានរក្សារទុកចាត់ការតាមនីតិវិធីបន្តទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ