ADផ្ទាំងផ្សព្វផ្សាយពាណិជ្ជកម្ម

រទេះចតចោលស្ទើរដុះស្មៅនៅច្រកទ្វារអន្តរជាតិ ខណៈម្ចាស់ស្ទើរដាច់បាយ (មានវីដេអូ)

3 ឆ្នាំ មុន

បន្ទាយមានជ័យ
១៧ ខែ ឧសភា ឆ្នាំ ២០២០ ម៉ោង ១៦:៣០

ខេត្តបន្ទាយមានជ័យ ៖ ដោយសារមេរោគកូវីត១៩បានធ្វើឲ្យពិភពលោកជួបបញ្ហាទាំងសេដ្ឋកិច្ច ទាំងពាណិជ្ជកម្មនិងវិស័យទេសចរ ។ ជាមួយគ្នានេះដែរ ខណៈប្រទេសថៃនៅបន្តបិទព្រំដែនដើម្បីទប់ស្កាត់ការីករាលដាលជម្ងឺខាងលើបានធ្វើឲ្យប្រជាពលរដ្ឋកម្ពុជាជួបបញ្ហាសេដ្ឋកិច្ចដូចគ្នាទៅនឹងប្រជាពលរដ្ឋតាមបណ្តាប្រទេសនានានៅលើពិភពលោកផងដែរ។ ជាក់ស្តែង រទេះដែលកម្មករអូសដឹកទំនិញឆ្លងកាត់ព្រំដែនខ្មែរ-ថៃនៅច្រកទ្វារអន្តរជាតិប៉ោយប៉ែតដើម្បីរកចំណូលចិញ្ចឹមជីវិត និងក្រុមគ្រួសារស្ទើរដាច់បាយទៅហើយ…

ជាក់ស្តែង រទេះដែលកម្មករអូសដឹកទំនិញឆ្លងកាត់ព្រំដែនខ្មែរ-ថៃនៅច្រកទ្វារអន្តរជាតិប៉ោយប៉ែតដើម្បីរកចំណូលចិញ្ចឹមជីវិត និងក្រុមគ្រួសារស្ទើរដាច់បាយទៅហើយ ព្រោះពេលនេះរទេះចតចោលត្រៀបត្រា ដោយកន្លែងខ្លះស្មៅដុះស្ទើរលិចក៏មានដែរ។

ឈរក្បែររទេះហាក់អស់សង្ឃឹមសាកសួរគេឯងថាតើព្រំដែននឹងបើកវិញពេលណា? បុរសម្នាក់រស់នៅភូមិក្បាលកោះសង្កាត់ប៉ោយប៉ែតប្រាប់កោះសន្តិភាពថា គាត់និងក្រុមគ្រួសារស់ទាំងលំបាក ព្រោះគ្មានចំណូលប្រចាំថ្ងៃក្នុងអំឡុងផ្ទុះជំងឺកូវីដ១៩នេះ។

ចំណែកអ្នកផ្សេងទៀតក៏ដូចគ្នានេះដែរ ដោយនិយាយបែបអស់សង្ឃឹមថា បើស្ថានការណ៍កូវីដ១៩មិនថមថយ ហើយភាគីថៃមិនបើកព្រំដែនដូចប្រក្រតីឡើងវិញទេនោះ គ្រប់គ្នាប្រាកដជានឹងជួបបញ្ហាជីវភាពគ្រួសាកាន់តែធ្ងន់ធ្ងរ ពិសេសប្រាក់បំណុលតែម្តង។

ដោយឡែកចំណុចរង្វង់មូល និងដងផ្លូវនៅមាត់ច្រកទ្វារព្រំដែនអន្តរជាតិប៉ោយប៉ែតហាក់ស្ងប់ស្ងាត់មិនមានមនុស្សឆ្លងកាត់គគ្រឹកគគ្រេងដូចមុនផ្ទុះជំងឺកូវីដ១៩ឡើយ គឺមានតែរថយន្តធុនធំរបស់ថៃដឹកទំនិញចូលកម្ពុជា សូម្បីទំនិញរបស់ខ្មែរមានចំនួនតិចតួចបំផុតដែលត្រូវដឹកចេញទៅថៃ ។

ជុំវិញចម្ងល់នានារបស់អ្នកស្រុកថាតើថ្ងៃណាគេនឹងបើកព្រំដែន ហើយឆ្លើយតបនិងសំណួរនេះ លោកគាត ហ៊ុល អភិបាលនៃគណៈអភិបាលក្រុងប៉ោយប៉ែត បានប្រាប់តាមទូរស័ព្ទថា ប្រទេសថៃ ពេលនេះគេកំពុងស្ថិតក្នុងគ្រាអាសន្ននៅឡើយ ដូច្នេះមិនដឹងថា ពេលណាទើបគេបើកព្រំដែននោះទេ។

លោកបញ្ជាក់ថា កន្លងទៅថ្មីៗនេះ សូម្បីអាជ្ញាធរខេត្តស្នើសុំទៅអាជ្ញាធរខេត្តស្រះកែវថៃតាមសំណើរអាជីវករខ្មែរដែលលក់ដូរនៅផ្សាររុងក្លឿចង់ចូលទៅមើលតូបរៀងខ្លួនៗ ក្រែងមានទំនិញខូចខាតដោយសាទឹកភ្លៀង ក៏ត្រូវភាគីថៃបដិសេធ ដោយអះអាងថា ប្រទេសគេកំពុងស្ថិតក្នុងគ្រាអាសន្ន៕ (កែសម្រួលដោយ ៖ ធីតា)