ប្រទេសកូរ៉េខាងត្បូង ៖ តាមប្រភពព័ត៌មាន CNN បានឱ្យដឹងថា អាជ្ញាធរកូរ៉េខាងត្បូងបាននិយាយថា ចំនួនមនុស្សដែលបានធ្វើតេស្តកូវីដ១៩វិជ្ជមាន ហើយមានការទាក់ទងទៅនឹងក្លិបរាត្រីសេអ៊ូល មានការកើនឡើងដល់១៦២ករណី មកដល់ពេលនេះ។
លោក Kwon Jun-wook នាយករងមជ្ឈមណ្ឌលត្រួតពិនិត្យ និងការពារជំងឺ បាននិយាយនៅឯសន្និសីទកាសែតមួយថា គិតត្រឹមរសៀលថ្ងៃសៅរ៍ មនុស្ស ៥៦,០០០នាក់ត្រូវបានធ្វើតេស្តរកជំងឺកូវីដ១៩។
ចង្កោមករណីឆ្លងវីរុសកូរ៉ូណាខាងលើនេះ មានទំនាក់ទំនងទៅនឹងក្លិបរាត្រីមួយក្នុងទីក្រុងរបស់កូរ៉េខាងត្បូង ហើយកាលពីសប្តាហ៍មុន ទីក្រុងសេអ៊ូល បានបញ្ជាឱ្យក្លិបរាត្រី និងបារទាំងអស់របស់ខ្លួនបិទជាបណ្តោះអាសន្ន។
ករណីឆ្លងនេះ បានបង្កឱ្យមានការប្រកាសអាសន្ននៅក្នុងប្រទេសកូរ៉េខាងត្បូង ដែលស្ថិតក្នុងចំណោមប្រទេសដំបូងគេក្រៅប្រទេសចិន ក្នុងការដោះស្រាយជាមួយនឹងការផ្ទុះឡើងនូវវីរុសដែលមានទ្រង់ទ្រាយធំ។ ទោះយ៉ាងណាក្នុងប៉ុន្មានសប្តាហ៍ថ្មីៗនេះ អាជ្ញាធរបានចាប់ផ្តើមបន្ធូរបន្ថយការរឹតត្បិតដោយសារចំនួនករណីបានធ្លាក់ចុះ៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ