ខេត្តមណ្ឌលគិរី ៖ សត្វទន្សោងញីពីរក្បាល ត្រូវគេប្រទះឃើញងាប់ហើមស្អុយក្នុងព្រៃបរិវេណដីក្រុមហ៊ុនលឹមរ៉ូយ៉ាល់ ដែលមានទីតាំងនៅឃុំពូជ្រៃ ស្រុកពេជ្រាដា ខេត្តមណ្ឌលគិរី កាលពីរសៀលថ្ងៃទី១៤ ឧសភា ឆ្នាំ២០២០ ។
នាយខណ្ឌរដ្ឋបាលព្រៃឈើខេត្តមណ្ឌលគិរី លោក អ៊ុ វណ្ណសុភៈ ឱ្យដឹងថា ក្រុមហ៊ុនលឹមរ៉ូយ៉ាល់ បានរាយការណ៍ថា មានសត្វទន្សោងងាប់នៅក្នុងដីក្រុមហ៊ុន ។ លោកថាក្រោយទទួលព័ត៌មាននេះ ក្រុមការងារខណ្ឌរដ្ឋបាលព្រៃឈើ បានចុះទៅពិនិត្យដល់ទីតាំងកើតហេតុដោយសហការជាមួយក្រុមហ៊ុនលឹមរ៉ូយ៉ាល់ តាមការពិនិត្យជាក់ស្តែងនៅនឹងកន្លែងកើតហេតុ ក្រុមការងារបានឃើញសត្វទន្សោងញីចំនួន២ក្បាលងាប់មានសភាពហើមស្អុយប្រហែលជាងាប់៣ទៅ៤ថ្ងៃមកហើយ ។
បើតាមលោកនាយខណ្ឌថា សត្វទន្សោងញីដែលងាប់នេះ ត្រូវបានជនមិនស្គាល់មុខបាញ់នៅក្នុងព្រៃការពារភ្នំព្រេច ហើយសត្វទន្សោងនេះបានរត់មកដួលងាប់នៅក្នុងដីក្រុមហ៊ុនចំងាយពីផ្លូវធំប្រហែល៣០ម៉ែត្រ ។ បច្ចុប្បន្នក្រុមការងារបានចាត់ចែងកប់សត្វទន្សោងទាំងពីរនៅនឹងកន្លែងកើតហេតុតែម្តង ។ លោកនាយខណ្ឌបញ្ជាក់ថា លោកសោកស្ដាយយ៉ាងខ្លាំង ចំពោះការបាត់បង់ប្រភេទសត្វដែលកម្របែបនេះ ។ លោកបានចាត់មន្ត្រីជំនាញចុះធ្វើការស្រាវជ្រាវជុំវិញករណីបាញ់សត្វទន្សោងនេះហើយ ដើម្បីវែកមុខរកជនដែលបានប្រព្រឹត្តអំពើល្មើសច្បាប់នេះ ។
ឯកឧត្តម ស្វាយ សំអ៊ាង អភិបាលខេត្តមណ្ឌលគិរីនៅថ្ងៃទី១៥ ខែឧសភា ឆ្នាំ២០២០នេះបានបញ្ជា ទៅគ្រប់កងឯកភាពអង្គភាពទូទាំងខេត្ត ត្រូវរួមសហការគ្នាចុះស្រាវជ្រាវជាបន្ទាន់ ជុំវិញករណីសត្វទន្សោងញី២ក្បាល ដែលជនល្មើសបាញ់សម្លាប់ថ្មីៗនៅក្នុងដែនជម្រកសត្វព្រៃ «ភ្នំព្រេច» ហើយឈានទៅវែកមុខរកជនល្មើសឱ្យខាងតែបានដើម្បីយកមកផ្តន្ទាទោសតាមច្បាប់ ។ប្រធានមន្ទីរបរិស្ថាន ខេត្តមណ្ឌលគិរីបានបង្ហើបថា កំពុងមានតម្រុយពីជនល្មើស ដែលបាញ់សម្លាប់សត្វទន្សោង២ក្បាលនេះហើយ ។
អ្នកនាំពាក្យក្រសួងបរិស្ថាន ៖ មន្ត្រីជំនាញកំពុងស្រាវជ្រាវ ករណីបាញ់សត្វទន្សោងពីរក្បាលងាប់នៅខេត្តមណ្ឌលគិរី
លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថានបានឱ្យដឹងថា រហូតមកដល់ពេលនេះ មន្ត្រីជំនាញក្រសួងបរិស្ថាន បាននិងកំពុងស្រាវជ្រាវចំពោះករណីបាញ់សម្លាប់សត្វទន្សោងនោះហើយ ។
សត្វទន្សោងពីរក្បាល ជាសត្វព្រៃកម្រនៅក្នុងប្រទេសកម្ពុជា តែត្រូវបានគេប្រទះឃើញងាប់ក្នុងបរិវេណដីក្រុមហ៊ុនមួយស្ថិតនៅឃុំពូជ្រៃ ស្រុកពេជ្រាដា ខេត្តមណ្ឌលគិរី កាលពីថ្ងៃទី១៣ ខែឧសភា ឆ្នាំ២០២០ថ្មីៗនេះ ។
មានព័ត៌មានខ្លះឱ្យដឹងថា មួយរយៈនេះក្រុមព្រានព្រៃជំនាញខាងបរបាញ់សត្វ បានឈានដល់ការប្រើកាំភ្លើងច្នៃ ប្រើគ្រាប់ជាតិគីមី បាញ់ពេលថ្ងៃ ហើយរក្សាទុកសត្វងាប់ក្នុងព្រៃ ដោយមិនឱ្យខូចសាច់ ។ លុះពេលយប់ទើបពួកគេចូលទៅយក ដើម្បីបញ្ចៀសពីការចាប់ខ្លួនពីក្រុមសមត្ថកិច្ចជំនាញ ។
ការភាន់ច្រឡំព័ត៌មាន២ផ្សេងគ្នា
ការបង្ហោះព័ត៌មានតាមហ្វេសប៊ុកមួយកាលពីព្រឹកថ្ងៃទី១៥ ឧសភា របស់គណនីឈ្មោះ Vadthanak Preap បានបង្ហោះសារមួយរួមជាមួយនឹងរូបភាពព្រះសង្ឃ រថយន្តលេខខេមរភូមិន្ទ និងសត្វទង្សោងដែលងាប់ក្នុងព្រៃថាជារឿងតែមួយ ។ គេសរសេរថា មានករណីបាញ់សម្លាប់សត្វទន្សោងចំនួនពីរក្បាល បណ្តាលឱ្យងាប់នៅក្នុងព្រៃសង្ឃរុក្ខវ័ន្ត ស្ថិតនៅចំណុចចំការចេកភ្នំអណ្តូង ភូមិចាថ្មីខាងកើត ។
គណនី Facebook នេះបានបង្ហោះសាររបស់ព្រះសង្ឃយ៉ាងដូច្នេះថា «ថ្ងៃទី១៤ ឧសភា ២០២០នេះ គឺឡានមន្ត្រីយោធា ដែលចូលមកបាញ់សត្វនៅក្នុងព្រៃសង្ឃរុក្ខវ័ន្ត នៅត្រង់ចំណុចចំការចេក ភ្នំអណ្តូងភូមិចាថ្មីខាងកើត ។ មន្ត្រីបរិស្ថាននៅប្រមាណជាង១០០ម៉ែត្រសោះហេតុអ្វី បានជាគាត់មិនឮកាំភ្លើងបាញ់សត្វអីុចឹង ? ក្រោយបានបាញ់ ហើយគាត់បើកគេចចង់បំបុកហ្វូងពួកអាត្មាទៀត ឆ្ងល់ៗៗៗ ។
ពួកអាត្មាជាអ្នកអភិរក្សញោម ព្រះអង្គស្នើដល់ក្រសួងការពារជាតិសម្តេចពិជ័យសេនា ទៀ បាញ់ មេត្តាជួយអន្តរាគមន៍ករណីមន្ត្រីយោធា ប្រើប្រាស់រថយន្ត ម៉ាកអុីស៊ុយហ្សុ៊យ ពណ៌ត្រេអុី ពាក់ស្លាកលេខខេមរភូមិន្ទ តែងមានគំនិតទុច្ចរិតសត្វឃាត ក្នុងតំបន់ដែនព្រៃអភិរក្ស របស់សង្ឃរុក្ខវ័ន្ត ។ សំណេរព្រះសង្ឃ» ។ តាមការពិតករណីបាញ់សម្លាប់សត្វទាំង២ក្បាលគឺស្ថិតនៅឯខេត្តមណ្ឌលគិរីឯណោះទេ ឯករណីរថយន្តពាក់ស្លាកលេខខេមរភូមិន្ទជារបស់យោធា ដែលបើកបរឆ្លងកាត់ផ្លូវក្នុងព្រៃសង្ឃរុក្ខវ័ន្ត ៕
ចែករំលែកព័តមាននេះ