រាជធានីភ្នំពេញ ៖ កាលពីព្រឹកថ្ងៃទី១៥ ឧសភា ឆ្នាំ២០២០ នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិទទួលបន្ទុកការងារប្រយុទ្ធប្រឆាំងគ្រឿងញៀន បានថ្លែងទៅកាន់សំណួររបស់បណ្តាញអ្នកសារព័ត៌មានក្នុងស្រុកយ៉ាងដូច្នេះថា៖
សំណួរ កាលពីថ្ងៃទី១៣ ឧសភា ឆ្នាំ២០២០ កន្លងមកនេះ មានអង្គការលើកលែងទោសអន្តរជាតិ បានធ្វើការផ្សព្វផ្សាយនូវរបាយការមួយទាក់ទងទៅនិងយុទ្ធនាការប្រយុទ្ធប្រឆាំងគ្រឿងញៀនរបស់កម្ពុជា ចំពោះរបាយការណ៍នោះ តើឯកឧត្តមនាយឧត្តមសេនីយ៍អគ្គស្នងការរងយល់ឃើញយ៉ាងម៉េចដែរ ?
ចម្លើយ សូមអរគុណដល់អ្នកសារព័ត៌មាន ថ្ងៃនេះខ្ញុំមានកិត្តិយស ដែលបានជួបពិភាក្សាជាមួយគ្នា ក្នុងនាមខ្ញុំជាមន្ត្រីអនុវត្តច្បាប់ ហើយក្នុងនោះផង ចំពោះរបាយការណ៍នេះ ខ្ញុំមានការអន់ចិត្តណាស់ ហើយសោកស្តាយ ចំពោះរបាយការណ៍ ដែលគ្មានការពិតមួលបង្កាច់សភាពការនៅកម្ពុជាវាយប្រហារទៅលើរាជរដ្ឋាភិបាលវាយប្រហារមកលើយុទ្ធនាការប្រឆាំងគ្រឿងញៀន ហើយក្នុងនោះ ក៏មានវិទ្យុបរទេសនិយាយភាសាខ្មែរ២ ដែលបានផ្សព្វផ្សាយបន្តនៅថ្ងៃទី១៤ ឧសភា គឺវិទ្យុអាស៊ីសេរី និងវីអូអេ ។
និយាយរួមរបាយការណ៍នេះ វាផ្ទុយពីការពិតទាំងស្រុង ផ្ទុយពីបំណងប្រាថ្នា ផ្ទុយពីឆន្ទៈនៃការប្រឹងប្រែងរបស់រាជរដ្ឋាភិបាល ក៏ដូចជាកម្ពុជាគ្រប់ជាន់ថ្នាក់ មន្ត្រីរាជការគ្រប់ស្ថាប័ន គ្រប់ស្ថាប័នសាសនា មជ្ឈដ្ឋានជាតិ អន្តរជាតិ ដែលគេបានអបអរសាទរ រីករាយគាំទ្រនិងចូលរួមសហការក្នុងការបង្ក្រាបគ្រឿងញៀនកន្លងមកនេះ ។ ហើយក្នុងនោះដែរ ខ្ញុំជូនថា របាយការណ៍របស់អង្គការនេះ បានលើកឡើងថា (សង្គ្រាមប្រឆាំងគ្រឿងញៀននៅកម្ពុជា) អានេះ គឺថាជាការមួលបង្កាច់ភូតកុហក់ទាំងស្រុង នៅកម្ពុជាគ្មានទេ សង្គ្រាមប្រឆាំងគឿងញៀន.។
ខ្ញុំសូមជំរាបថា នៅកម្ពុជាយើងនេះសំណាងដែរ ដែលប្រមុខរាជរដ្ឋាភិបាលប្រកបដោយគតិបណ្ឌិតមានព្រហ្មវិហារធម៌ដល់ប្រជាពលរដ្ឋ ហើយសន្តោសប្រណីដល់ប្រជាពលរដ្ឋ គឺលោកមិនចាត់តាំងឱ្យមានសោះការធ្វើសង្គ្រាមគ្រឿងញៀន ដែលបេះពាល់ដល់ជីវិតមនុស្ស ។ ហើយសូមជំរាបផងដែរ ក្នុងយុទ្ធនាការកន្លងមកតាំងពីឆ្នាំ២០១៧ រហូតមកដល់ពេលនេះ៥លើកហើយ គឺមិនមានពលរដ្ឋណាម្នាក់ឬក៏ជនណាម្នាក់ស្លាប់ដោយសារការបង្ក្រាបគ្រឿងញៀននោះទេ ។
ហើយអញ្ចឹងខាងយើងគ្មានទេ សង្គ្រាមគ្រឿងញៀន ក៏ដូចជានៅកម្ពុជាយើងដឹងស្រាប់ហើយ កម្ពុជារដ្ឋធម្មនុញ្ញ រដ្ឋាភិបាលយើងបានកំណត់ច្បាស់លាស់ហើយ គឺគ្មានទេទោសប្រហារជីវិត ប៉ុន្តែពាក់ព័ន្ធនិងហេតុអីបានជាយើងរដ្ឋាភិបាលចាត់តាំង និងប្រកាសឲ្យមានយុទ្ធនាការប្រយុទ្ធប្រឆាំងគ្រឿងញៀននេះ ជំរាបជូនដូច្នេះ ជារួមស៊ើបការគ្រឿងញៀន ពិភពលោកក៏ដូចក្នុងតំបន់អត់មានការថយចុះទេ ទាំងការផលិត ទាំងការដាំដុះ ជួញដូរ ប្រើប្រាស់ក៏ដូចជា នឹងដឹកជញ្ជូន ។ អញ្ចឹងកម្ពុជាយើងនៅតែជាប្រទេសរងគ្រោះដោយសារការដឹកជញ្ជូនឆ្លងកាត់ ហើយក្នុងនោះដែរក៏យើងឃើញមានចំណុចការប្រឈមដែរ គឺការប្រើប្រាស់គ្រឿងញៀននៅកម្ពុជាយើងនេះ ប៉ុន្តែទោះបីយ៉ាងណាក៏ដោយ នៅកម្ពុជាយើងសភាពការគ្រឿងញៀនមានការធូស្រាលជាងបណ្តាប្រទេសផ្សេងៗទៀត ។
ពាក់ព័ន្ធនិងបញ្ហានេះហើយដែលប្រឈមនិងការដែលរាជរដ្ឋាភិបាល សម្តេចតេជោ ហ៊ុន សែន ជាប្រមុខបានសម្រេចបង្កើតផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ដែលដឹកនាំផ្ទាល់ដោយសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងលោក កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំគ្រឿងញៀន ។ យុទ្ធនាការនេះ គឺជាយុទ្ធនាការចលនាជាតិ ដែលមនុស្សគ្រប់រូបត្រូវរួមគ្នាគិត រួមគ្នាធ្វើ រួមគ្នាទទួលខុសត្រូវ ហើយចាបតាំងពីយុទ្ធនា ការលើកទី១ ឆ្នាំ២០១៧ រហូតមកដល់ឥឡូវនេះ យុទ្ធនាកាលើកទី៥ យើងទទួលបានជោគជ័យធំធេង នឹងត្រូវបានមជ្ឍដ្ឋានជាតិ អន្តរជាតិអបអរសាទរ គាំទ្រ រហូតដល់មានប្រទេសខ្លះគេយកប្រទេសកម្ពុជាជាគំរូថែមទៀត ។
ក្នុងនោះដែរ យើងឃើញថា មន្ត្រីអនុវត្តច្បាប់គ្រប់ជាន់ថ្នាក់ បានខំប្រឹងប្រែងតស៊ូប្តូផ្តាច់ លះបង់ជីវិត ប្រកបដោយឆន្ទៈមុះមុត និងស្មារតីអង់អាចក្លាហាន ពង្រឹងការអនុវត្តច្បាប់ និងគោរពសិទ្ធិមនុស្ស ក្នុងការអនុវត្តឲ្យបានសម្រេច នូវផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ដែលកិច្ចខិតខំប្រឹងប្រែងទាំងនេះ បានជះឥទ្ធិពលធ្វើឲ្យបទល្មើសព្រហ្មទណ្ឌថមថយចុះ ញាំងឲ្យសន្តិសុខសណ្តាប់ធ្នាប់សាធារណៈ និងសុវត្តិភាពសង្គម មានភាពល្អប្រសើរ។ ក្នុងនោះដែរកម្ពុជាយើងក៏នៅតែបន្តសហប្រតិបត្តការជាមួយបណ្តាប្រទេសក្នុងតំបន់ ក៏ដូចជាក្នុងសកលលោក គឺមានដូចជាប្រទេសអាមេរិក បារាំង អូស្ត្រាលី ជប៉ុន កូរ៉េ ចិន ជាដើម ។ គឺថាយើងបានសហការបង្ក្រាបក្រុមឧក្រឹដ្ឋជនគ្រឿងញៀនអន្តរជាតិ និងទប់ស្កាត់ បង្ក្រាបបទល្មើសគ្រឿងញៀនពីចម្ងាយថែមទៀត ។
សំណួរ លោកនាយឧត្តមសេនីយ៍ ចំពោះការចោទប្រកាន់មកលើមន្ត្រីអនុវត្តច្បាប់ កម្ពុជាថា មានការធ្វើទារុណកម្ម ឬក៏រំលោភសិទ្ធិ ឬក៏កាបសង្កត់យកលុយទៅលើប្រជាពលរដ្ឋ តើនាយឧមសេនីយ៍យល់ឃើញយ៉ាងម៉េចដែរបាទ ! ។
ចម្លើយ ក្នុងនេះ ខ្ញុំសុំជំរាបជូនដែរ ជាមួយនិងការខិតខំប្រឹងប្រែងរបស់មន្ត្រីអនុវត្តច្បាប់ សហការជាមួយស្ថាប័នផ្សេងៗ រួមជាមួពលរដ្ឋ ក្នុងការអនុវត្តផែនការប្រយុទ្ធប្រឆាំងគ្រឿងញៀននេះ យើងប្រឹងប្រែងខិតខំព្យាយាមលះបង់កម្លាំងកាយចិត្ត ប្តូរជីវិតដើម្បីបង្ក្រាបឲ្យបាននូវពួកឧក្រិដ្ឋជនគ្រឿងញៀន ហើយយើងទទួលបានជោគជ័យធំធេង ។ ប៉ុន្តែផ្ទុយទៅវិញ ស្រាប់តែអង្គការនេះ លើកឡើងនូវរបាយការណ៍ដែលលើកយកពីចចាមអារ៉ាមប្រឌិតរបស់ពួកអមិត្តរបស់ពួកអគតិ មួយចំនួនដែលចោទប្រកាន់រាជរដ្ឋាភិបាល ចោទប្រកាន់មកសមត្តកិច្ចអនុវត្តច្បាប់ថា រំលោភសិទ្ធិមនុស្ស ធ្វើទារុណកម្មយកចម្លើយថាពុករលួយ ហើយតាមពិតទៅ គឺគ្មានភស្តុតាងច្បាស់លាស់ទេ តាមពិតគេមានឧបាយកល ដើម្បីកេងចំណេញនយោបាយ បម្រើឲ្យអង្គការចាត់តាំងដែលមាននិន្នាការប្រឆាំងជាមួយរដ្ឋាភិបាលកម្ពុជាតែប៉ុណ្ណោះ ។
ខ្ញុំសូមបញ្ជាក់ដូច្នេះ យើងខ្ញុំរីករាយចាំទទួល និងសហការដោះស្រាយនូវរាល់បណ្តឹង និងព័ត៌មានទាំងឡាយណា ដែលមានភស្តុតាងច្បាសលាស់ប្រាកដប្រជា ពាក់ព័ន្ធដល់ភាពមិនប្រក្រតីរបស់មន្ត្រីអនុវត្តច្បាប់យើងក៏ជំរាបជូនថា ប្រាកដណាស់ ខាងអគ្គស្នងការនគរបាលជាតិ ក្រសួងមហាផ្ទៃ និងពិនិត្យដោះស្រាយតាមវិន័យ និងតាមច្បាប់ ចំពោះបុគ្គលនគរបាល ណាម្នាក់ដែលអសកម្ម ឬប្រព្រឹត្តបទល្មើសដូចដែលមានអនុវត្តបន្តបន្ទាប់មកនេះ ។ ហើយក៏សូមជំរាបផងដែរថា ក្រសួងមហាផ្ទៃ រាជរដ្ឋាភិបាល បានលើកទឹកចិត្តសសើរជូនរង្វាន់បុគ្គលដែលមានស្នាដៃ អង្គភាពដែលមានស្នាដៃ ក៏ប៉ុន្តែដាច់ខាតដាក់ពិន័យ និងផ្តន្ទាទោសតានច្បាប់រាល់បុគ្គលណាដែលបានប្រព្រឹត្តល្មើសច្បាប់ និងអសកម្មប៉ះពាល់ដល់សិទ្ធិសេរីភាពប្រជាពលរដ្ឋ ឬក៏កេងប្រវ័ញ្ចរកផលប្រយោជន៍លុយកាក់ ក្នុងឱកាសយុទ្ធនាការនេះ ។
ជាការពិតណាស់ នៅក្នុងយុទ្ធនាការនោះ ពួកជនល្មើស ពួកឧក្រិដ្ឋជនដែលពាក់ព័ន្ធការប្រព្រឹត្តដល់មន្ត្រីគ្រឿងញៀនត្រូវទទួលទោសចំពោះមុខច្បាប់ កន្លងមក យើងបានដាក់យកជូនទៅតុលាការសវនាការកាត់ទោស និងផ្តន្ទាទោសដាក់ពន្ធនាគារ ។ ប៉ុន្តែ ដោយឡែកចំពោះអ្នកដែលប្រើប្រាស់គ្រឿងញៀន អ្នកដែលញៀនគ្រឿងញៀន គឺរាជរដ្ឋាភិបាលដោយក្តីអាណិតអាសូរស្រឡាញ់ គិតអំពីសុខុមាលភាព និងអនាគត នូវជោគវាសនាប្រជាពលរដ្ឋ រដ្ឋាភិបាលបានចាត់ទុកអ្នកទាំងនោះ គឺជាជនរងគ្រោះ ឲ្យខិតខំជម្រុញប្រឹងប្រែងលើកទឹកចិត្តឲ្យគាត់ទាំងអស់ និងទទួលសេនាបន្សាយព្យាបាលស្តារនីតិសប្បទាតាមកក្បួនវិជ្ជសាស្ត្រ នៅតាមមណ្ឌលបណ្តោះអាសន្ន ឬព្យាបាលតាមបង្អែកសហគមន៍ ។
ចំណុចទាំងអស់នេះ ខ្ញុំសុំបញ្ជាក់បន្ថែមទៀតដែរ កន្លងមកពាក់ព័ន្ធមណ្ឌលបណ្តោះអាសន្នព្យាបាលស្តានិតិសប្បទានេះ គឺអង្គការនេះបានចោទជាកន្លងឃុំឃ្លាំងធ្វើបាបអញ្ចេះអញ្ចុះ ក៏ប៉ុន្តែគាត់មិនគិតថា នៅប្រទេសណាក៏មានដែរ មណ្ឌលអប់រំស្តានិតិសប្បទាព្យាបាលត្រូវតែមាន ដើម្បីជួយដល់អ្នកដែលមានជាតិគ្រឿងញៀន អ្នកដែលប្រើប្រាស់ ព្រោះនៅកម្ពុជាយើងចោលគាត់ទៅណា គាត់ជាប្រជាពលរដ្ឋយើង អញ្ចឹងទោះបីគាត់ខុសឆ្គងម៉េចក៏ដោយ យើងខិតខំជម្រុញគាត់លើកទឹកចិតគាត់ឲ្យទៅព្យាបាលទៅតាមមណ្ឌលស្តាតិសប្បទា និងតាមសហគមន៍ ។ ហើយកន្លងមក គឺយើងបានរៀបចំទៅតាមស្តង់ដាអន្តរជាតិ យើងមានមណ្ឌលសុខភាព នៅក្នុងកន្លែងមណ្ឌលបណ្តោះអាសន្ន មានកន្លែងស្តានិតិសប្បទាទាំងអស់ មិនមែនចេះតែធ្វើផ្តេសផ្តាសទេ ។
សំណួរ ក្នុងការចោទប្រកាន់របស់លើកលែងទោសអន្តរជាតិ តើអង្គការនោះ គាត់មានមូលដ្ឋានអី ដើម្បីយកមកធ្វើការចោទប្រកាន់សមត្តកិច្ច រាជរដ្ឋាភិបាល !
ចម្លើយ ជារួមទៅជាការសន្និដ្ឋានរបស់យើងបើពិនិត្យ មើលរខ្លឹមសារបាយការរបស់គាត់នេះ គឺជារបាយការអតនោម័តតែមួយជ្រុង ហើយបើផ្អែកតាមព័ត៌មានមួយជ្រុង ពួកអមិត្ត ពួកអគតិ ជាពិសេសបុគ្គលដែលប្រឆាំងថ្នាំថ្នាក់ជាមួយរាជរដ្ឋាភិបាលកម្ពុជាយើង ដូចគាត់ទៅសាកសួរយកព័ត៌មានពីពួកអ្នកទោស ទណ្ឌិត ពិរទ្ធជនគ្រឿងញៀនអញ្ចឹង ពួកនេះគេដែលនិយាយល្អពីរដ្ឋាភិបាល ។ ហើយគាត់យកពួកនឹងមកជើងអាងមានន័យថា យកព័ត៌មានរបស់គាត់មួយជ្រុង របាយការគាត់មួយចំហៀង និងជារបាយការដែលពុំមិនមានលក្ខណៈគ្រប់ជ្រុងជ្រោយ គ្មានមូលដ្ឋានបង្អែកច្បាស់លាស់ និងមិនបានឆ្លុះបញ្ចាំងពីការពិតនៅកម្ពុជាយើងទេ ។
ផ្ទុយទៅវិញ គាត់បង្ហាញនូវភាពអត់ខ្សោយរបស់គាត់ គ្មានវិជ្ជាជីវៈ មានគំនិតទុច្ចរិត ដ៏គគ្លើនដោយចេតនា បន្តុះបង្អាប់ប្រឆាំង និងឆន្ទៈរបស់ប្រជាពលរដ្ឋកម្ពុជា ក៏ដូចជាប្រជាពលរដ្ឋលើសាកលលោក ដែលគេចង់រស់នៅក្នុងសង្គមមួយ ដែលគ្មានការញាំញីដោយគ្រឿងញៀន គេកំពុងប្រឆាំង គេកំពុងបង្កាដោយគ្រឿងញៀន គាត់ទៅជាវាយប្រហារប្រឆាំងជាមួយនិងគោលបំណងរបស់ប្រជាពលរដ្ឋនៅក្នុងប្រទេសកម្ពុជាយើងក៏ដូចសកលលោក ។
ចុងក្រោយនេះ ក៏យើងឃើញថា បើទោះបីយុទ្ធនាការយើងដំណើរការរលូនទទួលបានជោគជ័យល្អប្រសើរ យ៉ាងណាក្តី ក៏យើងគិតថា ក៏នៅមានចំណុចចន្លោះប្រហោងខ្លះៗ ដែលយើងខ្ញុំសំណូមពរអំពាវនាវ ឲ្យមានការចូលរួមសហការ ផ្តល់ព័ត៌មាន ការរិះគន់ស្ថាបនា ពីគ្រប់មជ្ឍដ្ឋាន ដើម្បីយើងខ្ញុំធ្វើការពិនិត្យពិចារណា និងកែលំអរឲ្យកាន់តែល្អប្រសើថែមទៀត ហើយយើងខ្ញុំត្រៀមខ្លួនជាស្រេច ដើម្បីទទួលនូវការសហការនេះដោយក្តីរីករាយ។
ចែករំលែកព័តមាននេះ