លោកមហាសេដ្ឋី ប៊ីល ហ្គេតស៍ (Bill Gates) បានក្លាយជាបុគ្គលដែលស្ថិតក្នុងចំណោមអ្នកដឹកនាំសំខាន់ជាងគេក្នុងជំនាន់កូវីដ ១៩ នេះ ដោយនាំមុខក្នុងផ្នែកសាងសង់រោងចក្រដើម្បីផលិតវ៉ាក់សាំងនៅថ្ងៃអនាគត ជំរុញឲ្យមានការបង្កើនការធ្វើតេស្តជុំវិញពិភពលោក និងរិះគន់ប្រធានាធិបតីសហរដ្ឋអាមេរិកម្តងម្កាលផងដែរ ។
ក្រៅពីនេះហើយ មហាសេដ្ឋីខាងលើកំពុងតែព្យាយាមរកវិធីដើម្បីបញ្ចុះបញ្ចូលមហាសេដ្ឋីដទៃឲ្យបរិច្ចាគបន្ថែម ។ យោងទៅតាមសារព័ត៌មាន Vox បានឲ្យដឹងថា ក្នុងកំឡុងពេលប៉ុន្មានសប្តាហ៍កន្លងមកនេះ លោក ហ្គេតស៍ និងជំនួយការរបស់លោកបានពិភាក្សាពីគម្រោងក្នុងការប្រមូលវិភាគទានរបស់មហាសេដ្ឋីច្រើនជាង ២០០នាក់ទៅទៀត និងយកលុយទាំងនោះទៅឆ្លើយតបនឹងកូវីដ ១៩ ។
ជម្រើសមួយទៀតគឺការបង្កើតទីផ្សារសម្រាប់ Giving Pledge ដែលជាសេចក្តីប្រកាសសាធារណៈដែលបានបង្កើតឡើងដោយលោក ហ្គេតស៍ និងមហាសេដ្ឋី វ៉ារេន បាហ្វេត (Warren Buffett) ជាការសន្យាថាលោកទាំងពីរ និងរួមទាំងមហាសេដ្ឋីធំៗជុំវិញពិភពលោកដែលបានចុះហត្ថលេខាលើវានឹងបរិច្ចាគទ្រព្យសម្បត្តិភាគច្រើនរបស់ពួកគេឲ្យទៅសប្បរុសធម៌ ។ លោក ហ្គេតស៍ អាចនឹងស្នើដល់អ្នកដែលបានចុះហត្ថលេខាឲ្យចូលរួមក្នុងគម្រោងផ្សេងៗដើម្បីឆ្លើយតបនឹងកូវីដ ១៩ ។
មហាសេដ្ឋីចំនួន ២០៩ នាក់ដែលបានចុះហត្ថលេខាលើ Giving Pledge អាចបរិច្ចាគប្រមាណយ៉ាងតិចណាស់ក៏ ៥០០ប៊ីលានដុល្លារដែរឲ្យទៅសប្បុរសធម៌ ។ អ្នកតាមដានបានប្រាប់មកថាលោក ហ្គេតស៍ កំបិងតែពិចារណាដាក់កូវីដ ១៩ ជាបញ្ហាមានអាទិភាពខ្ពស់សម្រាប់ Giving Pledge ។
ប៉ុន្តែមនុស្សមួយចំនួនទៀតបាននិយាយថា ជំនួយការរបស់លោក ហ្គេតស៍ មិនអាចជ្រើសរើសជម្រើសនេះឡើយព្រោះមហាសេដ្ឋីដទៃអាចនឹងមិនគាំទ្រអ្វីដែលលោកហ្គេតស៍ព្យាយាមសម្រេច ។
ដោយហេតុដូចនេះទើបបុគ្គលិកធ្វើការក្រោមមូលនិធិសប្បុរសធម៌របស់លោក ហ្គេតស៍ បាននិយាយថា ពួកគេអាចនឹងបង្កើតទីផ្សារមួយ ដែលអនុញ្ញាតឲ្យមហាសេដ្ឋីបរិច្ចាគអនឡាញ បើកចំហរនូវតួលេខដែលខ្លួនបរិច្ចាគ និងមាននូវបច្ចេកវិទ្យាដែលជួយតភ្ជាប់មហាសេដ្ឋីទៅនឹងគម្រោងផ្សេងៗដែលកំពុងត្រូវការការវិនិយោគជាដើម ៕
ចែករំលែកព័តមាននេះ