ការលូតលាស់នៃវិស័យផលិតផលប្រណីតៗក្នុងប្រទេសចិន កំពុងតែជួយដល់ក្តីសង្ឃឹមថា វិស័យនេះអាចនឹងងើបឡើងបានលឿនពីការផ្ទុះជំងឺកូវីដ ១៩ កន្លងមកនេះ ។ យីហោធំៗក្នុងប្រទេសចិនដូចជា Louis Vuitton, Hermes,…
ការលូតលាស់នៃវិស័យផលិតផលប្រណីតៗក្នុងប្រទេសចិន កំពុងតែជួយដល់ក្តីសង្ឃឹមថា វិស័យនេះអាចនឹងងើបឡើងបានលឿនពីការផ្ទុះជំងឺកូវីដ ១៩ កន្លងមកនេះ ។ យីហោធំៗក្នុងប្រទេសចិនដូចជា Louis Vuitton, Hermes, Gucci និង Prada កំពុងតែមើលឃើញការលក់កើនឡើងពេលដែលហាងលក់ទំនិញក្នុងប្រទេសចិនបានចាប់បើកដំណើរការធម្មតាវិញ ។
ហាង Hermes ក្នុង Guangzhou លក់បាន ២.៧លានដុល្លារនៅថ្ងៃដែលចាប់បើកដំណើការវិញដំបូងនៅខែមេសា ។ និន្នាការនេះមានឈ្មោះថា ការចាយវាយសងសឹក ដែលមានន័យថាអតិថិជនកំពុងតែចាយវាយលុយច្រើនជាងធម្មតាដើម្បីសងពេលដែលមិនបានចាយព្រោះតែកូវីដ ១៩ ។
យ៉ាងណាក្តី ក្រុមហ៊ុន Bain & Co គិតថាការលក់ផលិតផលប្រេនៗអាចនឹងធ្លាក់ដល់ទៅ ១០០ប៊ីលានដុល្លារក្នុងឆ្នាំនេះ ដែលស្មើ ១ភាគ ៣នៃការលក់សរុបនៅឆ្នាំ ២០១៩ ។ ក្រុមហ៊ុននេះបានប្រាប់មកទៀតថា ការលក់ប្រហែលជាមិនអាចកើនដល់កម្រិតឆ្នាំ ២០១៩ ទេរហូតដល់ឆ្នាំ ២០២២ ឬ ២០២៣ ។
ប៉ុន្តែ Bain & Co បានវិភាគឃើញថា ទម្លាប់ចាយវាយរបស់អ្នកមាននឹងមានការផ្លាស់ប្តូរយ៉ាងខ្លាំងក្នុងកំឡុងពេល ១ទៅ ២ឆ្នាំខាងមុខនេះ ។ អ្នកមាននឹងប្តូរពីការចាយលុយលើបទពិសោធន៍ដូចជាការធ្វើដំណើរទេសចរណ៍ ទៅចាយវាយលើសម្ភារៈទៅវិញ ។
និន្នាការធំមួយទៀតគឺការចំណាយលើកាបូបយួរដៃ និងស្បែកជើងដែលនឹងមានប្រជាប្រិយភាពជាងគេក្នុងចំណោមផលិតផលប្រេនទាំងអស់ ខណៈដែលនាឡិកាដៃបុរស និងសម្លៀកបំពាក់សម្រាប់ពិធីបុណ្យនឹងមានការធ្លាក់ចុះ ។
ជាមួយគ្នានេះដែរ អតិថិជនកាន់តែច្រើនបានធ្វើការទិញទំនិញអនឡាញ វិញហើយក្រុមហ៊ុនត្រូវតែកាត់បន្ថយចំនួនហាង និងសម្របខ្លួនទៅនឹងការផ្លាស់ប្តូរថ្មីនេះ ។ប៉ុន្តែសំណួរខ្លាំងមួយសម្រាប់វិស័យផលិតផលប្រេនៗគែថាតើនឹងមានការរិះគន់ និងស្អប់ខ្ពើមអ្នកមានដែលចាយវាយឡូយឆាយដែរទេបន្ទាប់ពីពិភពលោកឆ្លងកាត់ជម្ងឺកូវីដ ១៩ នេះ ៕
ចែករំលែកព័តមាននេះ