ប្រទេសចិន-បារាំង ៖ ប្រទេសចិននាថ្ងៃទី១៣ ឧសភា បានស្នើដល់បារាំងកុំឲ្យលក់អាវុធឲ្យតៃវ៉ាន់ ក្នុងក្របខណ្ឌនៃការធ្វើទំនើបកម្មបណ្ដានាវាចម្បាំង ដែលតៃវ៉ាន់ទទួលបានពីបារាំងកាលពី៣០ឆ្នាំមុន ។
សម្រាប់ក្រុងប៉េកាំងដែលចាត់ទុកកោះតៃវ៉ាន់ជាផ្នែកមួយនៃដែនដីខ្លួននោះអះអាងថា មានចិនតែមួយ ហើយគោលការណ៍នេះត្រូវតែទទួលយកដោយគ្រប់ប្រទេស ដែលមានទំនាក់ទំនងការទូតជាមួយគ្នា ។ ការលក់អាវុធឲ្យតៃវា៉ន់ជារឿងរសើបបំផុតមួយ ដែលជាទូទៅនាំឲ្យចិនមានការខឹងសម្បាយ៉ាងខ្លាំង ។
តៃវ៉ាន់បំពាក់ជាពិសេសដោយអាវុធផលិតនៅអាមេរិក តែក្នុងឆ្នាំ១៩៩១ដែនកោះនោះបាន
ទិញពីបារាំងនូវនាវាពិឃាតធុន LAFAYETTE ចំនួន៦គ្រឿងដែលនាំឲ្យចិនខឹងយ៉ាងខ្លាំង ។ បារាំងក៏លក់ផងដែរនូវយន្តហោះប្រយុទ្ធធុនMIRAGE ចំនួន៦០គ្រឿងឲ្យតៃវ៉ាន់កាលពីឆ្នាំ
១៩៩២ ។
តៃវ៉ាន់ប្រកាសកាលពីខែមុនពីបំណងរបស់ខ្លួនឲ្យទទួលបានបណ្ដាសម្ភារយោធាបារាំង ដើម្បី
កែលម្អកងនាវាចម្បាំងរបស់ខ្លួន ។ លោក ZHAO LIJIAN អ្នកនាំពាក្យក្រសួងការបរទេសចិនថ្លែងថា ចិនប្រឆាំងយ៉ាងមឺុងម៉ាត់ចំពោះរាល់ការលក់អាវុធឲ្យតៃវ៉ាន់ ។
លោកថាយើងបានបញ្ជាក់រួចហើយពីការព្រូយបារម្ភយ៉ាងខ្លាំងរបស់យើងចំពោះបារាំង ។ យើងស្នើជាថ្មីដល់ភាគីបារាំងឲ្យគោរពគោលការណ៍ចិនតែមួយ ហើយបោះបង់ចោលគម្រោងលក់អាវុធនោះឲ្យតៃវ៉ាន់ ដើម្បីចៀសវាងកុំឲ្យមានការបំផ្លាញទំនាក់ទំនងបារាំង-ចិន ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ