ខេត្តបាត់ដំបង ៖ គេកំពុងមានការសង្ស័យថា កម្លាំងចម្រុះមួយក្រុម ដែលដឹកនាំដោយមន្ត្រីការិយាល័យនគរបាលចរាចរណ៍ផ្លូវគោកនៃស្នងការខេត្ត ដែលមានភារកិច្ចដាក់ប៉ុស្ដិ៍ចល័តត្រួតពិនិត្យបច្ចេកទេសយានយន្តនៅលើដងផ្លូវជាតិនានា មានការសមគំនិតជាមួយម្ចាស់រថយន្តល្មើសច្បាប់ចរាចរណ៍នានា ជាថ្មូរនឹងការទទួលបាននូវផលប្រយោជន៍ប្រចាំខែ ទើបរថយន្តទាំងនោះ នៅតែអាចធ្វើចរាចរណ៍លើដងផ្លូវបានដោយសេរី។ ជាពិសេស រថយន្តដឹកទំនិញ និងរថយន្តធំៗតទ្រុងដឹកអង្កាមយ៉ាងសំពីងសំពោង ដែលដឹកឆ្លងកាត់បុស្ដិ៍ត្រួតពិនិត្យរបស់របស់សមត្ថកិច្ចរាល់ថ្ងៃគ្រប់គោលដៅ ។
រថយន្តល្មើសច្បាប់ ដែលកំពុងធ្វើចរាចរណ៍ដោយសេរីរាល់ថ្ងៃទាំងនោះ ត្រូវគេសង្កេតឃើញភាគច្រើន ជា «រថយន្តកែច្នៃខុសលក្ខណៈបច្ចេកទេស» ដែលច្បាប់បានហាមឃាត់ ។ ដូចជារថយន្តប្រភេទទេសចរណ៍ (១២កៅអី) រថយន្តធុនធ្ងន់ដឹកទំនិញលើសចំណុះ និងរថយន្តធុនធ្ងន់តទ្រុងដឹកអង្គាមយ៉ាងសំពីងសំពោងខ្ពស់កប់មេឃ។ល។ បើទោះជាច្បាប់ចរាចរណ៍ថ្មីនេះ ត្រូវបានចែងយ៉ាងលំអិតអំពីបទល្មើស ដែលត្រូវចាប់ផាកពិន័យស្វ័យគុណក្ដី ។ ប៉ុន្តែរថយន្តទាំងនេះ នៅតែមមារញឹកនៅលើដងផ្លូវ ហើយអាចបើកឆ្លងកាត់គោលដៅត្រួតពិនិត្យរបស់មន្ត្រីចរាចរណ៍គ្រប់គោលដៅទាំងយប់ទាំងថ្ងៃបានយ៉ាងគគ្លើន មិនទាក់ភ្នែកមន្ត្រីចរាចរណ៍ឡើយ។
ជាក់ស្ដែង រថយន្តធំៗតទ្រុងដឹកអង្កាមយ៉ាងសំពីងសំពោង ឆ្លងកាត់គោលដៅត្រូតពិនិត្យបច្ចេកទេសយានយន្តនៅលើផ្លូវជាតិលេខ៥៧ ដែលដឹកនាំដោយ លោក អឹម អង្សា អនុប្រធានការិយាល័យនគរបាលចរាចរណ៍ផ្លូវគោក។ រថយន្តនេះ តទ្រុងខ្ពស់ទៅលើ និងខ្លះទៀតតទ្រុងលយវែងទៅក្រោយ តែក្រុមមន្ត្រីដែលអះអាងខ្លួនឯងថា «ជាក្រុមត្រូតពិនិត្យបច្ចេកទេសយានយន្ត» នោះ បែរជាមើលមិនឃើញកំហុសរថយន្តទាំងនេះទៅវិញ ? ហើយអនុញ្ញាតឲ្យរថយន្តល្មើសច្បាប់ទាំងនេះធ្វើចរាចរណ៍បានយ៉ាងរលូនរាល់ថ្ងៃ។ សកម្មភាពបែបនេះ ធ្វើឲ្យគេសង្ស័យថា « ក្រុមត្រូតពិនិត្យបច្ចេកទេសយានយន្ត និង ក្រុមត្រូតពិនិត្យបទល្មើសចរាចរណ៍ជាច្រើនគោលដៅទៀត អាចទទូលសំណូកពីម្ចាស់រថយន្តទាំងនោះ ទើបមិនព្រមបង្ក្រាប»។
លោកអឹម អង្សា អនុប្រធានការិយាល័យចរាចរណ៍ផ្លូវគោកនៃស្នងការខេត្ត ដែលដឹកនាំកម្លាំងចម្រុះចុះដាក់បុស្ដិ៍ចល័តត្រួតពិនិត្យបច្ចេកទេសយានយន្ត បានទទូលស្គាល់ថា រថយន្តដឹកអង្កាម ដែលមានតទ្រុងកំពស់ទៅលើ១ម៉ែត្រ និងខ្លះមានតទ្រុងលយវែងទៅក្រោយផងនោះពិតជា «ខុសលក្ខណៈបច្ចេកទេស» មែន ហើយកន្លងទៅកម្លាំងរបស់លោកក៏ធ្លាប់ចាប់បានប៉ុន្មានគ្រឿងដែរ។ លោកអឹម អង្សា បានបំភ្លឺប្រាប់កោះសន្តិភាព បែបនេះ នៅព្រឹកថ្ងៃទី១៤ ឧសភា។
លោកបានបញ្ជាក់ថា នៅពេលកម្លាំងរបស់លោកដាក់ប៉ុស្តិ៍ត្រូតពិនិត្យនៅលើផ្លូវជាតិលេខ៥៧ម្ដងៗ រថយន្តដឹកអង្កាមនេះ ហាក់ដឹងមុន ហើយមិនធ្វើចរាចរណ៍ទេ។ លុះកម្លាំងរបស់លោកដកចេញផុត ទើបក្រុមរថយន្តនេះចេញដំណើរ តែបើធ្វើចរាចរណ៍ឆ្លងកាត់គោលដៅរបស់លោក កម្លាំងរបស់លោកនឹងចាប់យកទៅស្នងការខេត្តហើយ។ ប៉ុន្តែលោក អឹម អង្សា បានបដិសេដចំពោះការចោទប្រកាន់ថា ក្រុមចម្រុះរបស់លោកទទូលប្រាក់សំណូកប្រចាំខែពីម្ចាស់រថយន្តល្មើសច្បាប់ទាំងនោះ ជាថ្នូរនឹងការមិនបង្ក្រាប។ប៉ុន្តែបើតាមប្រភពព័ត៌មាន និង ការពិនិត្យជាក់ស្ដែង វាហាក់ផ្ទុយគ្នាខ្លះទៅនឹងការបំភ្លឺរបស់លោក អឹម អង្សា អនុប្រធានការិយាល័យចរាចរណ៏ខេត្ត ដែលនាំឲ្យមានការសង្ស័យ។
ប្រភពពីមន្ត្រីបានឲ្យដឹងថា កាលដែលក្រុមនេះ នៅចុះអនុវត្តច្បាប់ចរាចរណ៍ចាស់ គេឃើញរថយន្តដឹកអង្កាមយ៉ាងសំពីងសំពោងឆ្លងកាត់គោលដៅក្រុមចម្រុះនេះ ចាប់តាំពីព្រឹករហូតដល់មេឃងងឹត គ្មានការកាក់ត្រូតពិនិត្យទេ។ ប៉ុន្តែនៅពេលចាប់ផ្ដើមចុះអនុវត្តរឹកបន្តឹងច្បាប់ចរាចរណ៏ថ្មី ស្រាប់តែក្រុមរថយន្តដឹកជញ្ជូនអង្កាមនេះ ហាក់មានការប្រែប្រូលពេលវេលាភ្លាមៗដែរ។
ប្រភពនេះ បានបញ្ជាក់ថា ជាមួយនឹងការចុះអនុវត្តរឹកបន្ដឹងច្បាប់ថ្មី គេសង្កេតឃើញរថយន្តដឹកអង្កាមហាក់សំងំស្ងៀមឈឹង នៅថ្ងៃណាដែលកម្លាំងចម្រុះរបស់លោកអឹម អង្សា ចុះដាក់បុស្តិ៍ត្រួតពិនិត្យនៅលើផ្លូវជាតិលេខ៥៧ ។ ប៉ុន្តែក្រោយពេលកម្លាំងចម្រុះនេះ ដកចេញពីគោលដៅផុតបន្តិច ក្រុមរថយន្តល្មើសនេះក៏បានចាប់ផ្ដើមចម្រុកដឹកជញ្ជូនយ៉ាងគគ្លើនដែរ ។ ផ្ទុយទៅវិញ បើថ្ងៃណាកម្លាំងចម្រុះនេះ មិនបានដាក់
ប៉ុស្តិ៍ដ៏ត្រួតពិនិត្យទេ គេឃើញក្រុមរថយន្តដឹកអង្កាមនេះ ធ្វើការដឹកជ្ញជូនស្ទើរពេញមួយថ្ងៃតែម្ដង ដែលមើលទៅហាក់មានការផ្ដល់សញ្ញាដល់គ្នាជាមុន អំពីផែនការណ៍ដាក់ប៉ុស្តិ៍ត្រួតពិនិត្យ។
បើតាមប្រភពព័ត៌មាននានាដែលកោះសន្តិភាព ទទូលបានថ្មីៗនេះ រថយន្តល្មើសច្បាប់ចរាចរណ៍ដែលកំពុងធ្វើចរាចរណ៍លើដងផ្លូវឆ្លងកាត់គោលដៅមន្ត្រីចរាចរណ៍បានយ៉ាងសុខសាន្តរាល់ថ្ងៃនេះ មានដូចជា រថយន្តដឹកដី រថយន្តក្រុមហ៊ុនដឹកគ្រឿងសំណង់នានានៅក្នុងក្រុង រថយន្តដឹកទំនិញគ្រប់ប្រភេទ រថយន្តដឹកឥដ្ឋនៅតាមសិប្បកម្មផលិតឥដ្ឋ ឬរថយន្តដឹកទឹកកក សិប្បកម្មផលិតទឹកកកនានា។ល។
រថយន្តទាំងនេះ ភាគច្រើនគ្មាន «ឯកសារស្របច្បាប់ពាក់ស្លាកលេខក្លែងបន្លំ រីឯអ្នកបើកបរគ្មានប័ណ្ណបើកបរ» ជាដើម។ ប៉ុន្តែអាចធ្វើចរាចរណ៍ឆ្លងកាត់គ្រប់គោលដៅមន្ត្រីចរាចរណ៍ដោយសេរី។ ដូច្នេះហើយ ទើបគេសង្ស័យថា មន្ត្រីចរាចរណ៍តាមគោលដៅទាំងនោះ អាចទទូលបានផលប្រយោជន៍ជាប្រចាំពីម្ចាស់ក្រុមហ៊ុន ឬ ម្ចាស់យានយន្តល្មើសច្បាប់។ បច្ចុប្បន្ន រថយន្តល្មើសច្បាប់ទាំងនេះនៅតែអាចធ្វើចរាចរណ៍បានដោយគ្មានការភ័យខ្លាចនឹងច្បាប់ឡើយ បើទោះជាថ្នាក់ដឹកនាំចេញបញ្ជាយ៉ាងម៉ឺងម៉ាត់ឲ្យមានការរឹតបន្តឹងច្បាប់ចរាចរណ៍ថ្មីនេះយ៉ាងណាក្ដី។
ពាក់ព័ន្ធនឹងការចុះអនុវត្តរឹតបន្តឹងច្បាប់ចរាចរណ៍ថ្មីនេះ បើយោងលើខ្លឹមសារសំលេង ដែលគេដឹងថា ជាសារណែនាំរបស់លោកឧត្តមសេនីយ៍ទោ អ៊ុច សុខុន ស្នងការខេត្ត ផ្ដាំដល់មន្ត្រីចរាចរណ៍ដែលកំពុងចុះអនុវត្តច្បាប់ចរាចរណ៍ថ្មី។ លោកស្នងការខេត្ត បានណែនាំយ៉ាងដូច្នេះថា «បណ្ដាអធិការគ្រប់ស្រុកទាំងអស់ ព្រមទាំងការិយាល័យចរារចណ៍ ត្រូវពង្រឹងចរាចរណ៍ឲ្យមែនទេន គឺប្រយ័ត្នការអនុវត្តដែលផ្ទុយនឹងច្បាប់.. គោលការណ៍ដាក់ប៉ុន្មាន គឺត្រូវអនុវត្តប៉ុណ្ណឹង អត់មានធ្វើលើសទេ.. ហើយក៏មិនបន្ធូរបន្ថយក្នុងការអនុវត្តដែរ តែឲ្យស្របច្បាប់ កុំឲ្យផ្ទុយនឹងច្បាប់ ផ្ទុយនឹងគោលការណ៍..»។
ប៉ុន្តែលោកស្នងការខេត្ត ក៏បានព្រមានផងដែរចំពោះមន្ត្រីគោលដៅណា ដែលធ្វើការផាកពិន័យ ហើយមិនចេញវិក័យបត្រ។ លោកស្នងការ បានបញ្ជាក់បែបនេះថា «ការផាកពិន័យដាច់ខាតត្រូវតែមាន ឬស៊ុយ តែបើអត់ ឬស៊ុយ (វិក័យបត្របង់ប្រាក់) បើខ្ញុំដឹងគោលដៅណា..? អធិការណា..? អាហ្នឹងកុំបន្ទោសខ្ញុំណា..? គឺជំរាបប្រាប់អស់ឲ្យហើយ គ្រប់គោលដៅដែលអនុវត្តច្បាប់ចរាចរណ៏ »។
សូមរំលឹកផងដែរថា ចាប់តាំងពីថ្ងៃចាប់ផ្ដើម នៃការអនុវត្តរឹតបន្តឹងច្បាប់ចរាចរណ៍ថ្មី រហូតមកដល់ថ្ងៃទី១៤ ឧសភា នេះ គឺមានរយៈពេលកន្លះខែមកហើយ ហើយក៏មានការលេចឮនូវរឿងមិនប្រក្រតីជាហូរហែផងដែរ ចំពោះការអនុវត្តច្បាប់របស់មន្ត្រីចរាចរណ៍នៅតាមបណ្ដាគោលដៅនានា ។ ប៉ុន្តែគេមិនទាន់ឃើញមានប្រតិកម្មពីលោកស្នងការខេត្ត ទៅលើមន្ត្រីដែលបានប្រព្រឹត្តខុសនោះទេ តែបើតាមប្រភពព័ត៌មានបានខ្សិបប្រាប់ថា «មានការស្ដីបន្ទោសខ្លះៗដែរ តែធ្វើឡើងស្ងាត់ៗ»៕
ចែករំលែកព័តមាននេះ