ក្នុងកំឡុងពេលប៉ុន្មានខែកន្លងមកនេះតាំងពីមានការផ្ទុះ និងរីកសាយនៃជម្ងឺកូវីដ ១៩ ជុំវិញពិភពលោក លោកមហាសេដ្ឋី ប៊ីល ហ្គេតស៍ (Bill Gates) ស្ថិតក្នុងចំណោមបុគ្គលសាធារណៈជាច្រើនដែលបានចេញមុខចែករំលែកក្រោមប្រធានបទកូវីដ ១៩ ។
ប៉ុន្តែលោក ហ្គេតស៍ សោកស្តាយថាលោកមិនបានធ្វើគ្រប់គ្រាន់ក្នុងការព្រមានពិភពលោកពីការគំរាមកំហែងនៃជំងឺឆ្លងមុនពេលកូវីដ ១៩ បានកើតមានឡើងទៅវិញ ។លោក ហ្គេតស៍ បាននិយាយកាលពីថ្ងៃច័ន្ទក្នុងបទសម្ភាសន៍មួយជាមួយនឹង The Wall Street Journal ថា លោកចង់ធ្វើច្រើនជាងនេះដើម្បីផ្សព្វផ្សាយពីគ្រោះថ្នាក់នៃជំងឺទាំងនេះ ។
គួរបញ្ជាក់ផងដែរថា ក្រៅពីមានវត្តមានក្នុងកម្មវិធីទូរទស្សន៍ជាច្រើនដែលផ្សព្វផ្សាយពីកូវីដ ១៩ មហាសេដ្ឋី និងសហស្ថាបនិករបស់ក្រុមហ៊ុន Microsoft ម្នាក់នេះក៏បានចេញមុខព្រមានពីការផ្ទុះឡើងនៃជំងឺជំវុញពិភពលោកតាំងពីប៉ុន្មានឆ្នាំមុនឆ្នាំនេះទៀតផង ។
ឧទាហរណ៍ដូចជាកាលពីឆ្នាំ ២០១៥ ដែលលោកបានឡើងចែករំលែកលើកម្មវិធី TED Talk និងព្រមានមនុស្សថាជំងឺឆ្លងអាចបង្កជាហានិភ័យខ្ពស់ជាងសង្គ្រាមអាវុធនុយក្លេអ៊ែរទៅទៀត ហើយលោកបានប្រាប់ទៅរដ្ឋាភិបាលជុំវិញពិភពលោកម្តងហើយម្តងទៀតឲ្យត្រៀមខ្លួនដើម្បីឆ្លើយតបនឹងជំងឺទាំងនេះ ។
លើសពីនេះទៅទៀតលោក ហ្គេតស៍ បានប្រាប់ដល់សារព័ត៌មានខាងលើថា លោកមិនពេញចិត្តនឹងការឆ្លើយតបរបស់រដ្ឋាភិបាលអាមេរិកទៅនឹងកូវីដ ១៩ ទេ ហើយលោកបានព្យាករណ៍ថាសេដ្ឋកិច្ចពិភពលោកអាចនឹងខាតបង់រាល់សិបទ្រីលានដុល្លារឯណោះ ។ មូលនិធិសប្បុរសធម៌ Bill and Melinda Gates Foundation បម្រុងទុកច្រើនជាង ៣០០លានដុល្លារទៅទៀតសម្រាប់ការបង្កើតថ្នាំព្យាបាល និងវ៉ាក់សាំង ។
លោកបានបន្តថា ខ្ញុំបានបរិច្ចាគលុយរាប់រយលានដុល្លាររបស់មូលនិធិសប្បុរសធម៌សម្រាប់វា ។ ប៉ុន្តែវាជាកិច្ចការរបស់រដ្ឋាភិបាលទេ ដូចការមានថវិកាសម្រាប់ការពារជាតិដែលអាចប្រើពេលដែលមានការផ្ទុះសង្គ្រាមជាដើម ។
លោកបានបន្ថែមថា អ្នកដឹកនាំជុំវិញពិភពលោកដែលបានស្តាប់លោកបានទទួលយកការព្រមានរបស់លោកពិតមែន ប៉ុន្តែលោកនៅតែសង្ឃឹមថាលោកអាចមានសមត្ថភាពបញ្ចុះបញ្ចូលពួកគេឲ្យចេញសកម្មភាពលឿនជាងនេះ និងរៀបចំផែនការច្បាស់លាស់ដើម្បីពន្លឿនដំណើរការក្នុងការបង្កើតថ្នាំព្យាបាល និងវ៉ាក់សាំងពេលដែលជួបនឹងស្ថានការដូចបច្ចុប្បន្ននេះ ៕
ចែករំលែកព័តមាននេះ