អ្នកបួសរូបណាភាពខ្ជិលច្រអូសប្រចាំនៅក្នុងកាយហើយ រមែងដឹកនាំអ្នកបួសរូបនោះឲ្យប្រព្រឹត្តក្នុងផ្លូវខុស ឱ្យមានសេចក្តីប្រមាទក្នុងកិច្ចប្រតិបត្តិទាំងពួងទាំងឡាយ បើជាគ្រហស្ថវិញភាពខ្ជិលច្រអូសនោះនឹងដឹកនាំឲ្យក្ររហាម ឲ្យល្ងង់ខ្លៅ ឲ្យថោកទាប ឲ្យវិនាសអន្តរាយចាកប្រយោជន៍គ្រប់យ៉ាង ។
តាមសេចក្តីពិតទ្រព្យសម្បត្តិមិនដែលរត់ចូលមកក្នុងដៃអ្នកខ្ជិលច្រអូសនោះឡើយ លុះណាតែបុគ្គលមានព្យាយាម គឺការក្រោកធ្វើការ ខំប្រឹងប្រែង ខ្មីឃ្មាត សង្វាតក្រោកឡើងធ្វើការផ្សេងៗ អត់ទ្រាំនឹងឧបសគ្គគ្រប់យ៉ាងទើបបានជោគជ័យក្នុងជីវិត ។
ចំណែកអ្នកបួស បើបួសខ្ជិលមិនសង្វាតសិក្សារៀនសូត្រ ខ្វះការប្រតិបត្តិឱ្យបានត្រឹមត្រង់ត្រូវតាមធម៌វិន័យ គឺបួសគ្រាន់ដើម្បីលាភសក្ការៈ នោះនឹងមិនអាចញុំាងសាសនាឱ្យចម្រើនរុងរឿងបានឡើយ ។
ហេតុនោះហើយទើបមានបុរាណភាសិតមួយកន្លែងបង្គាប់ឲ្យសម្លាប់មារយាទថោកទាប គឺឲ្យបោះបង់ការខ្ជិលច្រអូសនោះចោល បើមិនដូច្នោះទេ មិនថាអ្នកបួស ឬគ្រហស្ថរមែងទទួលនូវវិបត្តិគ្រប់យ៉ាងសម្រាប់ជីវិត ។ សាន សារិន
ចែករំលែកព័តមាននេះ