ខេត្តឧត្តរមានជ័យ ៖ បុរសម្នាក់បានបាត់បង់ជីវិតភ្លាមៗនៅនឹងកន្លែងកើតហេតុ បន្ទាប់ពីជនរងគ្រោះបើកត្រាក់ទ័រភ្ជួរដីចម្ការប៉ះចំមីនតោនផ្ទុះយ៉ាងកក្រើក បណ្តាលឱ្យប៉ើងខ្ទាតទាំងត្រាក់ទ័រ និងជនរងគ្រោះជាច្រើនម៉ែត្រ ។
ហេតុការណ៍ខាងលើនេះកើតឡើងកាលពីវេលាម៉ោង២និង៣០នាទីរសៀលថ្ងៃទី១៣ ឧសភា ឆ្នាំ២០២០នៅចំណុចដីចំការខាងក្រោយផ្ទះរបស់ជនរងគ្រោះប្រមាណ៤០០ម៉ែត្រ ស្ថិតក្នុងភូមិអូរតាមេង ឃុំអន្លង់វែង ស្រុកអន្លង់វែង ខេត្តឧត្តរមានជ័យ។
ជនរងគ្រោះដែលបាត់បង់ជីវិតខាងលើឈ្មោះយ៉ាន់ ចាន់ថុល ភេទប្រុស អាយុ៣៣ឆ្នាំ មានប្រពន្ធឈ្មោះមាស ស្រីលាប អាយុ២៩ឆ្នាំ មុខរបរកសិករ ។ គ្រួសារនេះមានកូន២នាក់ និងមានស្រុកកំណើតនៅភូមិក្រាំងត្បែង ឃុំត្រពាំងជូរ ស្រុកឱរាល់ ខេត្តកំពង់ស្ពឺ ហើយបច្ចុប្បន្នបានមកស្នាក់នៅក្នុងភូមិឃុំកើតហេតុខាងលើ ដោយចាំចំការឱ្យបងបង្កើតឈ្មោះយ៉ាន់ ចាន់ថន ភេទប្រុស អាយុ៤៦ឆ្នាំ មានទីលំនៅក្នុងស្រុកអន្លង់វែង ខេត្តឧត្តរមានជ័យ។
តាមប្រភពពីប៉ូលិសអធិការស្រុកអន្លង់វែងបានឱ្យដឹងថា គ្រាប់មីនដែលផ្ទុះនេះជាគ្រាប់ដែលសេសសល់កាលពីសម័យសង្គ្រាម ស្ថិតនៅនឹងមាត់ប្រឡាយអូរ ជាទីកន្លែងផ្លូវស្ពានឈើចាស់កាលពីសម័យសង្គ្រាមខ្មែរក្រហម ហើយសព្វថ្ងៃជាចំការដែលកសិករធ្វើជារៀងរាល់ឆ្នាំផងដែរ។
តាមប្រភពដដែលបានបន្តថា នៅថ្ងៃកើតហេតុ ជនរងគ្រោះបានបើកត្រាក់ទ័រទៅភ្ជួជ្រោយដីនៅតាមជួរដំណាំ ស្រាប់តែជ្រុលទៅដល់មាត់អូរហើយប៉ះចំគ្រាប់មីនតោនផ្ទុះឡើងយ៉ាងកក្រើក បណ្តាលឱ្យត្រាក់ទ័រផ្លោងខ្ទាតចំងាយ៥០ទៅ៦០មែត្រពីរណ្តៅគ្រាប់ រងការខូចខាតជាបំណែកៗ។
តាមប្រភពដដែលបានបន្តថា ក្រោយពីកើតហេតុ សមត្ថកិច្ចបានចុះទៅពិនិត្យកន្លែងកើតហេតុភ្លាមៗ ឃើញត្រាក់ទ័រខ្ទាតចេញពីរណ្តៅគ្រាប់ប្រមាណ៦០ម៉ែត្រ ចំណែកជនរងគ្រោះខ្ទាតចេញប្រមាណ៥០ម៉ែត្រ ។ ក្រោយពីធ្វើការចុះពិនិត្យរួច សពជនរងគ្រោះត្រូវបានប្រគល់ទៅឱ្យក្រុមគ្រួសារនិងសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើតនៅឯខេត្តកំពង់ស្ពឺនាថ្ងៃកើតហេតុ។
គួររំលឹកថា ករណីផ្ទុះគ្រាប់មីនតោននេះមិនមែនជាលើកទី១ទេនៅក្នុងខេត្តឧត្តរមានជ័យ ខណៈហេតុការណ៍បែបនេះបានកើតមានជាច្រើនលើកមកហើយ ដែលបានបំផ្លាញត្រាក់ទ័រ និងធ្វើឱ្យមនុស្សប្រុសស្រីចាស់ក្មេងជាច្រើននាក់បាត់បង់ជីវិតផងដែរ ក៏ប៉ុន្តែករណីខាងលើនេះជាលើកទី១ដែលបានកើតឡើងនាដើមឆ្នាំ២០២០នេះ៕ (កែសម្រួលដោយ ៖ ធីតា)
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ