ខេត្តស្វាយរៀង ៖ ព្រះអគ្គីបានលេបត្របាក់ក្រដាសអេតចាយប្រមាណ៥០០តោន និងរថយន្តមួយគ្រឿងត្រូវឆេះអស់សល់តែគ្រោងឆ្អឹង ប៉ុន្តែមិនបណ្តាលឱ្យរងគ្រោះថ្នាក់ដល់មនុស្សទេ ដោយសមត្ថកិច្ចជួយបាញ់ទឹកពន្លត់ទាន់ពេល បើពុំដូច្នោះទេ អាចឆេះដល់គំនរអេតចាយផ្សេងទៀតដែលនៅក្បែរនោះ ។
ករណីភ្លើងឆេះឃ្លាំងអេតចាយនេះ កើតឡើងកាលពីវេលាម៉ោងប្រមាណ៣និង៤៥នាទីរសៀល ថ្ងៃទី១២ ខែឧសភា ឆ្នាំ២០២០ ស្ថិតនៅក្នុងតំបន់សេដ្ឋកិច្ចពិសេសតាយសេង ក្នុងភូមិតាបឹប សង្កាត់បាវិត ក្រុងបាវិត ។
បើតាមនគរបាលក្រុងបាវិតឱ្យដឹងថា ម្ចាស់ឃ្លាំងអេតចាយខាងលើនេះឈ្មោះ ថាច់ ថុន ភេទស្រី អាយុ៤១ឆ្នាំ ។ ចំពោះទំហំនៃការខូចខាត គឺឆេះក្រដាសអេតចាយអស់ប្រមាណ៥០០តោន និងឆេះរថយន្តដឹកអេតចាយ១គ្រឿង ម៉ាកហ៊ីណូ គ្មានផ្លាកលេខ នៅសល់តែគ្រោងឆ្អឹង ។
ប្រភពដដែលបន្តថា ក្រោយពីទទួលបានព័ត៌មាននេះ កម្លាំងនគរបាលក្រុងបាវិត សហការជាមួយកងរាជអាវុធហត្ថក្រុង និងកងរាជអាវុធហត្ថខេត្ត បានជួយអន្តរាគមន៍ចេញរថយន្តពន្លត់អគ្គិភ័យទៅជួយពន្លត់ ដោយប្រើប្រាស់រថយន្តពន្លត់អគ្គិភ័យចំនួន២គ្រឿង និងប្រើប្រាស់ទឹកសរុបចំនួន១២រថយន្ត ប្រើប្រាស់រយៈពេលជាង២ម៉ោងទើបភ្លើងរលត់ទៅវិញ ។
ចំពោះការកើតមានអគ្គិភ័យនេះ សមត្ថកិច្ចនៅមិនទាន់បញ្ជាក់ថា បណ្តាលមកពីមូលហេតុអ្វីនោះទេ ព្រោះកំពុងស្រាវជ្រាវ ៕ (កែសម្រួលដោយ ៖ បុប្ផា)
ចែករំលែកព័តមាននេះ