រាជធានីភ្នំពេញ ៖ អភិបាលរាជធានីភ្នំពេញ ឯកឧត្តម ឃួង ស្រេង បានអំពាវនាវឲ្យពលរដ្ឋបង្កើនការថែរក្សាសុខភាព តាមគោលការណ៍របស់ក្រសួងសុខាភិបាល បើទោះបីនៅសល់អ្នកជំងឺកូវីដ-១៩តែម្នាក់ក៏ដោយ ដើម្បីការពារការឆ្លងថ្មីនៃជំងឺកូវីដ-១៩ពីមនុស្សមា្នក់ទៅមនុស្សម្នាក់ទៀត…
រាជធានីភ្នំពេញ ៖ អភិបាលរាជធានីភ្នំពេញ ឯកឧត្តម ឃួង ស្រេង បានអំពាវនាវឲ្យពលរដ្ឋបង្កើនការថែរក្សាសុខភាព តាមគោលការណ៍របស់ក្រសួងសុខាភិបាល បើទោះបីនៅសល់អ្នកជំងឺកូវីដ-១៩តែម្នាក់ក៏ដោយ ដើម្បីការពារការឆ្លងថ្មីនៃជំងឺកូវីដ-១៩ពីមនុស្សមា្នក់ទៅមនុស្សម្នាក់ទៀត ឬទៅសហគមន៍ ។
ឯកឧត្តម ឃួង ស្រេង បានថ្លែងអំពាវនាវបែបនេះ ក្នុងឱកាសទទួលសម្ភារសម្រាប់ប្រយុទ្ធប្រឆាំងមេរោគកូវីដ-១៩ ពីអង្គការការីតាសកម្ពុជា កាលពីព្រឹកថ្ងៃទី១៣ ខែឧសភា ឆ្នាំ២០២០ នៅសាលារាជធានីភ្នំពេញ សម្រាប់បែងចែកទៅតាមសង្កាត់ និងមូលដ្ឋាន ដើម្បីបង្កើនការប្រយុទ្ធប្រឆាំងជំងឺកូវីដ-១៩ ។
ថ្លែងក្នុងពិធីប្រគល់និងទទួលសម្ភារសម្រាប់ប្រយុទ្ធប្រឆាំងមេរោគកូវីត-១៩ ឯកឧត្តមអភិបាលរាជធានីភ្នំពេញ បានឲ្យដឹងថា អំណោយម៉ាស អាល់កុល និងខិត្តប័ណ្ណអប់រំពីការថែរក្សាអនាម័យរបស់អង្គការការីតាសកម្ពុជានេះ នឹងត្រូវចាត់ចែងបន្តជូនដល់អាជ្ញាធរ ដើម្បីប្រយុទ្ធប្រឆាំងជំងឺកូវីដ-១៩នៅមូលដ្ឋាន ខណៈដែលជំងឺនេះបាននិងកំពុងវាយលុកយ៉ាងខ្លាំងនៅលើពិភពលោក ហើយក្នុងនោះប្រទេសកម្ពុជាយើងបាននិងកំពុងប្រឈមដែរនោះ ។
ឯកឧត្តម ឃួង ស្រេង បានថ្លែងអំណរគុណយ៉ាងជ្រាលជ្រៅចំពោះអង្គការការីតាសកម្ពុជា ដែលបានចូលរួមចំណែកដើម្បីបង្ការ និងទប់ស្កាត់ជំងឺកូវីដ-១៩ នេះ ។ ឯកឧត្តមបានបន្តអំពាវនាវឲ្យបងប្អូនប្រជាពលរដ្ឋមានការប្រុងប្រយ័ត្នខ្ពស់ចំពោះជំងឺកូវីដ-១៩នេះ ដោយត្រូវការពារខ្លួនឱ្យ
បានល្អប្រសើរទៅតាមការណែនាំរបស់ក្រសួងសុខាភិបាល ពោលគឺកុំភ័យខ្លាំងពេក និងកុំហ៊ានខ្លាំងពេក បន្តធ្វើអនាម័យឲ្យបានជាប់ជាប្រចាំ ពិសេសលាងដៃ ពាក់ម៉ាស់ការពារ ចៀសឲ្យបានការជួបជុំប្រមូលផ្តុំគ្នាជាដើម ដើម្បីទប់ស្កាត់ការរីករាលដាលជំងឺកូវីដ-១៩ ពីមនុស្សម្នាក់ទៅមនុស្សម្នាក់ទៀត និងទៅសហគមន៍ ។
លោក គឹម រតនៈ នាយកប្រតិបត្តិអង្គការការីតាសកម្ពុជា បានថ្លែងថា ការផ្តល់អំណោយជាសម្ភារមាន ម៉ាស សាប៊ូ អាល់កុល និងខិត្តប័ណ្ណផ្សព្វផ្សាយដល់រដ្ឋបាលរាជធានីភ្នំពេញនាពេលនេះ គឺដើម្បីចូលរួមចំណែកជាមួយអាជ្ញាធរ ក្នុងការប្រយុទ្ធប្រឆាំងនឹងជំងឺកូវីដ-១៩ ដែលធានាបានសុខភាពសុវត្ថិភាពប្រជាពលរដ្ឋ៕
ចែករំលែកព័តមាននេះ