សម្រាប់អាណាព្យាបាលជាច្រើនរូប រូបភាពកូនរៗរបស់ខ្លួនអង្គុយលេងហ្គេមរាប់ម៉ោងខណៈដែលសាលារៀនត្រូវបានបិទដំណើរការព្រោះតែកូវីដ ១៩ ប្រហែលជាមិនមែនជាទិដ្ឋិភាពល្អសម្រាប់ពួកគេទេ ។ ប៉ុន្តែយុវជន និងមនុស្សធំពេញវ័យកាន់តែច្រើនបានចាប់ផ្តើមធ្វើឲ្យការលេងហ្គេមក្លាយជាអាជីពរបស់ពួកគេ ។
ក្នុងចំណោមនោះគឺ បេន ណូបល (Ben Noble) មកពីប្រទេសអង់គ្លេសបានលាឈប់ពីការងារជាអ្នកលក់ក្នុងហាងមួយ និងក្លាយជាគ្រូបង្វឹកលេងហ្គេមពេញម៉ោងវិញ ។ យុវជនម្នាក់នេះបានប្រទះឃើញថាខ្លួនអាចរកលុយបានពីការលេងហ្គេមបានបន្ទាប់ពីចំណាយពេលជាមួយមិត្តភក្តិ និងបង្រៀនពួកគេពីវិធីលេងហ្គេមឈ្មោះថា Rocket League ។
បច្ចុប្បន្ននេះ បេន ផ្តល់សេវាបង្វឹកលេងហ្គេមតាមគេហទំព័រ Fiverr តាំងពីខែមីនាមកដែលពេលនោះរកបានប្រមាណ ៦០០ដុល្លារក្នុងមួយខែ ។ បេន គិតថ្លៃសេវារបស់ខ្លួនតាមកញ្ចប់សេវា ។
ជាដំបូង បេន ត្រូវវិភាគលើចំណុចខ្លាំង និងខ្សោយរបស់អតិថិជនរបស់ខ្លួន ។ បន្ទាប់មក បេន ផ្តល់ការហ្វឹកហាត់ក្នុងផ្នែកជាច្រើនដូចជាយុទ្ធសាស្ត្រ និងការហាត់លេងជាមួយខ្លួន និងអ្នកលេងហ្គេមពូកែៗថែមទៀត ។បេន បានប្រាប់ឲ្យដឹងថា ខ្លួនរកបានលើស ១ពាន់ដុល្លារទៅទៀតកាលពីខែមេសាព្រោះមនុស្សកាន់តែច្រើនមានពេលវេលាក្នុងការលេងហ្គេមព្រោះតែកូវីដ ១៩ ។ ប៉ុន្តែជាក់ស្តែង បេន អាចជោគជ័យបានមិនមែនព្រោះតែខ្លួនស្រលាញ់ការលេងហ្គេមតែមួយទេ ។
បេន បានចំណាយលើសពី ៣ពាន់ម៉ោងទៅទៀតលើ Rocket League និងបច្ចុប្បន្នស្ថិតក្នុងចំណោមមនុស្សដែលពូកែលេងហ្គេមនេះជាងគេថែមទៀត ។ បទពិសោធន៍របស់ បេន ត្រូវបានដាក់លើគេហទំព័រ Fiverr ជាសាធារណៈ ដែលក្នុងនោះរួមមានការឈ្នះការប្រកួតលេងហ្គេមធំៗជាច្រើនទៀតផង ។
ក្រៅពីនេះហើយ បេន ត្រូវខិតខំប្រឹងប្រែងយ៉ាងខ្លាំងក្នុងការហ្វឹកហាត់ ។ ព្រោះតែអតិថិជនភាគច្រើនមកពីសហរដ្ឋអាមេរិក បេន ត្រូវបង្វឹកពួកគេដល់យប់ជ្រៅ ហើយពេលខ្លះ បេន ត្រូវធ្វើការប្រមាណពី ៣០ ទៅ ៥០ម៉ោងក្នុងមួយសប្តាហ៍ទៀតផង ៕
ចែករំលែកព័តមាននេះ