អ្នកមានដែលចូលចិត្តធ្វើដំណើរកំពុងតែព្យាយាមឆ្លងព្រំដែនប្រទេសខណៈដែលប្រទេសជាច្រើនបានបិទការចេញចូលព្រោះតែកូវីដ ១៩ ។ គូស្នេហ៍ជនជាតិអង់គ្លេសមួយគូបានទិញសំបុត្រយន្តហោះថ្នាក់ដំបូងតម្លៃ ១ម៉ឺន ២ពាន់ដុល្លារដើម្បីចាកចេញពីទីក្រុងឡុងដ៍ ប៉ុន្តែពួកគេសុខចិត្តចំណាយ ១២ម៉ឺនដុល្លារលើយន្តហោះឯកជនព្រោះខ្លាចថាយន្តហោះ British Airways នឹងបញ្ឈប់ការផ្តល់សេវាកម្មហោះហើរ ។
បច្ចុប្បន្ននេះ អ្នកមានកំពុងតែទិញធានារ៉ាប់រងថ្មីមួយដើម្បីធានាថាពួកគេអាចធ្វើដំណើរទៅកន្លែងដែលមិនមានកូវីដ ១៩ បាន ប្រសិនបើកូវីដ ១៩ ត្រូវបានរាតត្បាតសាជាថ្មីម្តងទៀត ។ អ្នកមានមួយចំនួនបានចាប់ផ្តើមចំណាយលុយលើការទិញសិទ្ធិជាពលរដ្ឋក្នុងប្រទេសជាច្រើនជុំវិញពិភពលោកដែលមានសុវត្ថិភាព និងវិស័យសុខាភិបាលដែលរឹងមាំល្អ ។
លិខិតឆ្លងដែនសម្រាប់កូវីដ ១៩ ឬកម្មវិធីស្នាក់នៅអចិន្ត្រៃយ៍ដែលមានប្រជាប្រិយភាពជាងគេរួមមានក្នុងប្រទេសអូស្ត្រាលី ស្វីស ម៉ាល់តា ជាដើម ។ ប្រទេសទាំងអស់នេះអាចផ្តល់ជាសញ្ជាតិ ឬសិទ្ធិស្នាក់នៅអចិន្ត្រៃយ៍ប្រសិនបើមានការបរិច្ចាគ ឬវិនិយោគលើអចលនទ្រព្យ ឬអាជីវកម្មក្នុងប្រទេស ។
ប្រទេសអូស្ត្រាលី និងអូទ្រីស មានភាពទាក់ទាញជាងគេព្រោះតែសេវាកម្មសុខាពិបាលដ៏ជឿនលឿន និងរដ្ឋាភិបាលដែលបានចេញសកម្មភាពយ៉ាងលឿនក្នុងការទប់ស្កាត់នឹងការរាតត្បាតរបស់វីរុស ។
ចក្រភពអង់គ្លេសដែលជាកន្លែងទាក់ទាញអ្នកមានក្នុងកំឡុងពេលប៉ុន្មានឆ្នាំមកនេះមានផ្តល់ជាសិទ្ធិស្នាក់នៅប្រសិនបើទទួលបានការវិនិយោគរាប់លានផោន ។ ប៉ុន្តែចក្រភពអង់គ្លេសនៅតែមិនទាន់មានសុវត្ថិភាពគ្រប់គ្រាន់នៅឡើយទេព្រោះតែរដ្ឋាភិបាលមិនបានគ្រប់គ្រងស្ថានការកូវីដ ១៩ បានល្អ ។
ជាក់ស្តែង ការមានថវិកាក្នុងការទិញសិទ្ធិជាពលរដ្ឋជាច្រើនប្រទេសពិតជាអាចផ្តល់នូវអត្ថប្រយោ ជន៍ដល់អ្នកមានក្នុងការការពារសុខភាព និងជីវភាពរស់នៅរបស់ខ្លួនពិតមែន ប៉ុន្តែលុយដែលបានពីកម្មវិធីទាំងនេះ និងពន្ធផ្សេងៗក៏ជាប្រភពដ៏សំខាន់សម្រាប់រដ្ឋាភិបាលដែលកំពុងតែព្យាយាមឆ្លើយតបនឹងកូវីដ ១៩ ដែរ ។ សម្រាប់ប្រទេសដែលធ្លាប់តែពឹងផ្អែកលើវិស័យទេសចរណ៍ ការលក់សិទ្ធិទាំងនេះអាចជាប្រភពចំណួលថ្មីដ៏សំខាន់ ៕
ចែករំលែកព័តមាននេះ