ខេត្តកំពង់ស្ពឺ ៖ ឈើបេងចំនួន១២ដុំ ត្រូវបានកម្លាំងអាវុធហត្ថស្រុកឱរ៉ាល់ សហការជាមួយកម្លាំងអាវុធហត្ថលើផ្ទៃប្រទេសធ្វើការបង្ក្រាបនិងរឹបអូស រួចប្រគល់ឲ្យការិយាល័យដែនជម្រក
សត្វព្រៃភ្នំឱរ៉ាល់ ដែលឈើទាំងនេះគឺក្រុមឈ្មួញដឹកយកមកលាក់ទុកនៅក្នុងព្រៃ ។
ឈើបេងចំនួន១២ដុំនេះ ត្រូវបានរឹបអូស កាលពីវេលាម៉ោងប្រមាណ១និង១៥នាទីរសៀល ថ្ងៃទី១៣ ខែឧសភា ឆ្នាំ២០២០ នៅក្នុងដីឡូត៍មួយកន្លែង នៅចំណុចកោះភ្ញៀវ ភូមិច្រកទៀក ឃុំត្រពាំងជោរ ស្រុកឱរ៉ាល់ ។
តាមមន្ត្រីអាវុធហត្ថលើផ្ទៃប្រទេស បានឲ្យដឹងថា នៅមុនពេលបង្ក្រាបគឺមានឈ្មួញឈើម្នាក់បានដឹកឈើឡាំងចំនួន១២ដុំជាប្រភេទបេងតាមគោយន្តកន្ត្រៃ មកស្តុកទុកនៅក្នុងដីឡូត៍របស់ប្រជាពលរដ្ឋ ស្ថិតក្នុងភូមិឃុំខាងលើ នៅយប់ថ្ងៃទី១២ ខែឧសភា និងបម្រុងដឹកជញ្ជូនបន្តទៅរាជធានីភ្នំពេញ ។ ដោយសារពេលយប់ ហើយនៅក្នុងដីឡូត៍ផ្ទះប្រជាពលរដ្ឋផងនោះ កងរាជ
អាវុធហត្ថលើផ្ទៃប្រទេស បានដាក់កម្លាំងតាមដានហើយរហូតដល់ម៉ោង១និង១៥នាទីរសៀល ថ្ងៃទី១៣ ខែឧសភា ឆ្នាំ២០២០ ទើបឈានដល់ការបង្ក្រាបតែម្តង ។
ឈើបេងចំនួន១២ដុំនេះ ត្រូវបានប្រគល់ឲ្យទៅស្នាក់ការដែនជម្រកសត្វព្រៃភ្នំឱរ៉ាល់ ដើម្បីចាត់ការបន្តតាមផ្លូវច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ