រាជធានីភ្នំពេញ ៖តារាសម្តែង និងជាពិធីករនៅស្ថានីយទូរទស្សន៍CTN លោកសាយ រតនៈ បានប្រតិកម្មតបវេជ្ជបណ្ឌិតមួយរូបដែលបានភ្ជាប់រូបភាពសម្រាកព្យាបាលរបស់លោក ជាមួយនឹងរូបភាពថ្លើមក្រិន និងរលួយ ដោយលោកចាត់ទុកថា វាមិនសមរម្យ និងនាំឲ្យមានការរើសអើងរូបលោក ។ ដ្បិតការភ្ជាប់រូបលោកជាមួយរូបថ្លើមនោះជាមួយសារដែលវេជ្ជបណ្ឌិតបានបង្ហោះនោះមានន័យអប់រំដល់មនុស្សទូទៅឲ្យបន្ថយការផឹក ដ្បិតវាធ្វើឲ្យប៉ះពាល់ដល់សុខភាព ជាពិសេសធ្វើឲ្យមានបញ្ហាដល់ប្រព័ន្ធការពារនៅក្នុងខ្លួនរបស់យើង ។
យ៉ាងណាក្ដីលោកសាយ រតនៈ ហាក់មិនយល់ស្របការភ្ជាប់រូបលោកជាមួយនឹងបញ្ហានេះឡើយ បើទោះបីជាលោកបានចូលពិនិត្យព្យាបាលជំងឺ និងបានបង្ហោះសារអំពាវនាវកុំឲ្យផឹកស្រាច្រើនពេកក៏ដោយ ប៉ុន្តែធាតុពិតលោកមិនមានជំងឺថ្លើមដូចអ្វីដែលលោកវេជ្ជបណ្ឌិតនោះបានភ្ជាប់នោះឡើយ ។ លោក សាយ រតនៈ បានបង្ហោះសារតាមហ្វេសប៊ុកថា «សុំសួរមតិយោបល់ពីបងប្អូន អ្នកច្បាប់ និង បងប្អូនអ្នកវេជ្ជសាស្ត្របន្តិច អំពីក្រមសីលធម៌និងវិជ្ជាជីវៈរបស់គ្រូពេទ្យ ។
តើពេទ្យម្នាក់នេះធ្វើត្រូវតាមក្រមសីលធម៌ និងវិជ្ជាជីវៈដែរ ឬទេ? ដោយបានយករូបរបស់ខ្ញុំទៅភ្ជាប់ជាមួយរូបដូចដែលបានឃើញស្រាប់? វាពិតជាធ្វើឱ្យប៉ះពាល់កិត្តិយសរបស់ខ្ញុំខ្លាំងណាស់ និងធ្វើឲ្យបងប្អូនដែលបានឃើញប្រាកដជាមានការភ័ន្តច្រឡំមកលើរូបខ្ញុំជាក់ជាមិនខាន។ លោកពេទ្យម្នាក់នេះបានយករូបរបស់ខ្ញុំទៅភ្ជាប់ជាមួយរូបថ្លើមរលួយ ខណៈដែលខ្ញុំគ្មានបញ្ហាអ្វីទាក់ទងនឹងថ្លើមសោះឡើយ ។
អ្នកមើលមួយចំនួនអាចគិតថាខ្ញុំរលួយថ្លើមខ្ទេចខ្ទីអស់ហើយ អ្នកមើល អ្នកខមមិន និងអ្នក share ប៉ុន្មាននាក់ គេមើលងាយខ្ញុំ ក្នុងនាមខ្ញុំជាសិល្បករមួយរូបផងនោះ ? ប៉ះពាល់កិត្តយស និងកេរ្តិ៍ឈ្មោះខ្ញុំទេ ? ប៉ះពាល់ការងារ និងមុខរបរប្រចាំថ្ងៃរបស់ខ្ញុំទេ ? ខ្ញុំអាចនឹងត្រូវបានមនុស្សមួយចំនួនរើសអើង ដោយគេគិតថាខ្ញុំមានជម្ងឺថ្លេីមដំណាក់កាលចុងក្រោយ លោកទទួលបានការអនុញាតិពីម្ចាស់រូបទេ ?
លោកយករូបខ្ញុំពីស្ថាប័នសារព័ត៌មាន តើស្ថាប័ននោះមានភ្ជាប់រូបខ្ញុំជាមួយថ្លើមរលួយអ៊ីចឹងដែរឬទេ? ខ្ញុំយល់ថាលោកមានបំណងល្អ តែលោកបានធ្វើឲ្យប៉ះពាល់ និងជាន់ពន្លិចខ្ញុំខ្លាំងណាស់! ខ្ញុំជាមនុស្សម្នាក់ទប់សេចក្តីក្រោធ ស្ងប់ស្ងាត់ មិនចង់ដឹងរឿងអ្នកដទៃ មិនដែលមានបញ្ហាជាមួយអ្នកផ្សេង តែលោកធ្វើនេះពិតជាប៉ះពាល់ខ្ញុំខ្លាំងណាស់ ។ នេះឬជាក្រមសីលធម៌និងវិជ្ជាជីវៈរបស់លោក ? បើលោកពេទ្យម្នាក់នេះខុស តើគួរមានចំណាត់អ្វីចំពោះគាត់ ?»។
បន្ទាប់ពីមានប្រតិកម្មពីលោកសាយ រតនៈ មក នៅលើហ្វេសប៊ុករបស់វេជ្ជបណ្ឌិតរូបនោះបានលុបចោលរូបភាពនាំឲ្យមានប្រតិកម្មនោះវិញ ប៉ុន្តែសម្រាប់រូបភាពថ្លើមដែលខូច និងសារដែលបានសរសេរបង្ហោះ គឺនៅរក្សាទុកដដែល ៕ (កែសម្រួលដោយ ៖ បុប្ផា)
ចែករំលែកព័តមាននេះ