ខេត្តសៀមរាប៖ ក្នុងការរឹតបន្តឹងការអនុវត្តន៍អនុក្រឹត្យថ្មីស្តីពីច្បាប់ចរាចរណ៍ផ្លូវគោកនោះ គឺត្រូវប្រព្រឹត្តទៅប្រកប ដោយស្មារតីទទួលខុសត្រូវ តម្លាភាព ស្មើភាព គ្មានការលើកលែង និងមានសីលធម៌ និងមានប្រកបដោយវិជ្ជាជីវៈ ។…
ខេត្តសៀមរាប៖ ក្នុងការរឹតបន្តឹងការអនុវត្តន៍អនុក្រឹត្យថ្មីស្តីពីច្បាប់ចរាចរណ៍ផ្លូវគោកនោះ គឺត្រូវប្រព្រឹត្តទៅប្រកប ដោយស្មារតីទទួលខុសត្រូវ តម្លាភាព ស្មើភាព គ្មានការលើកលែង និងមានសីលធម៌ និងមានប្រកបដោយវិជ្ជាជីវៈ ។ នេះបើតាមលោកវរសេនីយ៍ឯក ជឹម សុវណ្ណ ប្រធានការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាប ។
លោកបន្តថា ក្នុងរយៈពេល២អាទិត្យនៃការអនុវត្តន៍អនុក្រឹត្យថ្មី ស្តីពីច្បាប់ចរាចរណ៍ផ្លូវគោកនេះ នគរបាលចរាចរណ៍ខេត្តសៀមរាបឃាត់រថយន្ត និងម៉ូតូ ឥតមានស្លាកលេខ ចំនួន១៣៣ករណី , ជិះម៉ូតូអត់ពាក់មួកសុវត្ថិភាពចំនួន៥៩០ករណី និង បើកបរក្នុងភាពស្រវឹង១ករណីផងដែរ ។ លោកវរសេនីយ៍ឯកអះអាងថា រហូតមកដល់ថ្ងៃទី១១ខែឧសភានេះ ប្រជាពលរដ្ឋនៅខេត្តសៀមរាប មានការគោរពច្បាប់ច្រើន ជាងមុន ដោយមានការពាក់មួកសុវត្ថិភាពប្រមាណ៩៨%គួឲ្យកត់សម្គាល់ ។
តាមការបញ្ជាក់របស់លោក សិដ្ឋ ពិសី ប្រធានសាខាត្រួតពិនិត្យលក្ខណៈបច្ចេកទេសយានយន្ត (ឆៀក) ខេត្តសៀម រាប បានឲ្យដឹងថា នៅពេលដែលឧសានុវាទ រឹតបន្តឹងក្នុងការអនុវត្តន៍អនុក្រឹត្យថ្មី ស្តីពីច្បាប់ចរាចរណ៍ផ្លូវគោក បានធ្វើឲ្យបងប្អូនអ្នកប្រើប្រាស់យានយន្តគ្រប់ប្រភេទ បានចូលមកធ្វើឆៀករថយន្តរបស់ខ្លួន មានការទ្វេរឡើង ជារៀងរាល់ថ្ងៃ ប្រមាណជាង៣ពាន់គ្រឿង ដែលមកពីបណ្តាខេត្តក្នុងភូមិភាគទី៤ ហើយក្នុងមួយថ្ងៃក្រុមការងារធ្វើការឆៀកបានប្រមាណជាង២០០គ្រឿង ហើយមុខការអនុវត្តច្បាប់ រថយន្តដែលចូលមកធ្វើឆៀកមានប្រមាណពី ៩០ទៅ១០០ គ្រឿងតែប៉ុណ្ណោះក្នុងមួយថ្ងៃ ។
ក្នុងនោះដែរលោកក៏បានធ្វើការអំពាវនាវគ្រប់បងប្អូនអ្នកប្រើប្រាស់យានយន្តទាំង ត្រូវធ្វើការត្រួតពិនិត្យទៅលើថ្ងៃខែឆ្នាំកាលបរិច្ឆេតប័ណ្ណឆៀក កុំឲ្យមានលើសពេលវេលា ដែលនាំឲ្យសមត្ថកិច្ចធ្វើការផាកពិន័យ និងកកស្ទះក្នុងការធ្វើឆៀក ហើយក៏ដើម្បីសុវត្ថិភាពរបស់បងប្អូនផងដែរ ។ តាមការបញ្ជាក់របស់លោក ប៉ែន សូនី ប្រធានការិយាល័យដឹកជញ្ជូន នៃមន្ទីរសាធារណការនិងដឹកជញ្ជូនខេត្ត និង ជាប្រធានគណៈកម្មការប្រឡងយកប័ណ្ណ បើកបរយានយន្តនៅខេត្តសៀមរាប បានឲ្យដឹងថា ចាប់ពីរាជរដ្ឋាភិបាល បានធ្វើការរឹតបន្តឹងក្នុងការអនុវត្តន៍អនុក្រឹត្យថ្មី ស្តីពីច្បាប់ចរាចរណ៍ផ្លូវគោក ឃើញថាមានបងប្អូនជាអ្នកប្រើប្រាស់យាន យន្តគ្រប់ប្រភេទ បានចូលមកទទួលសេវាធ្វើការប្រឡងយកប័ណ្ណបើកបរ ទៅតាមប្រភេទមានការកើនឡើង ជាងពីពេលមុនការរឹតបន្តឹងច្បាប់ចរាចរណ៍ ។
លោកបានបន្តទៀតថា ក្នុងរយៈពេល២សប្តាហ៍មកនេះ បងប្អូនដែលចូលមក ទទួលសេវាផ្នែកប័ណ្ណបើកបរយានយន្តគ្រប់ប្រភេទ ប្រមាណជាង២ពាន់នាក់ ។ ក្នុងការ ប្រឡងយកប័ណ្ណបើកបរនេះ ភាគច្រើនបងប្អូនអ្នកប្រើប្រាស់ម៉ូតូដែលមានកម្លាំងលើសពី១២៥សេសេ និង អ្នកបើករ៉ឺម៉ក់កង់បី អ្នកប្រើប្រាស់រថយន្តប្រភេទ (ខ) រថយន្តទេចរណ៍ ហើយរថយន្តប្រភេទធំៗ មានចំនួនតិច ។ ក្នុងនោះដែរលោកក៏បានអំពាវដល់បងប្អូនអ្នកប្រើប្រាស់ផ្លូវទាំងអស់ នៅពេលបើកបរត្រូវគោរពច្បាប់ចរាចរណ៍ឲ្យ បានជាប្រចាំ ដើម្បីសុវត្ថិភាពក្នុងការបើកបរ និង ត្រូវមានប័ណ្ណបើកបរ ,ប័ណ្ណសម្គាល់យានយន្ត និង ធ្វើអាជីវកម្មនៅជាប់នឹងខ្លួនជានិច្ច ។
តាមការរឹតបន្តឹងការអនុវត្តន៍អនុក្រឹត្យថ្មី ស្តីពីច្បាប់ចរាចរណ៍ផ្លូវគោក លោក ខៀវ ប្រសើរ អនុប្រធានមន្ទីរសាធារណការ និង ដឹកជញ្ជូនខេត្ត បានឲ្យដឹងផងដែរថា ចំពោះសកម្មភាពក្នុងការចុះបញ្ជីយានយន្ត និង ផ្តល់ប័ណ្ណ បើកបរយានយន្តផ្លូវគោក ចាប់ពីថ្ងៃទី១ឧសភា ដល់ទី១១ឧសភានេះ បានអនុវត្តចុះបញ្ជីម៉ូតូថ្មី បាន២៥៩គ្រឿង ចុះបញ្ជីរថយន្តថ្មី ៩៥គ្រឿង , ផ្នែកត្រួត ពិនិត្យលក្ខណៈបច្ចេកទេសយានយន្ត (ឆៀក)សរុប ៣ពាន់១៥០គ្រឿង , រថយន្តធ្វើអាជីវកម្ម ៦៨៨គ្រឿង , ប្រឡងបើកបររថយន្តធំ មានចំនួន៩៥៤នាក់ , ប្រឡងបើកបររថយន្តតូច ១ពាន់៨១០ នាក់ ,ប្រឡងយកប័ណ្ណបើកបរម៉ូតូ ៤៧៣នាក់ , ប្តូរប័ណ្ណបើកបរ ៧០០ ប័ណ្ណ ,ទុតិយតាប័ណ្ណបើកបរ ១២៩ ប័ណ្ណ ,ទុតិយតាប័ណ្ណ.ផ្លាកម៉ូតូ ១២ , ផ្ទេរប័ណ្ណ.ផ្លាកម៉ូតូ ០៤គ្រឿង ,ប្តូរប័ណ្ណ.ផ្លាកម៉ូតូ ៣គ្រឿង ទុតិយតាប័ណ្ណ.ផ្លាករថយន្តចំនួន១៣ប័ណ្ណ , ផ្ទេរប័ណ្ណ.ផ្លាករថយន្ត ២៦គ្រឿង និង ប្តូរប័ណ្ណ.ផ្លាករថយន្ត ចំនួន០៣ គ្រឿងផងដែរ៕
ចែករំលែកព័តមាននេះ