ប្រទេសរុស្ស៊ី ៖ កាលពីថ្ងៃទី១២ឧសភាអ្នកនាំពាក្យវិមានក្រឹមឡាំង លោកឌីមីឌ្រីប៉េ៉ស្កូវ បានប្រកាសដោយខ្លួនលោកផ្ទាល់ ប្រាប់ដល់បណ្ដាសារព័ត៌មានរុស្ស៊ីថា លោកបានឆ្លងវីរុសCOVID-19ហើយកំពុងព្យាបាលក្នុងមន្ទីរពេទ្យ។
ដកស្រង់សម្ដីដោយទីភ្នាក់ងារព័ត៌មានINTERFAXលោកប៉េស្កូវនិយាយថា មែនហើយខ្ញុំកំពុងឈឺនិងទទួលការព្យាបាល។ អ្នកនាំពាក្យប្រធានាធិបតីរុស្ស៊ីរូបនោះអះអាងទៀតថា លោកមិនបានជួបផ្ទាល់ ជាមួយលោកវ្ល៉ាឌីមៀរពូទីនឡើយ ចាប់តាំងពីជាង១ខែមកនេះ។
វិមានក្រឹមឡាំងអះអាងថា សុខភាពរបស់លោកពូទីនជាកម្មវត្ថុនៃការតាមដានត្រួតពិនិត្យមើលដោយល្អិតល្អន់បំផុត និងថាប្រមុខរដ្ឋមានការតាមដានសុខភាពហ្មត់ចត់ណាស់ ។ ប្រធានាធិបតី ដែលស្ថិតនៅក្នុងនិវេសនដ្ឋានរបស់លោក នាជាយក្រុងមូស្គូហើយធ្វើការសន្ទនាតាមបែបអនឡាញជាច្រើននោះ កាលពីថ្ងៃទី១២ឧសភាបានជួបសន្ទនាទល់មុខគ្នា ជាមួយប្រធានអគ្គនាយក នៃក្រុមហ៊ុនប្រេងកាតយក្សរុស្ស៊ីROSNEFTលោកអុីហ្គ័រសេតស៊ីន។
លោកឌីមីឌ្រីប៉េស្កូវជាឥស្សរជនរុស្ស៊ីមួយរូបទៀតដែលឆ្លងវីរុស ខណៈរុស្ស៊ីពេលនេះក្លាយជាប្រទេសទី២លើពិភពលោក ដែលរងការប៉ះពាល់ខ្លាំងជាងគេដោយសារវីរុស បើគិតពីចំនួនអ្នកឆ្លង។ នាយករដ្ឋមន្ត្រីប្រទេសនេះ លោកមីខាអុីលមីឈូស្ទីនធ្លាប់បានជម្រាបដល់លោកពូទីន កាលពីដំណាច់ខែមេសាថា លោកឆ្លងវីរុសនិងថាលោកត្រូវបោះបង់ចោលតំំណែងមួយរយៈដើម្បីព្យាបាលខ្លួន។ ចំណែករដ្ឋមន្ត្រីវប្បធម៌រុស្ស៊ី លោកស្រីអូលហ្គាលីអ៊ូប៊ីម៉ូវ៉ា ធ្វើ្វតេស្តឃើញលទ្ធផលវិជ្ចមាននៃវីរុស កាលពីដើមខែឧសភាគឹមុនរដ្ឋមន្រី្តសំណង់ លោកវ្ល៉ាឌីមៀរឡាគូឆេវនិងសហការីសំខាន់របស់លោកម្នាក់បន្តិច។
ទោះបីរុស្ស៊ីកំពុងមានការឆ្លងវីរុសធ្ងន់ធ្ងរក្ដី ក៏បណ្ដាកម្មករនាថ្ងៃទី១២ឧសភាបានទៅកាន់បណ្ដារោងចក្រនិងការដ្ឋានសំណង់នានា ក្នុងក្របខណ្ឌនៃការលុបចោលបនិ្តចម្ដងៗ ការហាមឃាត់មិនឲ្យចេញក្រៅ ដើម្បីទប់ការឆ្លងរាលដាលនៃវីរុស។
ទីក្រុងមូស្គូជាចំណុចសំខាន់នៃការឆ្លង ការបង្ខាំងមនុស្សមិនឲ្យចេញក្រៅផ្ទះនៅតែជាធរមាន។ ការពាក់ម៉ាសការពារនិងស្រោមដៃក្លាយជាការតព្វកិច្ច ក្នុងបណ្ដាមធ្យោបាយដឹកជញ្ជូនសាធារណៈនិងនៅតាមផ្សារទំនើប។
ជាមួយអ្នកឆ្លងវីរុសមកទល់ពេលនេះឡើងដល់២៣២.២៤៣នាក់ ក្នុងនោះ១០.៨៩៩នាក់នាថ្ងៃទី១២ឧសភា រុស្ស៊ីពេលនេះបានក្លាយជាប្រទេសទី២លើពិភពលោក ដែលមានអ្នកឆ្លងវីរុសច្រើនជាងគេ បន្ទាប់ពីសហរដ្ឋអាមេរិក នាំមុខអេស្ប៉ាញនិងអង់គ្លេស។ ទោះបីយ៉ាងណាចំនួនអ្នកស្លាប់ដោយសារវីរុសនៅរុស្ស៊ីមានទាបត្រឹមតែ២.១១៦នាក់ ជាចំនួនដ៏តិចទាបជាងអុីតាលី បារាំងនិងអាល្លឹម៉ង់ ដោយប្រទេសនោះអះអាង ឧទាហរណ៍ពីការគ្រប់គ្រងបានល្អនូវវិបត្តិ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ