សហរដ្ឋអាមេរិក៖ អតីតម្ចាស់ខ្សែក្រវាត់ទម្ងន់ធ្ងន់ពិភព គឺកីឡាករ Mike Tyson បានបន្តធ្វើឲ្យអ្នកគាំទ្រកីឡាប្រដាល់នាំគ្នានិយាយអំពីការវិលត្រឡប់មកកាន់សង្វៀនវិញម្តងទៀតរបស់លោក តាមរយៈការបង្ហោះវីដេអូហ្វឹកហាត់មួយផ្សេងទៀតនៅលើបណ្តាញទំនាក់ទំនងសង្គម Instagram ជាសម្តីមួយឃ្លាថា «ខ្ញុំត្រឡប់មកវិញហើយ» ។
បុរសជនជាតិអាមេរិកាំងវ័យ ៥៣ ឆ្នាំរូបនេះ បានទទួលការចាប់អារម្មណ៍ពីពិភពប្រដាល់កាលពីសប្តាហ៍មុន នៅពេលដែលរូបលោកបានបង្ហោះវីដេអូខ្លីនៃការហាត់ប្រាណដែលបង្ហាញថា ខ្លួនមានកម្លាំង និងល្បឿនដាល់នៅតែខ្លាំង ដែលធ្វើឲ្យលោកក្លាយជាអ្នកប្រដាល់ទម្ងន់ធ្ងន់ដំបូងគេ កាន់ខ្សែក្រវាត់ WBA, WBC និង IBF ។
Tyson បាននិយាយនៅពេលនោះថា គាត់កំពុងពិចារណាក្នុងការវិលត្រឡប់មកកាន់សង្វៀនប្រដាល់វិញម្តងទៀត ជាមួយកម្មវិធីមួយចំនួនដើម្បីរៃអង្គាសប្រាក់សម្រាប់សកម្មភាពសប្បុរសធម៌ ។
ចាប់តាំងពីលោក Mike Tyson បានប្រកាសប្រាប់ពីការវិលត្រឡប់មកវិញ កីឡាករប្រដាល់កំពូលៗជាច្រើន ត្រូវបានគេផ្គូរផ្គងចង់ឲ្យមានការប្រកួតតទល់ជាមួយបុរសដែលមានរហស្សនាមថា «Iron Mike» ។
សូមរំលឹកជូនថា Mike Tyson បានក្លាយជាម្ចាស់ខ្សែក្រវាត់ទម្ងន់ធ្ងន់ក្មេងជាងគេបំផុតគ្រប់ពេល នៅពេលដែលលោកបានផ្តួលកីឡាករ Trevor Berbick ក្នុងឆ្នាំ ១៩៨៦ ក្នុងវ័យត្រឹមតែ ២០ឆ្នាំប៉ុណ្ណោះ ។ ក្នុងអាជីពប្រដាល់ Tyson បានឆ្លងកាត់ការប្រកួតចំនួន ៥៨លើក ឈ្នះ ៥០ ដង ស្មើ ២ដង និងផ្តួលគូប្រកួតឲ្យបោះបង់ការប្រកួតចំនួន ៤៤ ដង មុនពេលប្រកាសចូលនិវត្តន៍នៅក្នុងឆ្នាំ ២០១៥ ៕ (ដកស្រង់ចេញពី Theguardian)
ចែករំលែកព័តមាននេះ