ប្រទេសយេម៉ែន ៖ ការប្រយុទ្ធគ្នានានាបានផ្ទុះឡើងកាលពីថ្ងៃទី១១ ឧសភា នៅភាគខាងត្បូង
យេម៉ែន រវាងពួកបំបែកខ្លួន និងកងកម្លាំងរដ្ឋាភិបាល ដែលប៉ុនប៉ងវាយដណ្ដើមយកវិញទីក្រុង
ZINJIBAR ទីប្រជុំជននៃខេត្តអាប់យ៉ាន បណ្ដាលឲ្យមនុស្សស្លាប់យ៉ាងតិច១០នាក់ហើយច្រើននាក់រងរបួសទាំងសងខាង ។
នេះជាការប៉ះទង្គិចគ្នាខាងយោធាលើកដំបូង ក្នុងទ្រង់ទ្រាយធំបែបនោះចាប់តាំងពីពួកបំបែក
ខ្លួននិយមភាគខាងត្បូងយេម៉ែនប្រកាសកាលពីថ្ងៃទី២៦ មេសា ស្វ័យភាពនៃតំបន់របស់ពួកគេកាន់កាប់បន្ទាប់ពីបរាជ័យនៃកិច្ចព្រមព្រៀងសន្តិភាពជាមួយរដ្ឋាភិបាល ដែលគ្រោងបែងចែកអំណាចគ្នារវាងភាគីទាំង២មក ។
តាមអ្នកទទួលខុសត្រូវយោធាម្នាក់របស់កងកម្លាំងបំបែកខ្លួនថា កងកម្លាំងយោធាមួយជាសម្ព័ន្ធមិត្តរបស់រដ្ឋាភិបាលបានបើកធ្វើប្រតិបត្តិការមួយ ដើម្បីវាយដណ្ដើមយកទីក្រុង ZINJIBAR ទីប្រជុំជនខេត្តអាប់យ៉ាន ភាគខាងត្បូងយេម៉ែន ។ ពួកបំបែកខ្លួនអាចទប់ការវាយលុកនេះ ដោយសម្លាប់និងចាប់ខ្លួនទាហានរដ្ឋាភិបាលជាច្រើននាក់ ។
ប្រភពមន្ទីរពេទ្យរាយការណ៍ថា ទាហានរដ្ឋាភិបាល៨នាក់បានត្រូវស្លាប់និង២៣នាក់ទៀតរងរបួសក្នុងការប្រយុទ្ធគ្នា ។ យុទ្ធជនបំបែកខ្លួន២នាក់ក៏ត្រូវស្លាប់ដែរ និង១១នាក់រងរបួស ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ