ក្រុងហុងកុង ៖ នៅក្រុងហុងកុងពួកអ្នកស្រាវជ្រាវអាចរកឃើញរូបមន្តមួយ ដើម្បីតស៊ូប្រឆាំងវីរុសCOVID-19។
តាមការសិក្សាមួយរបស់បណ្ដាគ្រូពេទ្យ នៃសាកលវិទ្យាល័យហុងកុងថា ការព្យាបាលដោយប្រើបញ្ចូលគ្នាថ្នាំ LOPANIVIR RITONAVIR និងRIBAVIRINE អាចមានប្រសិទ្ធភាពប្រឆាំងវីរុសCOVID-19។ ខណៈដែលច្រើនខែកន្លងទៅហើយ ពុំទាន់មានការព្យាបាលណាមួយត្រូវបានរកឃើញជាផ្លូវការ ប្រឆាំងវីរុសនេះនៅឡើយ ការសិក្សាតូចមួយរបស់ក្រុមគ្រូពេទ្យនោះហាក់ផ្ដល់ក្ដីសង្ឃឹម។នេះជាសេចក្ដីរាយការណ៍របស់ទូរទស្សន៍CNN។
គ្រូពេទ្យមីក្រូជីវសាស្ត្រលោកKWOK YUNG YUEN និងបណ្ដាអ្នកស្រាវជ្រាវនៃសាកលវិទ្យាល័យហុកកុង បានធ្វើតេស្តលើការប្រើរួមបញ្ចូលគ្នា ថ្នាំប្រឆាំងវីរុស៣គឹថ្នាំLOPANIVIR RITONAVIR និងRIBAVIRINE លាយជាមួយថ្នាំមួយទៀតគឹថ្នាំហៅINTERFERON BETA ហើយលទ្ធផលទទួលបានគួរឲ្យលើកទឹកចិត្ត។
បណ្ដាអ្នកជំងឺនៃការសិក្សានេះ សុទ្ធតែមានរោគសញ្ញាស្រាលទៅមធ្យម ហើយពួកគេទទួលការព្យាបាលក្នុងរយៈពេល៧ថ្ងៃ បន្ទាប់ពីធ្វើតេស្តឃើញលទ្ធផលវិជ្ជមាននៃការឆ្លងវីរុស ។ ក្រុមនោះបានផ្ដល់ឲ្យអ្នកជំងឹមួយចំនួននូវថ្នាំំំKALETRA (LOPANIVIR -RITONAVIR)ជាថ្នាំប្រើប្រឆាំងវីរុសអេដស៍។ ចំណែកអ្នកជំងឹខ្លះទៀតប្រើថ្នាំLOPANIVIR RITONAVIR និងRIBAVIRINEបញ្ចូលគ្នាព្រមទាំងចាក់ថ្នាំINTERFERON BETA។
យោងតាមលទ្ធផលនៃការសិក្សា បណ្ដាអ្នកជំងឹដែលទទួលការប្រើថ្នាំប្រឆាំងវីរុស៣លាយបញ្ចូលគ្នា បន្ថែមINTERFERON BETA ហាក់មានស្ថានភាពល្អប្រសើរឡើងវិញក្នុងរយៈពេល៤ថ្ងៃ ដោយគ្មានឥទ្ធិពលបន្ទាប់បន្សំ ហើយពួកគេធ្វើតេស្តឃើញលទ្ធផលអវិជ្ចមានវិញ បន្ទាប់ពី៧ថ្ងៃនៃការព្យាបាលគិតជាមធ្យម។ ចំណែកបណ្ដាអ្នកជំងឹដែលទទួលតែថ្នាំKALETRAធ្វើតេស្តឃើញនៅវិជ្ជមានក្រោយរយៈពេល១២ថ្ងៃនៃការប្រើថ្នាំនោះ៕ (កែសម្រួលដោយ ៖ បុប្ផា)
ចែករំលែកព័តមាននេះ